មន្ត្រីបន្តឹងការត្រួតពិនិត្យបន្លែពីវៀតណាម
ភ្នំពេញៈ មន្រ្តីជំនាញបានរឹតបន្តឹងការត្រួតពិនិត្យលើបន្លែនាំចូលពី ប្រទេសវៀតណាម តាមប៉ុស្ដិ៍ត្រួតពិនិត្យអន្តរជាតិជាប់ព្រំដែនវៀតណាម បន្ទាប់សហភាពអឺរ៉ុប (EU) ប្រកាសពីការរកឃើញបាក់តេរីដែលមានគ្រោះថ្នាក់ដល់សុខភាពមាននៅក្នុងបន្លែរបស់វៀតណាម មួយចំនួនដែលត្រូវបានគេនាំចូលទៅកាន់ EU។
មន្ដ្រីមួយរូបមកពីនាយកដ្ឋានកាំកុងត្រូលដែលស្នើមិនប្រាប់ឈ្មោះដោយសារតែមិនមានសិទ្ធិនិយាយមកកាន់សារព័ត៌មានបានឲ្យ ភ្នំពេញ ប៉ុស្ដិ៍ ដឹងថា នាយកដ្ឋាននៅមិនទាន់រកឃើញករណីដែលលើកឡើងដោយ EU ពាក់ព័ន្ធនឹងបន្លែដែលត្រូវបាននាំចូលកម្ពុជាពី ប្រទេសវៀតណាម នោះទេ ចាប់តាំងពីទទួលបានព័ត៌មានកាលពីដើមសប្ដាហ៍មុន ហើយថា នាយកដ្ឋាននេះកំពុងពិនិត្យយ៉ាងយកចិត្តទុកដាក់ចំពោះបញ្ហានេះ និងកំពុងពង្រឹងការត្រួតពិនិត្យនៅគ្រប់ប៉ុស្ដិ៍ត្រួតពិនិត្យអន្តរជាតិនៅក្នុងខេត្តជាប់នៅព្រំប្រទល់វៀតណាម។
លោកថ្លែងថា៖ «បន្ទាប់ពីការទទួលបានព័ត៌មានពី EU យើងបានបន្ថែមមន្ត្រីជំនាញនៅប៉ុស្ដិ៍ត្រួតពិនិត្យអន្តរជាតិទាំងអស់នៅព្រំប្រទល់កម្ពុជានិងវៀតណាម ដើម្បីបន្ថែមការត្រួតពិនិត្យលើបន្លែដែលត្រូវនាំចូលពី ប្រទេសវៀតណាម លើរបៀបវេចខ្ចប់បន្លែការដឹកជញ្ជូន និងសីតុណ្ហភាព ហើយបើបានរកឃើញចាំបាច់គំរូមួយចំនួននឹងត្រូវបានបញ្ជូនទៅមន្ទីរពិសោធន៍សម្រាប់ធ្វើតេស្ដ»។
មន្ដ្រីជំនាញរូបនេះពន្យល់ថា បាក់តេរីដែលមាននៅក្នុងចំណីអាហារអាចបង្កគ្រោះថ្នាក់ដល់សុខភាពនេះដូចជា បង្កឲ្យពុលអាហារ ក្អួត រាក ហើយជួនកាលរហូតដល់ស្លាប់បើមិនព្យាបាលបានទាន់ពេលវេលាទេនោះ។
លោកថ្លែងបន្តថា នាយកដ្ឋាននេះកំពុងធ្វើការដើម្បីទប់ស្កាត់ករណីធ្ងន់ធ្ងរដែលអាចកើតឡើង ប៉ុន្តែក៏បានរំឭកដល់អ្នកបរិភោគត្រូវយកចិត្តទុកដាក់បន្ថែមទៀតចំពោះអនាម័យក្នុងការចម្អិនបន្លែដែលពួកគេបានទិញពីតាមទីផ្សារ។
តួលេខមិនផ្លូវការបង្ហាញថា បន្លែជាង ២០០ តោនមកពី ប្រទេសវៀតណាម ត្រូវបាននាំចូលមកកម្ពុជាក្នុងមួយថ្ងៃៗ។
លោក យ៉ង សាំងកុមារ ប្រធានមជ្ឈមណ្ឌលសិក្សានិងអភិវឌ្ឍន៍ខាងវិស័យកសិកម្មកម្ពុជា បានថ្លែងថា កង្វះអ្នកដាំបន្លែក្នុងស្រុកបានធ្វើឲ្យកម្ពុជាត្រូវពឹងលើបន្លែនាំចូលដែលភាគច្រើនប្រឈមនឹងការផ្ទុកសារធាតុគីមីពីថ្នាំពុលសត្វចង្រៃ និងការប្រើប្រាស់ជីគីមី។
លោកថ្លែងថា៖ «ដោយសារយើងមិនមានអ្នកដាំដុះក្នុងស្រុកគ្រប់គ្រាន់។ យើងនាំចូលភាគបន្លែភាគច្រើនដែលយើងមិនអាចផលិតបានក្នុងស្រុក។ យើងត្រូវតែប្រយ័ត្នលើបញ្ហានេះ ជាពិសេសនាយកដ្ឋានកាំកុងត្រូលគួរតែបង្កើនការត្រួតពិនិត្យទ្វេដងលើបន្លែនាំចូល»។
លោកបន្តថា រដ្ឋាភិបាលគួរតែអនុម័តគោលនយោបាយថ្នាក់ជាតិក្នុងការលើកទឹកចិត្តកសិករឲ្យបានច្រើនដើម្បីចាប់ផ្ដើមការដាំដុះបន្លែឲ្យបានតាមតម្រូវការក្នុងស្រុក ដើម្បីបញ្ឈប់ការពឹងផ្អែកលើការនាំចូលបន្លែពីប្រទេសជិតខាង។
យោងតាមព័ត៌មានរបស់វៀតណាម គណៈកម្មការត្រួតពិនិត្យសុខភាពនិងអ្នកប្រើប្រាស់នៃសហភាពអឺរ៉ុប (DGSANCO) កាលពីថ្ងៃអង្គារសប្ដាហ៍មុនបានចេញការប្រកាសមួយដល់ក្រុមហ៊ុននាំចេញបន្លែរបស់វៀតណាមបន្ទាប់ពីការនាំចេញ ៣ ដងត្រូវបានគេរកឃើញថា មានបាក់តេរីបង្កគ្រោះថ្នាក់។
ក្រោយការទទួលបានការព្រមានរបស់ DGSANCO នាយកដ្ឋានដំណាំស្ថិតក្រោមក្រសួងកសិកម្ម និងអភិវឌ្ឍន៍ជនបទវៀតណាម បានសម្រេចចិត្តបញ្ឈប់ការនាំចេញបន្លែ ៥ ប្រភេទថ្មីៗទៅ EU រួមមាន ជីរនាងវង់ ម្ទេសក្រហម ម្រះ បន្លែ ឃិនឆាយ និងជីរវ៉ាន់ស៊ុយ រហូតចុងឆ្នាំក្រោយ៕
ប្រភពពី ភ្នំពេញប៉ុស្តិ៍
