មេបញ្ជាការកងទ័ព អាមេរិកប្រចាំតំបន់ អាស៊ីប៉ាស៊ីហ្វិក បំពេញទស្សនកិច្ចរយៈ ពេល២ថ្ងៃ នៅកម្ពុជា
រាជធានីភ្នំពេញ៖ មេបញ្ជាការ
កងទ័ពអាមេរិកប្រចាំតំបន់អាស៊ីប៉ាស៊ីហ្វិក
បានមកបំពេញទស្សនកិច្ចរយៈពេល២ថ្ងៃនៅប្រទេសកម្ពុជា ក្នុងបំណងពង្រឹង
និងពង្រីកកិច្ចសហប្រតិបត្តិការរវាងកងទ័ពនៃប្រទេសទាំងពីរ។នេះបើតាម
ការឲ្យដឹងពីមេបញ្ជាការកងទ័ពជើងគោក។
លោកនាយឧត្តមសេនីយ៍ មាស សុភា
អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក
បានប្រាប់ក្រុមអ្នកសារព័ត៌មាន ក្រោយពីជំនួបជាមួយលោកឧត្តមសេនីយ៍
វិនសិន ប្រ៊ុក កាលពីព្រឹកថ្ងៃទី២០ ខែសីហា ឆ្នាំ២០១៤ ថា
ដំណើរទស្សនកិច្ចរបស់លោកឧត្តមសេនីយ៍ វិនសិន ប្រ៊ុក នាពេលនេះ
គឺធ្វើឡើងទៅតាមការអញ្ជើញរបស់នាយឧត្តមសេនីយ៍ ហើយគោលបំណងទី១
គឺដើម្បីរឹតចំណងមិត្តភាព សាមគ្គីភាព រវាងកងទ័ពទាំងពីរ
ទី២ដើម្បីពង្រឹង
និងពង្រីកកិច្ចសហប្រតិបត្តិការវាងកងទ័ពនៃប្រទេសទាំងពីរដែលបាន
អនុវត្តរយៈពេលកន្លងមកដូចជាការប្រឆាំងភេរវកម្ម ដោះមីន
និងកាងារផ្សេងៗមួយចំនួនទៀត ជាពិសេសលើការងារ
ដែលអាមេរិកបានឧបត្ថម្ភដល់កម្ពុជា។ ម្យ៉ាងទៀត
ដើម្បីទស្សនកិច្ចឲ្យយល់ពីប្រជាជននៃប្រទេសកម្ពុជាផង
និងដើម្បីបង្កើនកិច្ចសហប្រតិបត្តិការបន្តទៀតផងដែរ។
លោកនាយឧត្តមសេនីយ៍ មាស សុភា
បានបញ្ជាក់ដែរថា យើងក៏មិនមានអ្វីក្រៅពីកិច្ចសហប្រតិបត្តិការនោះដែរ
គឺការជួយហ្វឹកហ្វឺនកងយោធពលខេមរភូមិន្ទយើងបន្តទៀត
ហើយអ្វីដែលថ្មីគឺមានបន្ថែមមុខវិជ្ជាមួយចំនួនថែមទៀតដូចជា
ផ្នែកសុខាភិបាល ផ្នែកវិស្វកម្ម និងការងារគ្រោះមហន្តរាយ ជាដើម។
ទាក់ទងទៅនឹងសំណួររបស់អ្នកសារព័ត៌មាន
លើជំនួយរបស់អាមេរិក សម្រាប់កងទ័ពកម្ពុជា
ត្រូវបានលោកនាយឧត្តមសេនីយ៍ មាស សុភា បានបញ្ជាក់ថា
មិនច្បាស់ទេ ហើយចំពោះទំនាក់ទំនងជាមួយប្រទេសណាមួយនៅលើពិភពលោកនោះ
នាយឧត្តមសេនីយ៍បានបញ្ជាក់ថា
ប្រទេសកម្ពុជាបានប្រកាន់យកនូវនយោបាយអព្យាក្រឹត
ដូច្នេះត្រូវតែមានទំនាក់ទំនងនៅគ្រប់ប្រទេសទាំងអស់
ដែលសូម្បីតែសហរដ្ឋអាមេរិក ដែលជាប្រទេសមហាអំណាចក៏ដោយ
ក៏កម្ពុជាយើងមានទំនាក់ទំនងល្អជាធម្មតា៕
ប្រភពពី Free Press Magazine
