កូនលោក កឹម សុខា បដិសេធមិនចូលសមាជិក គ.ជ.ប
ភ្នំពេញៈ ខណៈគណបក្សកាន់អំណាច និងគណបក្សប្រឆាំងកាលម្សិលមិញបានជិតឈានដល់កិច្ចព្រមព្រៀងគ្នាទាំងស្រុងអំពីច្បាប់ស្តីពីគណៈកម្មាធិការជាតិរៀបចំការបោះឆ្នោតថ្មី បេក្ខនារីម្នាក់ក្នុងចំណោមបេក្ខជនរបស់គណបក្សសង្គ្រោះជាតិ ដែលនឹងកាន់កៅអីមួយនៅក្នុងគណៈកម្មាធិការដែលមានសមាជិក ៩ រូបនេះបានប្រកាសថា កញ្ញាបានសម្រេចចិត្តមិនចូលរួម។
កញ្ញា កឹម មនោវិទ្យា អនុប្រធានកិច្ចការសាធារណៈរបស់គណបក្សសង្គ្រោះជាតិ និងជាកូនស្រីរបស់លោក កឹម សុខា អនុប្រធានគណបក្សសង្គ្រោះជាតិ បានមានប្រសាសន៍ថា កញ្ញាមិនចង់ឲ្យតួនាទីបច្ចេកទេសរបស់កញ្ញា ជាសមាជិក គ.ជ.ប ដាក់កម្រិតទៅលើពេលវេលាសម្រាប់ធ្វើការងារដទៃៗទៀតរបស់កញ្ញានោះទេ។
កញ្ញាបានប្រាប់ ភ្នំពេញ ប៉ុស្តិ៍ ថា៖ «បន្ទាប់ពីពិចារណាអំពីចំណុចវិជ្ជមាន និងអវិជ្ជមានក្នុងការចូលរួមនៅក្នុង គ.ជ.ប ខ្ញុំបានសម្រេចចិត្តថា ខ្ញុំគិតថា ខ្ញុំអាចប្រើពេលវេលាសម្រាប់គណបក្សនិងប្រទេសប្រសើរជាងប្រសិនបើនៅក្រៅគ.ជ.ប។ ខ្ញុំបានសម្រេចចិត្តមិនចូលរួមវាទេ»។
កញ្ញាបន្តថា៖ «ទាំងអស់នេះគឺជាអ្វីដែលខ្ញុំចង់ធ្វើ ហើយខ្ញុំនឹងមិនអាចធ្វើវាបានទេ ប្រសិនបើខ្ញុំចូលរួមជាមួយ គ.ជ.ប»។
លោក គួយ ប៊ុនរឿន តំណាងរាស្រ្តគណបក្សសង្គ្រោះជាតិ ដែលបានបោះបង់អាសនៈរបស់គាត់សម្រាប់មេបក្ស លោក សម រង្ស៊ី កាល ខែកក្កដា គឺជាបេក្ខជនតែមួយគត់ដែលគណបក្សប្រឆាំងបានអះអាងថា នឹងយកកៅអីមួយក្នុងចំណោមកៅអីចំនួនបួននៅក្នុងគណៈកម្មាធិការនេះ។
ប៉ុន្តែប្រភពជាន់ខ្ពស់ពីគណបក្សនេះបានអះអាងថា កញ្ញា កឹម មនោវិទ្យា រួមជាមួយនឹង លោក គល់ បញ្ញា ដែលជាអ្នកតស៊ូមតិឲ្យមានកំណែទម្រង់បោះឆ្នោត និងប្រធានមជ្ឈមណ្ឌលអប់រំច្បាប់សម្រាប់សហគមន៍ លោក យេង វីរៈ «ប្រាកដ ៩៩ ភាគរយ» នឹងស្ថិតនៅក្នុងចំណោមអ្នកជ្រើសរើសដទៃទៀតរបស់គណបក្សសង្គ្រោះជាតិ។
គណបក្សប្រជាជនកម្ពុជា មិនបានបង្ហាញថា បេក្ខជនណាមួយក្នុងចំណោមបេក្ខជនទាំងបួនរបស់ខ្លួនទេ។
