ហេង ផាន់ណា លោកតា ឲ្យប្ដូរឈ្មោះយកហុងស៊ុយ
ពិធីការិនីទូរទស្សន៍បាយ័ន កញ្ញា ហេង ផាន់ណា
បានសម្រេចប្តូរពីឈ្មោះដើមដែលធ្លាប់មានគេស្គាល់ ទៅជាឈ្មោះ ហេង
កែវនីតា វិញតាមការបង្គាប់របស់លោកតារបស់នាង ដើម្បីលើករាសី។“លោក តាខ្ញុំឲ្យដូរ ខ្ញុំក៏ដូរតាមគាត់ទៅ គឺដូរជិត១ឆ្នាំហើយតើបង…គាត់ថា ផាន់ណា ជាឈ្មោះមនុស្សប្រុស អត់សូវល្អទេ អីចឹងឲ្យរកឈ្មោះថ្មីមកជំនួស ខ្ញុំក៏ដាក់ ហេង កែវនីតា វិញទៅ!”។
នៅក្នុងសិល្បៈមានសិល្បការិនីជាច្រើនមាន ឈ្មោះ “នីតា” ដូចជា សូដា នីតា រ៉ា សូនីតា មាន សូនីតា និងម៉ាក សែនសូនីតាជាដើម។ ប៉ុន្តែកញ្ញា ផាន់ណា ឬ កែវនីតា បញ្ជាក់ថា នាងផ្លាស់ប្តូរឈ្មោះមិនធ្វើតាមនរណាទេ គឺដើម្បីហ៊ុងសុយ ឬលើករាសី។ “ឈ្មោះចាស់ មានឧបសគ្គច្រើន តែក្រោយដូរហើយ ឃើញថា ការងាររីកចម្រើនខ្លះៗមែនបង!”។ នីតា បញ្ជាក់។
ពិធីការិនីរូប នេះ មិនបានអធិប្បាយលម្អិតទេ ពាក់ព័ន្ធថាការងារអ្វីខ្លះដែលនាងទទួលបានបញ្ជាក់ពីការរីក ចម្រើន។ ប៉ុន្តែថា បច្ចុប្បន្ននាងកំពុងកាន់តំណែងជាពិធីការិនីក្នុងកម្មវិធីផ្សាយ ផ្ទាល់ចំនួនពីរនៅទូរទស្សន៍បាយ័ន និងបាយ័ន BTV ។ ក្រៅពីនេះ នាងធ្វើការងារខាងក្រៅដូចជា ធ្វើពិធីការិនីតាមកម្មវិធីឯកជននានា រួមទាំងការងារថតស្ប៉តពាណិជ្ជកម្មមួយចំនួនផង។
បើ ទោះឈ្មោះបានដូរទៅហើយក្ដី តែអតីតពិធីការិនីទូរទស្សន៍ប៉ុស្តិ៍លេខ៣រូបនេះ ប្រាប់ថា មកទល់ពេលនេះ ឈ្មោះចាស់របស់នាង នៅតែត្រូវបានគេហៅដដែល។ “គេនៅតែហៅ អ្នកធ្លាប់ស្គាល់យើងពីមុនគេនៅតែហៅ ហើយអ្នកដែលដឹងថាយើងដូរ ក៏ហៅថា “នីតា” ទៅ និយាយរួមគេនៅតែហៅឈ្មោះទាំងពីរហ្នឹង! ហើយអត់បញ្ហាអីទេ នរណាចង់ហៅម៉េច ក៏ហៅទៅបង”។
យ៉ាងណាកញ្ញា បញ្ជាក់ជាចុងក្រោយថា ឈ្មោះ “ផាន់ណា” នៅតែជាឈ្មោះដើម(ឈ្មោះក្នុងបញ្ជីជាតិ)របស់នាង ឯ “នីតា” គ្រាន់តែជាឈ្មោះក្នុងសិល្បៈប៉ុណ្ណោះ៕
អត្ថបទ៖ ទារិកា
