ស្តាប់ប្រតិកម្មអ្នក នយោបាយ ជុំវិញករណីលោកស្រី មូរ សុខហួរ និងលោក យឹម សុវណ្ណ ធ្លាក់ឆ្នោត នៅរដ្ឋសភា
ភ្នំពេញ: លោក
សមរង្ស៊ី និងលោក ឈាងវុន បានបញ្ចេញប្រតិកម្មរៀងៗខ្លួន
បន្ទាប់ពីលោកស្រី មូរ សុខហួរ និងលោកយឹមសុវណ្ណ
អ្នកតំណាងរាស្ត្រគណបក្សសង្គ្រោះជាតិ មិនបានជាប់ឆ្នោត
ក្លាយជាប្រធានគណៈកម្មការទី៨ និងគណៈកម្មការទី១០ របស់រដ្ឋសភា
កាលពីព្រឹកថ្ងៃពុធ ទី២៧សីហានេះ។តាមលោកសមរង្ស៊ី ការធ្លាក់ឆ្នោតនោះ មកពីគណបក្សប្រជាជនកម្ពុជា មិនបានអនុវត្តឲ្យបានពេញលេញតាមស្មារតីកិច្ចព្រមព្រៀង ថ្ងៃ២២កក្កដា។ ប៉ុន្តែលោកឈាងវុន អះអាងថា គណបក្សប្រជាជនកម្ពុជា បានគោរពត្រឹមត្រូវ ហើយថា ការធ្លាក់ឆ្នោតរបស់លោកយឹមសុវណ្ណ និងលោកស្រី មូរសុខហួរ ជារឿងធម្មតា ក្នុងលទ្ធិប្រជាធិបតេយ្យ។
ឆ្លងតាមការបោះឆ្នោតនៅរដ្ឋសភា នាព្រឹកថ្ងៃទី២៧សីហានេះ លោកស្រី មូរ សុខហួរ និងលោក យឹម សុវណ្ណ អ្នកតំណាងរាស្ត្ររបស់គណបក្សសង្គ្រោះជាតិ មិនបានជាប់ឆ្នោត ដើម្បីក្លាយជាប្រធានគណៈកម្មការទី៨ និងគណៈកម្មការទី១០ របស់រដ្ឋសភានោះទេ។
សម្រាប់គណៈកម្មការ ទី៨ គឺលោកស្រី កែ សុវណ្ណរ័ត្ន អ្នកតំណាងរាស្ត្រគណបក្សសង្គ្រោះជាតិ ឡើងជាប្រធាន ជំនួសលោកស្រី មូរ សុខហួរ ដែលធ្លាក់ឆ្នោត។ ចំណែកគណៈកម្មការទី១០ គឺលោក ហូរ វ៉ាន់ ឡើងជាប្រធាន ជំនួសលោក យឹម សុវណ្ណ ដែលធ្លាក់ឆ្នោត។
លទ្ធផលបោះឆ្នោត កាលពីព្រឹកថ្ងៃទី២៧សីហា លោកស្រី មូរ សុខហួរ ទទួលបានសំឡេងយល់ព្រមត្រឹមតែ ៥៦ សំឡេង មិនព្រម ៦៣ សំឡេង និងអនុបវាទ ៣ សំឡេង។ រីឯលោក យឹម សុវណ្ណ ទទួលបានសំឡេងយល់ព្រម ៥៦ សំឡេង មិនព្រម ៦២ សំឡេង និងអនុបវាទ ៣ សំឡេង ហើយមោឃៈ ១ សំឡេង។
យ៉ាងណាក៏ដោយ ក្នុងកិច្ចប្រជុំរដ្ឋសភា កាលពីព្រឹកថ្ងៃទី២៧សីហា មានអ្នកតំណាងរាស្ត្រសរុប ១២២ រូប បានចូលរួមប្រជុំ។ ក្នុងនោះ អ្នកតំណាងរាស្ត្រគណបក្សសង្គ្រោះជាតិ មានចំនួន ៥៥ រូប និងគណបក្សសង្គ្រោះជាតិ មាន ៦៧ រូប។
បន្ទាប់ពីចប់កិច្ចប្រជុំរដ្ឋសភា កាលពីរសៀលថ្ងៃពុធ លោកសមរង្ស៊ី បានថ្លែងទៅកាន់ក្រុមអ្នកកាសែត ដោយលោកស្តាយនឹងការរអាក់រអ៊ួលបន្តិចបន្តួច ដោយសារតែកិច្ចព្រមព្រៀងនយោបាយ មិនបានអនុវត្តន៍ឲ្យបានពេញលេញ។ តែលោកថា មានការសម្របសម្រួល ដើម្បីឲ្យរដ្ឋសភា ដំណើរការ និងឈានបញ្ចប់ការងារដ៏សំខាន់លើវិសោធនកម្មរដ្ឋធម្មនុញ្ញ ច្បាប់បោះឆ្នោត និងការជ្រើសរើសសមាជិកគជបថ្មី ជាដើម។
