សុវត្ថិភាពចំណី អាហារនៅកម្ពុជា
សុខភាព
ប្រជាជនទាំងកម្លាំងកាយ
និងប្រាជ្ញាគឺជាកត្តាអាទិភាសម្រាប់អភិវឌ្ឍប្រទេសជាតិ។
ដូច្នេះការជ្រើសរើសអាហារដែលមានសុវត្ថិភាពមកបរិភោគគឺជាបញ្ហា
សំខាន់។ ប៉ុន្តែដោយសារតែជីវភាពនៅមានកម្រិត ប្រជាជនមួយចំនួន
មិនអាចមានលទ្ធភាពរកអាហារដែលមានគុណភាពមកបរិភោគបានទេ
ជាពិសេសពិសេសសម្រាប់កម្មករដូចជាយុវជន សន ចាន់រី ជាដើម។ចាន់រី សព្វថ្ងៃជាបុគ្គលិកត្រួតពិនិត្យកាមេរ៉ាសុវត្ថិភាពរោងចក្រមួយកន្លែង នៅតាមបណ្តោយផ្លូវជាតិលេខបី។ សម្រាប់សុវត្ថិភាពក្នុងរោងចក្រ ចាន់រី ប្រហែលជាអាចគ្រប់គ្រងបាន ប៉ុន្តែសម្រាប់សុវត្ថិភាពចំណីអាហារដែលគាត់កំពុងតែបរិភោគវិញនោះ ចាន់រី ប្រហែលជាមិនអាចមើលដឹងបានឡើយ។
តើអាហារដែលលក់តាមដងផ្លូវមានសុវត្ថិភាពដែរ ឬទេ?
បើតាមសម្តីរបស់លោក ឌីម ថេង ប្រធានមន្ទីរពិសោធន៍កាំកុងត្រូល ចំណីអាហារដែលលក់តាមផ្លូវនានា វាពិតជាមានគ្រោះថ្នាក់ដល់សុខភាព ព្រោះវាគ្មានអនាម័យគ្រប់គ្រាន់។ លោកបន្តថា នេះគឺជាបញ្ហាភាពក្រីក្ររបស់ប្រជាជនយើងដែលនៅមានចំនួនច្រើន។
លោកពោលដូច្នេះថា៖ «នេះមិនមែនជាកំហុសនរណាម្នាក់នោះទេ តែយើងត្រូវទទួលខុសត្រូវទាំងអស់គ្នា»។
ទាក់ទងនឹងបញ្ហាសុវត្ថិភាពចំណីអាហានេះផងដែរ ប្រភពជាច្រើនពីបណ្តាញសង្គមហ្វេសប៊ុកតែងតែរាយការណ៍ថា ចំណីអាហារដែលគេទិញមកពិសាត្រូវបានចាក់បញ្ចូលសារធាតុគីមី ឬមានផ្សំសារធាតុដែលអាចប៉ះពាល់ដល់សុខភាព។ អ្នកប្រើប្រាស់បណ្តាញសង្គមហ្វេសប៊ុកម្នាក់បានបង្ហោះពីផ្លែប៉ោម រលួយក្នុង ដែលនាងអះអាងថា បានទិញពីផ្សារធំថ្មី។
តើទាំងអស់នេះជាការពិតដែរឬទេ?
