វិភាគ៖ តើមេដឹកនាំផ្ដាច់ការកូរ៉េខាងជើង គីម ជុងអ៊ុន នៅឯណា?
ព្រឹត្តិការណ៍ធំៗនៅក្នុងប្រទេសកូរ៉េខាងជើង បានកើតឡើងនៅក្នុងរយៈពេលប៉ុន្មានសប្ដាហ៍ចុងក្រោយនេះ ប៉ុន្ដែនៅតាមកញ្ចក់ទូរទស្សន៍នៃរដ្ឋឯកោមួយនេះ មិនបានបញ្ចាំងរូបភាពរបស់មេដឹកនាំវ័យក្មេង គីម ជុងអ៊ុន ដែលធ្លាប់ចេញមុខជាសាធារណៈនោះទេ។
អ្នកវិភាគធ្វើការចោទសួរគ្នាថា តើ គីម ជុងអ៊ុន បាត់មុខជាសាធារណៈហើយលោកទៅទីណា ខណៈដែលមានព័ត៌មានថា ក្នុងចំណោមមេដឹកនាំជាន់ខ្ពស់កូរ៉េខាងជើង កំពុងស្ថិតនៅក្នុងភាពប្រទាញប្រទង់គ្នាខាងអំណាច។
មេដឹកនាំកូរ៉េខាងជើង លោក គីម ជុងអ៊ុន ក្នុងវេទិកាសាធារណៈនាពេលកន្លងមក (រូបថតពី៖ nbcnews.com)
តែបែបនេះក្ដីលោក គីម ជុងអ៊ុន បានបាត់មុខលើវេទិកាសាធារណៈ ចាប់តាំងពីថ្ងៃទី៤កញ្ញាហើយស្របពេលនេះ បែរជាមានមេដឹកនាំកំពូលម្នាក់របស់កូរ៉េខាងជើង ទៅធ្វើទស្សនៈកិច្ចនៅកូរ៉េខាងត្បូងវិញ។
អវត្តមានដែលត្រូវបានចោទសួរយ៉ាងខ្លាំង គឺព្រឹត្តការណ៍ជាប្រវត្តិសាស្ដ្រមួយ ដែលប្រទេសកូរ៉េខាងជើងរំឭកខួបអនុស្សាវរីយ៍ នៃការជាប់ឆ្នោតរបស់លោក គីម ជុងអ៊ីល ឪពុករបស់លោក គីម ជុងអ៊ុន ជាអគ្គលេខាធិការនៃគណបក្សពលករ។ អវត្តមានរបស់លោក គីម ជុងអ៊ុន ធ្វើឲ្យមេដឹកនាំលំដាប់ទីពីរនៃប្រទេសនេះ ទៅធ្វើទស្សនៈកិច្ចនៅប្រទេសកូរ៉េខាងត្បូង។
អ្នកវិភាគ Michael Green នៃមជ្ឈមណ្ឌលយុទ្ធសាស្ដ្រ និងការសិក្សាអន្ដរជាតិនៃប្រទេសអាមេរិកនិយាយថា ជាការពិតគេមិនដឹងថាមេដឹកនាំវ័យក្មេងរូបនេះ នៅក្រៅក្រុងព្យុងយ៉ាងនោះទេ តែអ្វីដែលធ្វើឲ្យភ្ញាក់ផ្អើល គឺមេដឹកនាំលំដាប់ថ្នាក់ទីពីរ និងទីបីរបស់ប្រទេសនេះ បែរជា ចេញដំណើរទៅក្រៅប្រទេស ហើយមានការផ្ដល់ពត៌មានថាមេដឹកនាំលំដាប់ថ្នាក់ទីមួយ គីម ជុងអ៊ុន មានជំងឺ។
សំណួរសួរថាតើវាគ្រប់គ្រាន់ទេ ដែលគេអាចនិយាយថាមានផ្ទុះរដ្ឋប្រហារមួយកើតឡើង នៅក្នុងប្រទេសកូរ៉េខាងជើង?
