ខៀវ សុខារ៉ាវី ប្រកាសវិលចូលសិល្បៈ តែសុំលាក់ប្តីផ្កាយពីរ
ស្ងាត់ៗ
តារាសម្តែង ច្រៀងនាង ខៀវ សុខារ៉ាវី
បានចេញមុខជាថ្មីប្រកាសក្តែងៗកាលពីថ្ងៃ ទី១៩ កញ្ញា ឆ្នាំ២០១៤
នៅមុនថ្ងៃបុណ្យភ្ជុំបិណ្ឌថា
នាងបានសម្រេចចិត្តចូលខ្លួនមកបម្រើវិស័យសិល្បៈវិញហើយ។
ជាមួយគ្នានោះ ខៀវ សុខារ៉ាវី
ដែលធ្លាប់តែមាត់រឹងលាក់បាំងជុំវិញសម្ព័ន្ធភាពស្នេហានោះ
បានទទួលស្គាល់ថា នាងពិតជាមានកូនប្រុសម្នាក់មែន តែយ៉ាងណា
តារារូបនេះ សុំមិនបញ្ជាក់អំពីអត្តសញ្ញាណបុរសជាស្វាមី
ដែលគេដឹងថា ពាក់ផ្កាយពីរលើស្មានោះទេ។កាលពី ឆ្នាំ២០១០ គ្រួសាររបស់តារាចម្រៀង សម្តែង ខៀវ សុខារ៉ាវី បានធ្វើការអះអាងគួរឲ្យទុកចិត្តថា ខៀវ សុខារ៉ាវី បានរៀបការជាមួយបុរសខ្មែរសញ្ជាតិអាមេរិកនៅលើទឹកដីអាមេរិកហើយ ហើយក៏កំពុងរស់នៅយ៉ាងសុខសាន្តលើគំនរសុភមង្គលនៅអាមេរិកដែរ។ ប៉ុន្តែការអះអាងក្តែងៗរបស់អ្នកស្រី សារ៉េត ដែលជាម្តាយរបស់ ខៀវ សុខារ៉ាវី មិនបានប៉ុន្មានផង ក៏មានប្រភពព័ត៌មានពីអ្នកដែលមានទំនាក់ទំនងជិតស្និទ្ធនៅក្នុង សិល្បៈម្នាក់បានបង្ហើបឲ្យដឹងថា ព័ត៌មានដែលបានលើកឡើងថា ខៀវ សុខារ៉ាវី បានរៀបការនៅអាមេរិកនោះគ្រាន់តែជារឿងបន្លំភ្នែកបង្វែងដានពី មហាជនប៉ុណ្ណោះ។
ប្រភពនោះថែមទាំងបានបញ្ជាក់ទៀតថា សុខារ៉ាវី មិនបានទៅអាមេរិកដូចការអះអាងនោះទេ ពោលគឺនាងកំពុងរស់នៅជាមួយបុរសពាក់ផ្កាយពីរម្នាក់ ហើយថែមទាំងមានកូនប្រុសម្នាក់ទៀតផង ប៉ុន្តែទោះបីជាមានការអះអាងពីប្រភពច្បាស់ការណ៍យ៉ាងណា ក៏គ្រួសាររបស់ ខៀវ សុខារ៉ាវី នៅតែបដិសេធ។
រំលងផុតអស់រយៈពេលជិត ៤ឆ្នាំ ស្រាប់តែស្ងាត់ៗនៅពេលនេះ ខៀវ សុខារ៉ាវី បានចេញមុខជាផ្លូវការ ហើយបានប្រកាសក្តែងៗនៅមុខអ្នកសារព័ត៌មានជាច្រើននាក់ថា រូបនាងវិលមកកាន់សង្វៀនសិល្បៈវិញហើយ។ ការប្រកាសរបស់តារារូបនេះ នាំឲ្យមានការសង្ស័យថា ការវិលមកកាន់ពិភពសិល្បៈដ៏ស្រស់ឆើតឆាយរបស់តារារូបនេះ ទំនងដោយសារតែស្នេហារបស់នាងជាមួយបុរសពាក់ផ្កាយជ្រែកស្មាម្នាក់ នោះបានឈានដល់ផ្លូវបំបែក។
ប៉ុន្តែយ៉ាងណានៅក្នុងបទសម្ភាសផ្ទាល់តារាសម្តែងច្រៀងនាង ខៀវ សុខារ៉ាវី បានធ្វើការបដិសេធ ដោយនាងបានលើកឡើងថា ការវិលមកកាន់សង្វៀនសិល្បៈរបស់នាងនៅពេលនេះ ដោយសារតែនាងនៅតែស្រឡាញ់សិល្បៈ ស្របពេលដែលនាងក៏បានរួចដៃពីការចាត់ចែងការធ្វើជំនួញអស់ហើយ នោះ។