តាមការបញ្ជាក់របស់ លោក ឌីម ថេង ប្រធានមន្ទីរពិសោធន៍កាំកុងត្រូល ពាក្យចចាមអារ៉ាមដែលនិយាយពីទឹកស៊ុបខូចគុណភាព នាំចូលពីប្រទេសវៀតណាមគឺមិនពិតទេ ព្រោះលោកបានធ្វើការស្រាវជ្រាវ និងផ្តល់រង្វាន់ថែមទៀតសម្រាប់ការរាយការណ៍ពីការនាំចូលទឹកស៊ុបខូច គុណភាព តែមិនមានរឿងបែបនោះឡើយ។ លោកពោលដូច្នេះថា៖ «ផលិតផលដែលមិនស្របតាមលក្ខណៈស្តង់ដារកំណត់ដូចជា សាច់ បន្លែ ឬអាហារប្រភេទវេចខ្ចប់ ក្រុមការងារកាំកុងត្រូលនិងគយមិនរំលងឡើយ»។
បើតាមលោក ឌីម ថេង ក្រុមការងារកាំកុងត្រូល សហការជាមួយមន្រ្តីគយតាមច្រកព្រំដែន តែងត្រួតពិនិត្យមុខទំនិញនាំចូលពីក្រៅប្រទេស និងត្រួតពិនិត្យទំនិញតាមទីផ្សារតាមកម្មវិធីដែលខ្លួនបានរៀបចំ។ តែទោះជាយ៉ាងណាក៏ដោយ លោក ប្រធានមន្ទីរពិសោធន៍កាំកុងត្រូល ក៏ទទួលស្គាល់ដែរថា ការត្រួតពិនិត្យ នៅមានចន្លោះប្រហោង ព្រោះមានឈ្មួញលួចលាក់ដឹកជញ្ជូនខុសច្បាប់តាមច្រករបៀងមួយចំនួនដែល ក្រុមការងារកាំកុងត្រូលមិនទាន់រកឃើញ។
លោករៀបរាប់ដូច្នេះថា៖ «ក្រុមការងារធ្លាប់បានដុតកម្ទេចចោលផលិតផលនាំចូលពីប្រទេសវៀតណាម និងថៃដូចជា ស្លាបមាន់ ជើងមាន់ជាដើមដែលមិនគ្រប់លក្ខណៈស្តង់ដារគុណភាព ឬការវេចខ្ចប់មិនត្រឹមត្រូវខ្វះអនាម័យ និងហួសកាលបរិច្ឆេទ។ ចំពោះផលិតផលខូចគុណភាពភាគច្រើនគឺសុទ្ធតែលួចនាំចូលមកខុសច្បាប់»។
ទាក់ទងនឹងបញ្ហាខាងលើនេះដែរ លោក ឡេង វីរៈ ដែលជាអនុប្រធានប្រតិបត្តិនៃអង្គការទស្សនៈពិភពលោកកម្ពុជា បានឲ្យថ្លែងថា ចំណីអាហារដែលមិនស្គាល់ប្រភពច្បាស់លាស់ និងគ្មានការត្រួតពិនិត្យឲ្យត្រឹមត្រូវមុននឹងធ្វើការបរភោគ នឹងនាំឲ្យមានផលវិបាក។ លោក ពន្យល់ថា ចំណីអាហារដែលផ្ទុកសារធាតុគីមី បើខ្លាំងវានឹងស្តែងចេញពីផលវិបាកភ្លាមៗដូចជារាករូស ឬបញ្ហាពុលអាហារជាដើម តែបើខ្សោយវានឹងអាចបង្កឲ្យមានបញ្ហានាពេល៥ ទៅ១៥ឆ្នាំក្រោយ ដូចជាធ្វើឲ្យក្មេងៗក្រិន កូនកើតមកមិនគ្រប់លក្ខណៈ ឬអាចបណ្តាលឲ្យមានជំងឺមហារីកជាដើម។
ថ្មីៗនេះមានក្រុមនិស្សិតនៃសាកលវិទ្យាល័យភូមិន្ទភ្នំពេញផ្នែក គីមីវិទ្យា ក្រោមជំនួយពីធនាគារពិភពលោកបានធ្វើការស្រាវជ្រាវមួយទៅលើអយស្ទ័រ ដែលប្រជាជនយើងចូលចិត្តបរិភោគឆៅៗ។ ក្រុមនិស្សិត បានយកអយស្ទ័រពីប្រភពផ្សេងគ្នាយកមកធ្វើពិសោធ រួមមានអយស្ទ័រពីសមុទ្រពីផ្សារ និងពីភោជនីយដ្ឋាន។ និស្សិតស្រាវជ្រាវមួយក្រុមនេះដែលមាន កញ្ញាសឿ សូនីតា កញ្ញាផន សុខឃាន់ និងកញ្ញាឃាង ច័ន្ទថាវី បានពិសោធរកឃើញបាក់តេរី « Vibrio parahaemolyticus » នៅក្នុងអយស្ទ័រ ដែលជាចំណីអាហារពេញនិយមមួយបែបនាពេលបច្ចុប្បន្ន។