អ្នកវិភាគម្នាក់ Gordon G Chang បានសរសេរពាក្យមួយប្រយោគនៅលើកាសែត Daily Beast ថាជាការពិតមេដឹកនាំកូរ៉េខាងជើង តែងតែប្រកាន់ទម្លាប់ចេញមុខនៅវេទិកាសាធារណៈ ហើយអវត្តមានរបស់មេដឹកនាំរូបនេះ ពិតជាធ្វើឲ្យពិភពលោកមានការភ្ញាក់ផ្អើលហើយថាម្នាក់ៗត្រូវរងចាំមើលប្រព្រឹត្តិការណ៍ថ្ងៃ១០តុលា ដែលជាទិវានៃការបង្កើតគណបក្សពលករកូរ៉េហើយថាប្រសិនបើថ្ងៃនោះ មិនមានវត្តមានរបស់មេដឹកនាំវ័យក្មេងនេះទេ គឺអ្វីៗនឹងកើតឡើងនៅពេលឆាប់ៗនេះ។
អ្នកវិភាគម្នាក់ទៀត គឺលោក Andrei Lankov នៃសាកលវិទ្យាល័យ Kookmin ក្រុងសេអ៊ូល និយាយថា ការបាត់មុខរបស់លោកគីម ជុងអ៊ុន នាំឲ្យមាននយោបាយទឹកពុះ ប៉ុន្តែលោកថាមេដឹកនាំវ័យក្មេងរូបនេះ នៅតែនៅពីក្រោយការគ្រប់គ្រងការងារធំៗរបស់ជាតិ។
លោកពន្យល់ថា លោកអ៊ុនអាចមានជំងឺពិតមែន តែជំងឺខូចចិត្តដែលមិនអាចនរណាម្នាក់ ដឹងឡើយ។
លោកពន្យល់ថា លោកអ៊ុនអាចមានជំងឺពិតមែន តែជំងឺខូចចិត្តដែលមិនអាចនរណាម្នាក់ ដឹងឡើយ។
ប្រតិកម្មរបស់អ្នកការទូតកូរ៉េខាងជើងនៅអង្គការសហប្រជាជាតិ
លោក Ri Tong IL ភារៈធារីស្ថានទូតកូរ៉េខាងជើងប្រចាំអង្គការសហប្រជាជាតិ បដិសេធចំពោះការមន្ទិលសង្ស័យរបស់អ្នកវិភាគ និងព័ត៌មានទាំងឡាយ ដែលថាលោក គីម ជុងអ៊ុន អវត្តមានជាសាធារណៈហើយថា កូរ៉េខាងជើងកំពុងស្ថិតនៅក្នុងស្ថានភាពនៃការផ្លាស់ប្ដូរសង្គម។
នៅពេលអ្នកសារពត៌មាន CNN បានសួរនាំអំពីស្ថានភាពជំងឺរបស់លោក គីម ជុងអ៊ុន គឺគាត់បាននិយាយបង្វែរដានទៅវិញថា លោក គីម ជុងអ៊ុន មានភារកិច្ចហើយត្រូវតែបំពេញភារកិច្ចរបស់ខ្លួន។ ប៉ុន្ដែជនភៀសខ្លួនកូរ៉េខាងជើងម្នាក់ ដែលមកជ្រកកោននៃកូរ៉េខាងត្បូង គឺភ្លាមៗក្រោយពីឪពុកលោក គីម ជុងអ៊ុន ចូលមរណភាពលោក Jang Jin Sung និយាយថាលោក គីម ជុងអ៊ុន គ្រាន់តែជាមេដឹកនាំលើកបន្តុបរបស់បក្សតែប៉ុណ្ណោះ។
តើលោក គីម ជុងអ៊ុន គ្រាន់តែជាមេដឹកនាំនិមិត្តរូប ឬដូចម្ដេច?
