អង្គការយល់ពី កម្ពុជាផ្តល់ឱកាស ឲ្យកូនកំព្រារៀន ដល់ថ្នាក់ឧត្តម
អគារថ្មីដែលមានកម្ពស់ ៤ ជាន់ត្រូវបានគេសាងសង់ឡើងសម្រាប់ជាកន្លែងស្នាក់នៅដល់សិស្សានុ សិស្សដែលគ្មានឪពុកម្តាយដើម្បីមានឱកាសទទួលបានអាហារូបករណ៍សិក្សា រហូតដល់ថ្នាក់បរិញ្ញាបត្រដែលត្រូវបានគេផ្តល់ក្នុងជំនាញដូចជា វិស្វករសេដ្ឋកិច្ច ស្ថាបត្យកម្មនិងជំនួញ។
ក្នុងនោះអង្គការមានគម្រោងទទួលសិស្សក្រីក្រមកពីគ្រប់បណ្តា ខេត្តចំនួន ៨០ នាក់ឲ្យស្នាក់នៅដើម្បីបន្តការសិក្សាថ្នាក់ឧត្តមដែលបច្ចុប្បន្ន អង្គការទទួលបានសិស្សក្រីក្រចំនួន ២០ នាក់ដែលកំពុងស្នាក់នៅអគារថ្មីនេះ។
លោក Gary Hewett OAM ជាម្ចាស់មូលនិធិនិងនាយកប្រតិបត្តិនៃអង្គការយល់ពីកម្ពុជា បានថ្លែងឲ្យដឹងថា ការពិតសិស្សានុសិស្សទាំងអស់នោះសុទ្ធតែក្មេងកំព្រាដែលអង្គការ ទទួលចិញ្ចឹមតាំងពីក្មេងហើយបន្តការចិញ្ចឹមរហូតដល់ធំពេញវ័យ និងទទួលបានអាហារូបករណ៍សិក្សានៅសាកលវិទ្យាល័យទៀត។
លោកថា៖ «អគារស្នាក់នៅរបស់អង្គការមិនត្រឹមទទួលសិស្សក្រីក្រ ៨០ នាក់នោះទេ ថែមទាំងនឹងទទួលសិស្សរាប់រយនាក់នៅពេលអនាគតដើម្បីពាំនាំសេចក្តី សង្ឃឹមដល់ពួកគេសារជាថ្មីបន្ទាប់ពីពួកគេអស់សង្ឃឹមរួចជាស្រេច ហើយក្នុងការគ្មានឪពុកម្តាយ និងក្រីក្រ»។
លោក នឹម ថូត រដ្ឋលេខាធិការក្រសួងសង្គមកិច្ចអតីតយុទ្ធជននិងយុវនីតិសម្បទា បានថ្លែងថា បច្ចុប្បន្នមានមណ្ឌលទាំងរដ្ឋ និងអង្គការចំនួនជាង ២០០ ក្នុងនោះមានជាង ២២ មណ្ឌលជារបស់រដ្ឋដែលកំពុងទទួលកុមារ និងយុវជនចំនួនជាង ២០០០ នាក់រីឯមណ្ឌលអង្គការកំពុងទទួលស្នាក់នៅ និងបណ្តុះក្មេង និងយុវជនកំព្រាចំនួនជាង ៨០០០ នាក់។
លោកថា មិនងាយមានអង្គការណាផ្តោតទៅលើការផ្គត់ផ្គង់សិស្សដោយផ្តល់ អាហារូបករណ៍សិក្សានៅសាកលវិទ្យាល័យនោះទេ ព្រោះត្រូវចំណាយច្រើន ហើយថែមទាំងផ្តល់កន្លែងស្នាក់ និងហូបចុក។
លោកថា៖ «ចឹងនេះជាឱកាសដល់ប្អូនៗហើយ ត្រូវខំសិក្សាក្នុងថ្នាក់ឧត្តមនេះដើម្បីទទួលបានអនាគតភ្លឺស្វាង ទោះបីក្មួយៗជាក្មេងរងគ្រោះកំព្រា និងក្រីក្រក៏ដោយ»។
និស្សិតឈ្មោះ ជា នីតា អាយុ ១៩ឆ្នាំ មកពី ខេត្តត្បូងឃ្មុំ និយាយថា កញ្ញាជាក្មេងកំព្រាឪពុកម្តាយនិងក្រីក្រទើបត្រូវបានអង្គការ ជ្រើសរើសផ្តល់អាហារូបករណ៍សិក្សាមុខវិជ្ជាពេទ្យ ហើយត្រូវបង់សាលា ១៧០០ ដុល្លារក្នុងមួយឆ្នាំ ផ្តល់ការស្នាក់នៅ និងហូបចុក។
និស្សិតរូបនោះថា៖ «មួយឆ្នាំបង់ថ្លៃសិក្សា ១៧០០ ដុល្លារមិនតិចនោះទេតែអង្គការជួយផ្គត់ផ្គង់ក្នុងការផ្តល់ សេចក្តីសង្ឃឹមដល់ខ្ញុំ»។
យុវសិស្សម្នាក់ទៀតឈ្មោះ អ៊ុល សុខហួរ អាយុ ២២ឆ្នាំ នៅរាជធានីភ្នំពេញបាននិយាយថា ឪពុកម្តាយខ្លួនស្លាប់ដោយសារជំងឺអេដស៍ទើបរូបគេគ្មានលទ្ធភាព សិក្សាដល់ថ្នាក់ឧត្តមតែលក្ខខណ្ឌក្មេងកំព្រា និងឪពុកម្តាយស្លាប់ទើបអង្គការជ្រើសរើសផ្តល់អាហារូបករណ៍។
យុវសិស្សរូបនោះនិយាយថា៖ «នេះជាសំណាងដ៏ធំមួយរបស់ខ្ញុំដែលមានឱកាសបន្តការសិក្សាថ្នាក់ សាកលវិទ្យាល័យផ្នែកស្ថាបត្យកម្ម»៕