លោកស្រី ពុង ឈីវកេក ប្រធានអង្គការសិទ្ធិមនុស្សលីកាដូ មិនទាន់អះអាងនៅឡើយទេថា លោកស្រីនឹងជាបេក្ខជន ទី៩ របស់ គ.ជ.ប បន្ទាប់ពីសំណើរបស់លោកស្រីដែលស្នើសុំឲ្យមានអភ័យឯកសិទ្ធិបែបសមាជិកសភាសម្រាប់សមាជិក គ.ជ.ប មិនត្រូវបានអើពើដោយគណបក្សទាំងពីរ។
លោក គល់ បញ្ញា ដែលជាប្រធានអង្គការ ខុម ហ្វ្រែល បានថ្លែងកាលពីថ្ងៃម្សិលមិញឲ្យដឹងថា លោកចង់ឲ្យគណបក្សនយោបាយ ប្រកាន់ដំណើរការក្នុងការជ្រើសរើសដែលមានលក្ខណៈតម្លាភាពជាមួយនឹងលក្ខណៈវិនិច្ឆ័យច្បាស់លាស់ក្នុងការជ្រើសរើស គ.ជ.ប ជាជាង «ការជ្រើសរើសពួកគេដោយសម្ងាត់»។
លោកបន្តថា៖ «បើមិនដូច្នោះ សមាជិក គ.ជ.ប ថ្មីនឹងមិនមានអារម្មណ៍ទុកចិត្តថា សាធារណជនទុកចិត្តពួកគេទេ»។
ក្រុមការងារស្តីពីកំណែទម្រង់ពីគណបក្សទាំងពីរបានជួបប្រជុំគ្នាកាលពីម្សិលមិញដើម្បីព្យាយាមបញ្ចប់សេចក្តីព្រាងច្បាប់ស្តីពី គ.ជ.ប ប៉ុន្តែនៅតែមិនទាន់ឯកភាពគ្នាលើចំណុចចំនួនបី។ នេះបើតាមអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទិ្ធ។
លោក យ៉ែម បុញ្ញឫទ្ធិ បន្តថា បញ្ហាទាំងបីនេះពាក់ព័ន្ធនឹងការជ្រើសរើសសមាជិក គ.ជ.ប អំពីថា តើនរណានឹងជាអគ្គលេខាធិការនិងអគ្គលេខាធិការរងរបស់ គ.ជ.ប និងពិធីសារស្តីពីការធ្វើសេចក្តីសម្រេចចិត្ត ដូចជាវិធានស្តីពីកូរ៉ុម។
លោក បុញ្ញឫទ្ធិ បន្តថា សន្និសីទថ្នាក់ជាតិជាមួយសង្គមស៊ីវិលនិងសាធារណជននឹងប្រារព្ធធ្វើឡើងនៅពេលសេចក្តីព្រាងច្បាប់នេះត្រូវបានបញ្ចប់។
លោកបន្ថែមថា គ.ជ.ប ឥឡូវនេះនឹងទទួលខុសត្រូវទៅលើការរៀបចំការបោះឆ្នោតជាតិទាំងស្រុង រួមទាំងការចុះឈ្មោះអ្នកបោះឆ្នោតខណៈក្រុមអង្គការឃ្លាំមើលការបោះឆ្នោតសុំឲ្យមានដូច្នេះ។
ក្រុមការងាររបស់គណបក្សប្រជាជនកម្ពុជា និងតំណាងរាស្រ្ត សេក ប៊ុនហុក បានអះអាងថា កិច្ចប្រជុំកាលម្សិលមិញបរាជ័យមិនឈានដល់ការព្រមព្រៀងគ្នាទាំងស្រុងទេ។
លោក សេក ប៊ុនហុក បានបន្តថា៖ «យើងឯកភាពគ្នាលើខ្លឹមសារ ប៉ុន្តែមិនឯកភាពគ្នាលើពាក្យពេចន៍មួយចំនួន។ នេះមិនមែនជាបញ្ហាធំទេ»៕
ប្រភពពី ភ្នំពេញប៉ុស្តិ៍