បណ្ដាញផ្សាយព័ត៌មានជាច្រើននិយាយថា ក្រុមឆ្មាំសន្ដិសុខរបស់ប្រទេសនេះ(OGD) គឺជាក្រុមដែលមានអំណាចពិតប្រាដក ហើយក្រុមនេះអាចដកហូតអំណាចរបស់លោក គីម ជុងអ៊ុន បាន។
ជនភៀសខ្លួន Jang Jin Sung ទទួលស្គាល់ការលើកឡើងនេះហើយថា លោក គីម ជុងអ៊ុន គ្រាន់តែជាមេដឹកនាំកេរតំណែងពីគ្រួសារសតិវង្ស ហើយធាតុពិតអំណាចស្ថិតនៅក្នុងកណ្តាប់ដៃរបស់ឆ្មាំសន្ដិសុខប្រទេស។
តែបែបនេះក្ដីទាំងមន្ដ្រីចារកម្ម និងមន្ដ្រីក្រសួងការបរទេសអាមេរិក មិនបានបញ្ជាក់អំពីការបាត់ខ្លួនរបស់លោក គីម ជុងអ៊ុន នោះទេ ហើយថាព័ត៌មានខ្លះគ្រាន់តែជាការបំបោងព្រឹត្តិការណ៍ប៉ុណ្ណោះ។ តែអ្នកវិភាគម្នាក់ឈ្មោះ Victor Cha ដែលជាសាស្ដ្រាចារ្យនៅសកលវិទ្យាល័យ Georgetown និយាយថា ព័ត៌មានដែលថាលោក គីម ជុងអ៊ុន ត្រូវបានដកហូតតំណែងដោយក្រុមសន្ដិសុខប្រទេស គឺវាគ្រាន់តែជាការបញ្ចេញព័ត៌មានធ្វើមានឲ្យមានការសង្ស័យប៉ុណ្ណោះ គឺគេត្រូវរង់ចាំមើលព្រឹត្តិការណ៍ធំៗកើតឡើង នៅប្រមាណថ្ងៃខាងមុខនេះ ទើបដឹងថាលោក គីម ជុងអ៊ុន អវត្តមានជារៀងរហូត ឬក៏ដូចម្ដេច។
លោក គីម ជុងអ៊ុន បច្ចុប្បន្នមានអាយុ៣១ឆ្នាំ ជាមេដឹកនាំនៃគ្រួសារសតិវង្សនៃអំណាចកូរ៉េខាងជើង លោកបានឡើងកាន់អំណាចភ្លាមៗ បន្ទាប់ពីឪពុករបស់ខ្លួនទទួលមរណភាពនៅឆ្នាំ២០១០។
ការព្រមានរបស់អ្នកវិភាគ
ក្រុមអ្នកវិភាគហាក់ដូចជាមានទស្សនៈដូចៗគ្នា ដោយពួកគេសម្ដែងការព្រួយបារម្ភអំពីការបែកបាក់ផ្ទៃក្នុង របស់បក្សពលករកូរ៉េខាងជើង ហើយវាអាចនាំឲ្យមានរដ្ឋប្រហារកើតឡើងឆាប់ៗនេះ។ ហើយគេមិនអាចដឹងថា រដ្ឋដែលផលិតអាវុធនុយក្លេអ៊ែរនេះ អាចធ្វើឲ្យគ្រោះថ្នាក់ដល់ប្រទេសជិតខាង ជាពិសេសកូរ៉េខាងត្បូង និងប្រទេសជប៉ុនដែរឬទេ។
អ្នកវិភាគមើលឃើញថា ប្រសិនបើមានការតស៊ូអំណាចផ្ទៃក្នុងមែននោះ គឺមិនប្រាដកថាក្រុងព្យុងយ៉ាងផ្ទេរអំណាចដោយសន្តិវិធី ទៅរកសន្ដិភាពច្រើនជាងមុននោះទេ។
តាមព័ត៌មានលោក គីម ជុងអ៊ុន មានជំងឺច្រើនយ៉ាង តែពាក្យចចាមអារាមថា លោកមានជំងឺឈឺសន្លាក់ឆ្អឹង និងទឹកនោមផ្អែម ហើយធ្វើឲ្យលោកពិបាកចេញមុខជាសាធារណៈ។
មានការព្យាករថា ប្អូនស្រីពៅម្នាក់របស់លោកគឺនាង Kim Yo Jong កំពុងរៀបចំឲ្យដឹកនាំប្រទេសជំនួសលោក គីម ជុងអ៊ុន ដែលបាត់មុខជាសាធារណៈជាង១ខែមកនេះ៕ ប្រភព ៖ VOD
មានការព្យាករថា ប្អូនស្រីពៅម្នាក់របស់លោកគឺនាង Kim Yo Jong កំពុងរៀបចំឲ្យដឹកនាំប្រទេសជំនួសលោក គីម ជុងអ៊ុន ដែលបាត់មុខជាសាធារណៈជាង១ខែមកនេះ៕ ប្រភព ៖ VOD
