កម្លាំងកងរាជអាវុធ ហត្ថខេត្តកំពត រកឃើញរួចបំផ្លាញកញ្ឆាពីរចម្ការ
កំពត: កម្លាំង
កងរាជអាវុធហត្ថខេត្ត កាលពីល្ងាចថ្ងៃទី២៩ខែសីហាឆ្នាំ២០១៤
បានចុះដល់គោលដៅ
រកឃើញរួចបំផ្លាញដំណាំកញ្ឆាពីរចម្ការដែលមានបរិមាណជាងប្រាំរយដើម
លើ កំពូលភ្នំមួយស្ថិតក្នុងឃុំស្ទឹងកែវ ស្រុកទឹកឈូ
ក្រោយទទួលព័ត៌មានពីប្រភពច្បាស់ការណ៍។លោក សែម សឿន មេបញ្ជាការរងកងរាជអាវុធហត្ថខេត្តបានរៀបរាប់ឱ្យដឹងថា ក្រោយទទួលព័ត៌មានពីប្រភពស៊ើបការណ៍សម្ងាត់ នៅល្ងាចថ្ងៃទី២៩ ខែសីហា ឆ្នាំ២០១៤ លោកបានដឹកនាំកម្លាំងឆ្ពោះទៅភ្នំអូរក្រូចក្នុងភូមិសាស្ត្រភូមិ ត្រពាំងកក់ ឃុំស្ទឹងកែវ ស្រុកទឹកឈូ ដោយនៅទីនោះ សមត្ថកិច្ចរកឃើញដំណាំកញ្ឆាពីរចម្ការស្ថិតឃ្លាតពីគ្នាប្រមាណប្រហែល ៥០ ម៉ែត្រ ប៉ុន្តែមិនឃើញមានម្ចាស់ទេ។
លោកបញ្ជាក់ឱ្យដឹងថា ក្រោយពីដករួចរាល់ ចម្ការទីមួយមានកញ្ឆា ចំនួន ២៥០ ដើម និងចម្ការទីពីរ មាន ២៧៣ ដើម។
លោក សែម សឿន បានបន្តទៀតថា ព្រោះតែមានភាពលំបាកក្នុងការដឹកជញ្ជូនចុះពីភ្នំ ទើបសមត្ថកិច្ចសូមការអនុញ្ញាតពីលោកព្រះរាជអាជ្ញាអមសាលាដំបូងខេត្ត ដុតកម្ទេចចោលនៅទីតាំងផ្ទាល់តែម្តង៕