លោកសមរង្ស៊ី បានបញ្ជាក់ថា “យើងខិតខំប្រឹងប្រែងរក្សាស្មារតីកិច្ចព្រមព្រៀង។ គណបក្សសង្គ្រោះជាតិ គោរពស្មារតី ១០០%។ យើងទទូចសូមឲ្យគណបក្សជាដៃគូគោរព ១០០% ដែរ។ ថ្ងៃនេះ យើងបានបំពេញសុឆន្ទៈ។ ការមិនបោះឆ្នោតនោះ មកពីគណបក្សប្រជាជនកម្ពុជា មិនបោះឆ្នោតគាំទ្រយើង។ គណបក្សសង្គ្រោះជាតិ បានគាំទ្របេក្ខជនរបស់ខ្លួន”។
យ៉ាងណាក៏ដោយ លោកសមរង្ស៊ី បានបញ្ជាក់ថា ការជ្រើសតាំងអ្នកតំណាងរាស្ត្រពីររូប លោកហូរវ៉ាន់ និងលោកស្រី កែ សុវណ្ណរ័ត្ន ជាប្រធានគណៈកម្មការ ជំនួយលោកស្រី មូរ សុខហួរ និងលោក យឹមសុវណ្ណ ដូច្នេះ ជាបណ្តោះអាសន្នទេ។ ការធ្វើដូច្នេះ ដើម្បីឲ្យដំណើរការរដ្ឋសភាទៅមុខ តែយើងនឹងទាមទារដើម្បីឲ្យធ្វើយ៉ាងណាឲ្យអនុវត្តបានត្រឹមត្រូវពេញលេញ នូវអ្វីដែលយើងបានគ្រោងទុកពីដើមទី។
ចំណែកលោក ឈាង វុន សមាជិករដ្ឋសភាគណបក្សប្រជាជនកម្ពុជា និងជាអ្នកនាំពាក្យរដ្ឋសភា បានចាត់ទុកការធ្លាក់ឆ្នោតរបស់លោកស្រីមូរសុខហួរ និងលោកយឹមសុវណ្ណ ថា ជារឿងធម្មតា នៅក្នុងលទ្ធិប្រជាធិបតេយ្យ ហើយការធ្លាក់ឆ្នោតនោះ មកពីមនុស្សនោះ គេមិនពេញចិត្ត។
លោក ឈាង វុន បានបញ្ជាក់ថា ការមិនជាប់ឆ្នោតនោះ មិនមែនមកពីគណបក្សប្រជាជនកម្ពុជា ខ្លាចលោកយឹមសុវណ្ណ ឬលោកស្រីមូរសុខហួរទេ ហើយគណបក្សប្រជាជនកម្ពុជា ក៏មិនមែនមិនពេញចិត្តលើអ្នកតំណាងរាស្ត្រទាំងពីរនោះដែរ។
លោក ឈាង វុន បានបញ្ជាក់ថា “… មិនមែនគណបក្សប្រជាជន មិនពេញចិត្តទេ។ ខ្ញុំនិយាយច្បាស់ហើយ។ អ្នកដែលមិនបោះឆ្នោតឲ្យ មិនមែនមានតែគណបក្សប្រជាជនទេ។ មានគ្នាគាត់ដែរ។ មានគណបក្សសង្គ្រោះជាតិដែរ។ និយាយហើយ និយាយទៀត។ ខ្ញុំមានទៅឆែកអីសំបុត្ររបស់គេ ហើយបើគេមិនពេញចិត្ត ខ្ញុំក៏មានសិទ្ធិអីទៅសួរគេ រឿងអីបានជាមិនពេញចិត្តជាមួយគាត់? អានឹងលែងជារឿងនយោបាយហើយ។ ( សំណួរអ្នកកាសែត៖ ចុះចំពោះឯកឧត្តមផ្ទាល់? ) ចំពោះខ្ញុំ ខ្ញុំបោះឲ្យតើ!”។
យ៉ាងណាក៏ដោយ លោក យឹម សុវណ្ណ ដែលធ្លាក់ការបោះឆ្នោត បានប្រាប់ក្រុមអ្នកកាសែត បន្ទាប់ពីចេញពីកិច្ចប្រជុំរដ្ឋសភាថា លោកសប្បាយចិត្ត ហើយខិតខំបំពេញកាតព្វកិច្ចរបស់ខ្លួន នៅរដ្ឋសភា។
លោក យឹម សុវណ្ណ បានបញ្ជាក់ថា “ខ្ញុំខិតខំធ្វើម៉េច ដើម្បីអនុវត្តកិច្ចព្រមព្រៀងប្រកបដោយសេចក្តីថ្លៃថ្នូរ។ មនុស្សកាលណានិយាយ យើងត្រូវគោរពពាក្យសំដីរបស់យើងឲ្យបានថ្លៃថ្នូរ។ ទោះបីជាយ៉ាងណាក៏ដោយ ខ្ញុំបានគោរព និងអនុវត្តនូវកិច្ចព្រមព្រៀង ប្រកបដោយសុច្ចរិតភាព តម្លាភាព និងការទទួលខុសត្រូវ”៕
ប្រភពពី CEN
