សុភ័ណ្ឌ ឡារី ប្រកាសផ្ដល់ចំណូល ៥០%ពីអាមេរិកដល់ ជនក្រីក្រកម្ពុជា
ការប្រកាស
ផ្ដល់ចំណូល៥០ភាគរយពីការសម្ដែងនៅសហរដ្ឋអាមេរិកដល់ជនក្រីក្រនៅ
កម្ពុជារបស់តារាសម្ដែងសុភ័ណ្ឌ ឡារី
កំពុងធ្វើឲ្យមានការចាប់អារម្មណ៍កាន់តែខ្លាំង។
នោះគឺបន្ទាប់ពីតួលេខប្រាក់ចំណូលដែលលោករកបានមានចំនួនខ្ពស់
ត្រឹមតែបានសម្ដែង៥លើក។ ពីសហរដ្ឋអាមេរិក លោក សុភ័ណ្ឌ ឡារី ដែលគាំទ្រគោលនយោបាយគណបក្សសង្គ្រោះជាតិ និយាយថា ចំណូលដែលលោករកបានកើនដល់៦៣៥០ដុល្លារហើយ ដោយនៅមិនទាន់រាប់បញ្ចូលថវិកាដែលគ្រោងទទួលបានពីការសម្ដែងនៅយប់ ថ្ងៃសុក្រទី២៦ និងយប់ថ្ងៃសៅរ៍ទី២៧ខែកញ្ញា ត្រូវនឹងថ្ងៃសៅរ៍ និងថ្ងៃអាទិត្យម៉ោងនៅកម្ពុជានេះផង។ លោកបន្តថាសូម្បីតែប្រាក់ចំណូលដែលបងប្អូនខ្មែរសន្យាផ្ដល់ឲ្យ ហើយមិនទាន់បានធ្លាក់ដល់ដៃ ក៏លោកមិនបានរាប់បញ្ចូលសម្រាប់តួលេខខាងលើនោះដែរ។
លោកឲ្យដឹងទៀតថាលោកសម្ដែងការភ្ញាក់ផ្អើលយ៉ាងខ្លាំងដែលលោកអាច ទទួលប្រាក់រហូតដល់ជាង៦ពាន់ដុល្លារ ត្រឹមតែសម្ដែងបាន៥លើក ក្នុងចំណោម១៨លើកដែលមាននៅក្នុងគម្រោង។ លោករំពឹងថាប្រាក់ចំណូលនឹងឡើងដល់ខ្ទង់ម៉ឺនដុល្លារមិនពិបាកនោះទេ ដើម្បីឲ្យប្រាក់៥០ភាគរយដែលគ្រោងចែកចាយសម្រាប់ប្រើក្នុងមធ្យោបាយ សប្បុរសមានកាន់តែច្រើន។លោកថ្លែងបញ្ជាក់តបនឹងការចោទសួរនៅលើ Facebook ថា«បើចំណូលដែលខ្ញុំរកបានពីការសម្ដែងសរុបឈានដល់ ច្រើនម៉ឺនដុល្លារ ៥០%ដែលកាត់ឲ្យពិតជាច្រើន ប៉ុន្តែខ្ញុំអត់ប្ដូរជំហរក្រឡាស់ពាក្យសម្ដី ឬកេងបន្លំតួលេខនោះទេ គឺខ្ញុំនឹងធ្វើឲ្យមានតម្លាភាពសម្រាប់ចំណូលសរុប ទោះជាខ្ញុំត្រូវទិញអ្វី ឬប្រើការអ្វីផ្ទាល់ខ្លួន ក៏មិនលូកលាន់នឹងចំណែក៥០%ដែលខ្ញុំប្រកាសផ្ដល់ឲ្យនោះដែរ!»។
លោក សុភ័ណ្ឌ ឡារី បញ្ជាក់ថាលោកមានតែកត់ត្រាឈ្មោះ និងចំនួនទឹកប្រាក់ដែលបងប្អូនផ្ដល់ជូនទៀតផង ព្រមជាមួយការប្រកាសតួលេខកើនឡើងគ្រប់ពេលវេលា ក្នុងពេលដែលឡើងសម្ដែងម្ដងៗ។ ក្នុងនោះសូម្បីតែប្រព័ន្ធFacebook ក៏ក្លាយជាបង្ហោះវីដេអូឃ្លីប និងបង្ហាញតួលេខ ដើម្បីឲ្យមានតុល្យភាពជាក់លាក់សម្រាប់ចំណូលខ្លួននោះផងដែរ។ លោកបន្តថាថវិកាមួយចំនួនលោកបានបញ្ចូលទៅកាន់គណនេយ្យធនាគារជា បណ្ដើរៗរួចហើយ ដើម្បីការពារឲ្យមានសុវត្ថិភាព និងកុំឲ្យកើតមានបញ្ហាជាយកថាហេតុ។
