កម្មកររោងចក្រកាត់ ដេរCWKHដង្ហែក្បួនតវ៉ា ទាមទារឲ្យតំណាង១៥ នាក់ចូលធ្វើការវិញ
រាជធានីភ្នំពេញ៖
ក្រុមកម្មករ ការិនីរោងចក្រកាត់ដេរសំលៀកបំពាក់យីហោ CWKH ប្រមាណជា
១៥០នាក់ នៅព្រឹកថ្ងៃទី៣០ខែកញ្ញានេះ
បាននាំគ្នាដង្ហែក្បួនទៅកាន់ក្រសួងការងារ និង
បណ្ដុះបណ្ដាលវិជ្ជាជីវៈ
ដើម្បីជួយអន្តរាគមន៍ឲ្យតំណាងកម្មករចំនួន១៥នាក់ បានចូលធ្វើការវិញ
បន្ទាប់ពីថៅកែរោងចក្រនេះ
បានដកពួកគេចេញពីការងារជិតពីរខែមកហើយនោះ។កាលពីថ្ងៃទី១៥ ខែសីហាកន្លងទៅថ្មីៗនេះ តំណាងកម្មករនិងតំណាងសហជីពចំនួន១៥នាក់ ត្រូវបានខាងភាគីថៅកែរោងចក្រនេះដកពួកគេចេញពីការងារដោយចោទប្រកាន់ ក្រុមតំណាងទាំង១៥នាក់នោះថា តែងតែដើរញុះញង់ឲ្យកម្មករកម្មការិនីធ្វើកូដកម្មមិនសូវធ្វើការងារ ឡើយ។ ដោយមើលឃើញពីសកម្មភាពបែបនេះភាគីថៅកែរោងចក្របានបញ្ឈប់ពួកគេពី ការងារដែលសកម្មភាពនេះត្រូវបានក្រុមកម្មករហៅថាជាការបញ្ឈប់ដោយ គ្មានហេតុផលនិងខុសពីលក្ខខណ្ឌការងារនៃប្រទេសកម្ពុជា ដោយមានការយល់បែបនេះហើយទើបពួកគេនាំគ្នាធ្វើកូដកម្មតាំងពីពេលនោះ នៅតែពុំទាន់មានដំណោះស្រាយទៀត។នេះបើតាមការអះអាងពីតំណាងក្រុមកម្មករ។
កូដកម្មនេះ បានអូសបន្លាយរយៈពេលមួយខែកន្លះមកហើយ នៅតែគ្មានដំណោះស្រាយនោះទេ ដោយសាតែភាគីថៅកែមិនមានការយោគយល់និងអត់អោនឲ្យក្រុមតំណាង កម្មករទាំងនោះ។ចំណែកក្រុមកម្មករវិញ បានអះអាងថា ពួកគេនឹងបន្តធ្វើកូដកម្មរហូតទទួលបានជោគជ័យ។
នៅព្រឹកថ្ងៃអង្គារនេះ ក្រុមកម្មករ ការិនីរោងចក្រកាត់ដេរសំលៀកបំពាក់យីហោ CWKH ដែលមានទីតាំងនៅ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ បានលើកគ្នាទៅកាន់ក្រសួងការងារ និងមានគម្រោង បន្តទៅកាន់ភូមិគ្រឹះលោកនាយករដ្ឋមន្ត្រីជាបន្តទៀត ប្រសិនបើខាងក្រសួងមិនអាចរកដំណោះស្រាយបាននោះ៕
ប្រភពពី Free Press Magazine
