បោសសម្អាតស កម្មភាពបូមខ្សាច់ អនាធិបតេយ្យ នៅតាមដងទន្លេមេគង្គលើ
កណ្តាល: លោក ជឹម សុខុម អភិបាលរងខេត្តកណ្តាល បានដឹកនាំគណៈកម្មការចម្រុះមួយក្រុម ចុះទៅបង្ក្រាប ចាប់សាឡង់ និងទូកដែលកំពុងធ្វើសកម្មភាពបូមខ្សាច់យ៉ាងអនាធិបតេយ្យ នៅតាមដងទន្លេមេគង្គលើ ស្ថិតនៅក្នុងស្រុកខ្សាច់កណ្តាល និងស្រុកមុខកំពូល ខេត្តកណ្តាល ។
ប្រតិបត្តការនេះ ធ្វើឡើងរយៈពេលពេញមួយថ្ងៃទី១៧ ខែកញ្ញា ឆ្នាំ២០១៤ ដោយបានការចូលរួមពីលោកប្រធានមន្ទីររ៉ែ និងថាមពលខេត្ត ប្រធានមន្ទីរធនធានទឹក នាយកទីចាត់ការអន្តរវិស័យខេត្ត ប្រធានមន្ទីរបរិស្ថានខេត្ត និងសមត្ថកិច្ចប្រដាប់អាវុធ ស្រុកមុខកំពូល និងស្រុកខ្សាច់កណ្តាលផងដែរ។ ជាលទ្ធផលគណៈកម្មការចម្រុះ បានបង្ក្រាប រឹបអូសសាឡង់ និងទូកបូមខ្សាច់ចំនួនជាង១០គ្រឿង ប្រមូលយកទៅរក្សាទុកដើម្បីត្រួតពិនិត្យរកអាជ្ញាប័ណ្ណធ្វើអាជីវកម្ម ឲ្យបានត្រឹមត្រូវ ។
លោក ជឹម សុខុន អភិបាលរងខេត្តកណ្តាល មានប្រសាសន៍លើកឡើងថា បញ្ហាលើបាតុភាពបូមខ្សាច់គ្មានច្បាប់អនុញ្ញាតក្នុងតំបន់នេះ ជារឿងស្មុគ្រស្មាញមួយដែលអាជ្ញាធរខេត្តកណ្តាលបានយកចិត្តទុកដាក់ខ្ពស់ ដើម្បីកុំឲ្យការធ្វើអាជីវកម្មខុសបែបបទបច្ចេកទេស ឈានទៅបង្កហានិភ័យផ្សេងៗ ដូចជាការបាក់ច្រាំងទន្លេ ជាពិសេសបានបំផ្លាញផលដំណាំ ដីចម្ការនិងផ្ទះសម្បែងប្រជាពលរដ្ឋជាយថាហេតុ ហើយក្នុងនាមអាជ្ញាធរខេត្ត យើងមិនធ្វើការប្រងើយកន្តើយចំពោះអ្វីដែលក្រុមហ៊ុនមិនអនុវត្តឲ្យបានត្រឹមត្រូវតាមច្បាប់ គឺមិនអនុញ្ញាតឲ្យឡើយ ។
ក្នុងប្រតិបត្តិការរបស់គណៈកម្មការ បានប្រើប្រាស់ទូកម៉ាស៊ីនចំនួន២គ្រឿង ចេញដំណើរពីវត្តគៀនឃ្លាំង សង្កាត់ព្រែកលាភ ឆ្ពោះទៅតាមដងទន្លេមេគង្គលើ ធ្វើដំណើរដល់ចំណុចចុងកោះឧកញ៉ាតី និងភូមិសាស្ត្រកន្ទុយកោះតាង ឃុំព្រែកលួង បានចាប់ឃាត់ទូកបំពាក់ក្បាលបូមចំនួន ២គ្រឿង, សាឡង់ដឹកខ្សាច់ចំនួន ៣គ្រឿង ដែលជាកម្មសិទ្ធិរបស់ក្រុមហ៊ុន សោម រស្មី។ នៅចំណុចឃុំពុកឬស្សីឃាត់បានសាឡង់ធន់ធំមានក្រចាប់ចាប់ខ្សាច់ខ្នាត់ធំចំនួន ១គ្រឿង ទូកបូមខ្សាច់១គ្រឿង ជាកម្មសិទ្ធិក្រុមហ៊ុន សូគីម៉ិច។ ត្រង់ចំណុចកោះចូរ៉ាមឃាត់បានក្បាលបូមខ្សាច់ ១គ្រឿង និងសាឡង់បូមខ្សាច់ចំនួន ១គ្រឿង និងនៅចំណុចភូមិព្រែកអំពិល ឃ៉ុំព្រែកអំពិល បានឃាត់ទូកបំពាក់ក្បាលបូម ចំនួន ១គ្រឿង សាឡង់ដឹកខ្សាច់ចំនួន ៣គ្រឿង និងទូកដឹកខ្សាច់ ១គ្រឿងទៀត។
លោក ជឹម សុខុន អភិបាលរងខេត្តកណ្តាល មានប្រសាសន៍បញ្ជាក់ថា សាឡង់ និងទូកបូមខ្សាច់ របស់ក្រុមហ៊ុនទាំងអស់ខាងលើ ដែលគណៈកម្មការចម្រុះធ្វើការបង្ក្រាបនេះ មួយចំនួនតូចមានច្បាប់ និងខ្លះទៀតគ្មានច្បាប់ធ្វើអាជីវកម្មទេ ប៉ុន្តែ ក្រុមហ៊ុនដែលមានអាជ្ញាប័ណ្ណ ក៏ច្បាប់របស់គេហួសសុពលភាពអស់ដែរ ។ ដូច្នេះអាជ្ញាធរសម្រេចឃាត់ទុក និងហៅម្ចាស់មធ្យោបាយធ្វើអាជីវកម្មទាំងអស់នោះឲ្យចូលខ្លួនមកធ្វើកិច្ចសន្យាបញ្ឈប់ការធ្វើអាជីវកម្មបូមខ្សាច់ រហូតដល់ទទួលបានច្បាប់អនុញ្ញាតពីក្រសួង ទើបអាចឲ្យប្រកបអាជីវកម្មវិញបាន។
បើតាមលោក ចក់ គង់ ប្រធានមន្ទីររ៉ែ និងថាមពលខេត្តកណ្តាល បានឲ្យដឹងថា រាល់អាជីវកម្មបូមខ្សាច់ ត្រូវធ្វើច្បាប់ ក្នុងរយៈពេលពីរឆ្នាំម្តង ហើយការពិនិត្យ បច្ចេកទេស និងអនុញ្ញាតឲ្យ គឺជាសមត្ថកិច្ចរបស់ក្រសួងធនធានទឹក ។ លោកប្រធានមន្ទីររ៉ែ និងថាមពលខេត្ត បន្ថែមថា រាល់អាជីវកម្មបូមខ្សាច់ទន្លេ ក្នុងខេត្តកណ្តាល រាជរដ្ឋាភិបាលបានបិទទាំងអស់ ដូច្នេះសកម្មភាពបូមខ្សាច់លួចលាក់ គឺជាការខុសច្បាប់អនុញ្ញាតហើយ៕L
ប្រភពពី CEN