បើតាម កញ្ញាផន សុខឃាន់ សមាជិកម្នាក់នៃក្រុមស្រាវជ្រាវ បាក់តេរីប្រភេទនេះត្រូវបានរកឃើញជាយូរមកហើយនៅប្រទេស ជឿនលឿនមួយចំនួនដូចជាសហរដ្ឋអាមេរិកជាដើម ក៏ប៉ុន្តែបញ្ហានេះមិនត្រូវគេដឹងឮប៉ុន្មានទេនៅស្រុកខ្មែរ ពិសេសប្រជាពលរដ្ឋទូទៅ។ ហេតុនេះប្រជាជននាំគ្នាញ៉ាំអាហារនេះដោយមិនសូវបានខ្វាយខ្វល់ការពារ បាក់តេរីអ្វីនោះទេ។
សុខឃាន់ បានឲ្យដឹងថា ផលប៉ះពាល់របស់បាក់តេរីនេះគឺអាចបណ្ដាលឲ្យរាករូស ក្អួតចង្អោរ ឬរកកលចង់ក្អួត មានអាការក្ដៅ រងាជាដើម។
បើទោះបីជាអាហារប្រភេទនេះមិនប៉ះពាល់ដល់អាយុជីវិតដោយផ្ទាល់ ក៏ដោយចុះ តែប្រជាពលរដ្ឋក៏គួរយល់ដឹងពីបញ្ហាសុវត្ថិភាពរបស់ចំណីអាហារមួយ ចំនួនដែរ។ កញ្ញា សុខឃាន់ បានផ្តល់ជាយោបល់ថា ដើម្បីការពារកុំឲ្យឆ្លងបាក់តេរីនេះគឺត្រូវញ៉ាំអយស្ទ័រក៏ដូចជា អាហារសមុទ្រដទៃទៀត ដោយចម្អិនឲ្យបានឆ្អិនល្អ ទើបអាចរម្ងាប់មេរោគមួយនេះបាន។
លោក ឡេង វីរៈ បានលើកឡើងបន្តទៀតថា ការអនុវត្តច្បាប់ និងការចុះត្រួតពិនិត្យវាយតម្លៃលើគុណភាពចំណីអាហារនាំចូលហាក់ មិនសកម្មនៅឡើយ។ បើទោះបីជាគ្មានទិន្ន័យ និងការស្រាវជ្រាវណាមួយធ្វើឡើងឲ្យច្បាស់លាស់លើចំណីអាហារទូទៅ ក៏ដោយ លោក ឡេង វីរៈ អនុប្រធានប្រតិបត្តិនៃអង្គការទស្សនៈពិភពលោកកម្ពុជាយល់ឃើញថា ភ័ស្តុតាងមួយចំនួនដែលឃើញស្រាប់តាមរយៈការបង្ហោះតាមបណ្តាញសង្គម អាចបង្ហាញឲ្យដឹងថា អាហារហូបចុកក្នុងប្រទេសកម្ពុជាយើងមួយចំនួនកំពុងត្រូវបានគេដាក់ សារធាតុគីមី ហើយចែកចាយលក់ពេញទីផ្សារក្នុងប្រទេស ហើយអ្នកដែលរងឥទ្ធិពលខ្លាំងបំផុតនោះគឺប្រជាជនខ្មែរដែលក្រីក្រខ្វះ លទ្ធភាព ពិសេសគឺកុមារតូចៗ ហើយវានឹងធ្វើឲ្យធនធានមនុស្សក្នុងប្រទេសធ្លាក់ចុះ។
លោកពោលដូច្នេះថា៖ «បើរដ្ឋាភិបាលមិនយកចិត្តទុកដាក់ឲ្យខ្លាំងជាងនេះក្នុងការ ត្រួតពិនិត្យចំណីអាហារ និងផ្លែឈើនាំចូលទេ កម្ពុជាអាចនឹងប្រឈមនឹងយុទ្ធសាស្រ្តសម្លាប់មនុស្សរយៈពេលវែង»៕
ប្រភពពី ភ្នំពេញប៉ុស្តិ៍