លោក សុភ័ណ្ឌ ឡារី ថតរូបជាមួយតារាចម្រៀង និងបងប្អូនខ្មែរនៅអាមេរិក (រូបថតពីហ្វេសប៊ុក)
លោកនិយាយថា«ទម្រាំគ្រប់១៨លើក ខ្ញុំជឿថាចំណូលនឹងច្រើន ហើយទោះជាថវិកានោះជាចំណូលដែលបងប្អូនខ្មែរគាត់ឲ្យខ្ញុំក៏ដោយ ក៏ខ្ញុំនៅតែប្រគល់ចំណូលសរុប៥០% ឲ្យជនក្រីក្រក្រោយពេលទៅដល់ស្រុកដដែល និយាយរួមទោះជាចំណូលនោះ១ដុល្លារ ឬ២ដុល្លារ ក៏ត្រូវដក៥០%ចូលក្នុងមូលនិធិហ្នឹងដែរ ខ្ញុំមិនក្បត់ជំហរខ្លួនឯងទេ!»។
លោក សុភ័ណ្ឌ ឡារី បន្តថាជនក្រីក្រដែលលោកគ្រោងជួយមិនសំដៅលើនិន្នាការគណបក្សនោះទេ ប៉ុន្តែយោងតាមបទពិសោធន៍កន្លងមក គឺលោកច្រើនផ្ដោតទៅលើជនទីទ័លក្រជាចាស់ជរា ក្រុមអ្នកតវ៉ាដែលរងគ្រោះថ្នាក់ហើយគ្មានលទ្ធភាពព្យាបាលខ្លួន តារាសិល្បៈដែលមានជំងឺ និងជនឥតទីពឹងមួយចំនួន។ លោកគ្រោងយកថវិកា៥០%ដែលបានពីចំណូលសរុប ទិញជាសម្ភារៈ គ្រឿងឧបភោគបរិភោគ ដោយសន្យាចាយវាយថវិកាទាំងនោះ ឲ្យមានតម្លាភាព ដើម្បីឲ្យបងប្អូនខ្មែរ ដែលខំលះបង់ប្រាក់កាសឲ្យលោកសប្បាយចិត្ត ក្នុងគម្រោងសប្បុរសធម៌ទាំងនោះ។
លោក សុភ័ណ្ឌ ឡារី អះអាងថាការស្វាគមន៍ពីសំណាក់បងប្អូនខ្មែររស់នៅសហរដ្ឋអាមេរិកកាន់តែ មានចំនួនច្រើនឡើង បើទោះជាលោកទើបតែចេញសម្ដែងជាលើកទី១ ហើយខ្លួនមិនមែនជាតារាសិល្បៈដែលល្បីលំដាប់ជួរមុខ នៅក្នុងស្រុក។ ការគាំទ្រនោះត្រូវគេមើលឃើញថា កើតចេញពីឥទ្ធិពលដែលលោកសម្រេចចិត្តគាំទ្រគណបក្សប្រឆាំង(គណបក្ស សង្គ្រោះជាតិ) ដោយមិនស្ដាយការបាត់បង់ឱកាសសម្ដែងនៅក្នុងប្រទេស។ ការប្រកាសកាត់ចំណូល៥០%របស់លោក គឺជារឿងដ៏កម្រសម្រាប់តារាសិល្បៈខ្មែរ ដែលបានចេញទៅសម្ដែងនៅក្រៅប្រទេស។
លោកសុភ័ណ្ឌ ឡារី បានធ្វើដំណើរចេញពីដីកំណើតទៅកាន់សហរដ្ឋអាមេរិកនៅថ្ងៃទី០១ ខែកញ្ញា។លោកនឹងសម្តែងនៅទីនោះរយៈពេល២ខែ ក្នុងពេលដែលការងារសិល្បៈក្នុងស្រុក ទាំងការសម្ដែងរឿង ការឡើងច្រៀងលើឆាកទូរទស្សន៍ ការថតស្ពតពាណិជ្ជកម្ម និង សកម្មភាពចេញមុនក្នុងបទចម្រៀងរបស់ផលិតកម្មក្នុងស្រុកទាំងអស់ ត្រូវបានរើសអើង។ ការចេញទៅសម្តែងនៅសហរដ្ឋអាមេរិកនេះត្រូវបានគាំទ្រដោយសមាគមខ្មែរ និងបងប្អូនខ្មែររស់នៅសហរដ្ឋអាមេរិក៕
ប្រភពពី vodhotnews.com
