ការ​ប្រឡង​បវរកញ្ញា​ហុងកុង ឆ្នាំ​២០១៤ ដែល​រៀប​ចំ​ដោយ​ស្ថានីយ​ទូរទស្សន៍ TVB បាន​បញ្ចប់​ហើយ កាល​ពី​ថ្ងៃ​ទី​៣១ ខែ​សីហា ម្សិលមិញ​នេះ ដែល​ក្នុង​នោះ​តំណែង​បវរកញ្ញា​លេខ​១ បាន​ទៅ​លើ​បេក្ខនារី ពាក់​ស្លាក​លេខ ១៥ ឈ្មោះVeronica Shiu។ Veronica​ទទួល​បាន​ការ​បោះឆ្នោត​ចំនួន ១៥៦ ១៩១​សំឡេង។ ចំណាត់​ថ្នាក់​លេខ​២ គឺ​បេក្ខនារី ពាក់​ស្លាក​លេខ ៩ ឈ្មោះ Erin Wong ដែល​ទទួល​បាន​ការ​បោះឆ្នោត ២៨ ៨២៤​សំឡេង និង​លេខ​៣ គឺ​បេក្ខនារី ពាក់​ស្លាក​លេខ​៧ Katherine Ho ទទួល​បាន​ការ​បោះឆ្នោត ២៤ ៩០៣។ ជយលាភី​ទាំង ៣​ត្រូវ​បាន​ជ្រើសរើស​ ដោយ​ផ្អែក​លើ​ការ​បូក​បញ្ចូល​សំឡេង​ឆ្នោត​ពី​ទស្សនិកជន និង​ការ​ផ្ដល់​ពិន្ទុ​ពី​គណៈកម្មការ។
ទស្សនា​ខាង​ក្រោម​នេះ​មើល៍ ថា​តើ​ពួក​គេ​មាន​សម្រស់​ទាក់ទាញ​ប៉ុណ្ណា​ដែរ?
ជយ​លាភី​លេខ​១ Veronica Shiu
អំពី ​បទ​ពិសោធន៍​ក្នុង​ការ​ប្រកួត​បវរកញ្ញា Veronica Shiu ធ្លាប់​ទទួល​បាន​ជយលាភី​លេខ ២​ក្នុង​កម្មវិធី​បវរកញ្ញា​ចិន Vancouver ​ឆ្នាំ​២០១២។ បេក្ខនារី​ជា​និស្សិត​វ័យ ២៤​ឆ្នាំ​ដែល​មាន​បំណង​ចង់​ក្លាយ​ជា​តារា​សម្ដែង​ជើង​ខ្លាំង​មួយ​រូប​នេះ បាន​ទាក់​ចិត្ត​គណៈកម្មការ​តាម​រយៈ​សមត្ថភាព​រាំ និង​សម្រស់​ដ៏​ផូរផង់​របស់​នាង។ នាង​មាន​កម្ពស់ ១,៦៧​ម៉ែត្រ និង​ទម្ងន់ ៥០,៨​គីឡូក្រាម។​ ក្រៅ​ពី​ទទួល​តំណែង​លេខ​១ Vironica ទទួល​បាន​ពាន​រង្វាន់​ជា​បវរកញ្ញា​រូប​ថត និង​បវរកញ្ញា​ប្រជាប្រិយ។
ជយលាភី​លេខ​២ Erin Wong
Erin Wong គឺ​ជា​និស្សិត​ថ្នាក់​អនុបណ្ឌិត វ័យ ២៣​ឆ្នាំ ដែល​មាន​ក្ដី​ស្រមៃ​ចង់​ក្លាយ​ជា​នារី​លេចធ្លោ​ម្នាក់​ក្នុង​សង្គម។ ត្បិត​តែ​មាន​កម្ពស់ ១,៧០​ម៉ែត្រ ប៉ុន្តែ Erin មាន​ទម្ងន់​ត្រឹម​តែ ៤៣,៥​គីឡូក្រាម​ ប៉ុណ្ណោះ។នៅ​ពេល​ទំនេរ នាង​ចូល​ចិត្ត​ច្រៀង រាំ​ចង្វាក់ Latin, ចម្អិន​ម្ហូប និង​ដើរ​កម្សាន្ត។
ជយលាភី​លេខ​៣ Katherine Ho
Katherine Ho គឺ​ជា​និស្សិត​ផ្នែក​ច្បាប់​វ័យ ២២ឆ្នាំ ដែល​មាន​ក្ដី​ស្រមៃ​ចង់​ក្លាយ​ជា​បុគ្គល​ជោគជ័យ​ម្នាក់ ដែល​អាច​បម្រើ​សង្គម​ជាតិ​បាន។ មាន​កម្ពស់ ១,៦៧​ម៉ែត្រ និង​ទម្ងន់ ៤៣,៥​គីឡូក្រាម Katherine បាន​ធ្វើ​ឲ្យ​គណៈកម្មការ​ស្ងើច​សរសើរ​ចំពោះ​ប្រវត្តិ​នៃ​ការ​សិក្សា​របស់​ នាង រួម​ទាំង​កាយវិការ​ដ៏​រស់​រវើក​របស់​នាង​នៅ​ពេល​សម្ដែង​លើ​ឆាក។
ម៉េច​ដែរ មើល​ទៅ​លេខ​១ លេខ​២ ឬ​លេខ​៣ ដែល​ប្រិយមិត្ត​ពេញ​ចិត្ត​ជាង​គេ?

ប្រែ​សម្រួល៖ វ៉ាន់ថន
ប្រភព៖jaynestars