តារា
សម្តែងច្រៀងនាង ខៀវ សុខារ៉ាវី
និងកូនប្រុសក្នុងពេលដើរលេងរួមគ្នានៅប្រទេសថៃ
កាលពីពេលកន្លងមក។ រូបថត ហ្វេសប៊ុក ខៀវ សុខារ៉ាវី
ជាមួយនឹងការវិលត្រឡប់គួរឲ្យភ្ញាក់ផ្អើលនេះ តារាសម្តែងដែលធ្លាប់មានទំនាក់ទំនងស្នេហារង្គើសិល្បៈជាមួយនឹង តារាសម្តែង ស៊ុក សុភា ហៅ ខៀវ តែបែរជាបរាជ័យទៅវិញ នាង ខៀវ សុខារ៉ាវី ក៏សារភាពអំពីសម្ព័ន្ធភាពប្តីប្រពន្ធ និងកូនបច្ចុប្បន្នជាលើកដំបូងផងដែរ តែនាងបានបដិសេធមិនចង់បង្ហាញអត្តសញ្ញាណបុរសជាស្វាមីរបស់នាងនោះ ទេ។
សុខារ៉ាវី បាននិយាយថា៖ «ជាការពិតណាស់នៅពេលនេះ ខ្ញុំមានស្វាមី និងកូនប្រុសម្នាក់ កូនប្រុសខ្ញុំមានអាយុជិត ៤ឆ្នាំ ហើយ។ ដោយឡែករឿងប្តីអីនោះ ខ្ញុំអត់ទាន់ចង់បង្ហាញទេ សុំទុកជាអាថ៌កំបាំងសិន តែយ៉ាងណាក៏មិនអាចលាក់បាំងបានមួយជីវិតដែរ គ្រាន់តែពេលនេះ មិនទាន់ចង់និយាយទុកឲ្យទស្សនិកជនមានចម្ងល់សិនចុះ»។
ការលើកឡើងរបស់ ខៀវ សុខារ៉ាវី បានឲ្យដឹងថា បុរសជាស្វាមីរបស់នាងធ្លាប់មានប្រពន្ធកូនរួចមកហើយ តែមុននឹងនាងទទួលយកជាស្វាមីក៏ដោយសារតែនាងបានមើលឯកសារនៃការ លែងលះដាច់ស្រេចរបស់ស្វាមីរួចហើយ ទើបទុកចិត្ត។ តាមរយៈសម្តីរបស់ ខៀវ សុខារ៉ាវី គេបានដឹងថា ស្វាមីរបស់តារារូបនេះមិនមែនជាបុរសនៅអាមេរិកដូចម្តាយនាងអះអាង នោះទេ ពោលគឺជាបុរសដ៏មានឥទ្ធិពលម្នាក់នៅកម្ពុជា។
តារាស្រីសម្តីផ្អែមរូបនេះបាននិយាយថា៖ «ខ្ញុំនៅមិនទាន់មានគម្រោងរៀបការជាផ្លូវការនៅឡើយទេ គឺសុខចិត្តរស់នៅជាមួយគ្នាបែបអឺរ៉ុបសិនចុះ អ្វីដែលសំខាន់ គឺការស្រឡាញ់គ្នា»។
ដោយឡែកសម្រាប់ការវិលមកកាន់ពិភពសិល្បៈដ៏ស៊ីវិល័យនាពេលនេះ សុខារ៉ាវី បានឲ្យដឹងថា រូបនាងពិតជាមានការជឿជាក់ថា កេរ្តិ៍ឈ្មោះរបស់នាងនឹងអាចស្ទុះឡើងមិនចាញ់កាលពី ៤-៥ ឆ្នាំមុននោះទេ ហើយនាងក៏សប្បាយចិត្តដោយសារតែស្វាមីបើកទូលាយ។ រ៉ាវី បាននិយាយថា៖ «ខ្ញុំចូលខ្លួនបម្រើសិល្បៈវិញនៅពេលនេះ គឺមិនមែនចូលលេងៗទេ ខ្ញុំនឹងប្រឡូកម៉ាពេញចិត្តតែម្តង ព្រោះខ្ញុំក៏បានពិភាក្សាគ្នាជាមួយនឹងស្វាមីរួចហើយ»។
តារាសម្តែងច្រៀងរូបនេះបានបញ្ជាក់ថា៖ «ខ្ញុំត្រឡប់មកវិញជាមួយភាពជឿជាក់ និងប្រកបដោយថាមពល»៕
__________________________
ប្រភពព័ត៌មានពី៖ ខ្មែរប៉ុស្តិ៍
