លោក ហ៊ុន សែន ក្រោកឈរ២ដងក្នុងសភា ស្នើឲ្យផ្លាស់ប្តូរកៅអីអង្គុយរបស់លោក ងួន ញ៉ិល និងលោក កឹម
លោកនាយក
រដ្ឋមន្ត្រី ហ៊ុន សែន នៅព្រឹកថ្ងៃអង្គារនេះ បានក្រោកឈរភ្លាមៗ
ដោយស្នើឲ្យមានការផ្លាស់ប្តូរកៅអីគ្នាអង្គុយរវាងលោក ងួន ញ៉ិល
អនុប្រធានទី២នៃរដ្ឋសភា និងលោក កឹម សុខា អនុប្រធានទី១នៃរដ្ឋសភា
ដើម្បីឲ្យត្រូវរចនាសម្ព័ន្ធនៃការអង្គុយ។
ក្រោយពេលបោះឆ្នោតជ្រើសតាំងអនុប្រធាន
ទាំងពីរនៃរដ្ឋសភា ប្រធានរដ្ឋសភា ហេង សំរិន ប្រកាសឲ្យលោក កឹម សុខា
ឡើងមកអង្គុយនៅលើកៅអីតាមរចនាសម្ព័ន្ធ លោក កឹម សុខា
បានឡើងមកអង្គុយនៅខាងធ្វេងរបស់លោក ហេង សំរិន
ដែលនេះខុសរចនាសម្ព័ន្ធជាអនុប្រធានទី១
ត្រូវអង្គុយនៅខាងស្តាំដៃលោក ហេង សំរិន។ លោក ងួន ញ៉ិល
បានអង្គុយនៅខាងស្តាំដៃរបស់លោក ហេង សំរិន។
ជាការសម្រួលកិច្ចការនេះ
លោកនាយករដ្ឋមន្ត្រី ហ៊ុន សែន បានក្រោកឈរឡើងលើកទីមួយ
និងស្នើឲ្យមានការផ្លាស់ប្តូរភ្លាមៗ តែលោក ហេង សំរិន លើកឡើងថា«គេដាក់សិន គេដាក់បណ្តោះអាសន្នសិន ដើម្បីគណៈកម្មការ គេចាំនីតិវិធីគេរៀបចំក្រោយ»។ប៉ុន្តែលោក ហ៊ុន សែន បន្តស្នើ ហើយលោក ហេង សំរិន លើកឡើងថា «អញ្ចឹងក៏បាន តាមនីតិវិធីគេតិច គេណែនាំ តែឥឡូវយើងសម្រេចអញ្ចឹងទៅ»។
តែនៅពេលនោះ
មានការពិភាក្សាគ្នាថាតើនឹងត្រូវធ្វើការផ្លាស់ប្តូរយ៉ាងម៉េច
ដោយសារតែស្លាកឈ្មោះខុសគ្នាតាមកៅអី។ លោក ហ៊ុន សែន
បានបក្រោយឈរម្តងទៀត ដោយនិយាយឮតាមមេក្រូថា«បើមិនដូរទេ
ទាល់តែដោះផ្លាក(ស្លាក)ហ្នឹងចេញបានបាន
គ្រាន់តែដើរទៅមួយភ្លែតទៅមានទាស់ខុសអី។សូមអញ្ជើញឯកឧត្តមងួន
ញ៉ិលទៅខាងណោះ»។
បន្ទាប់មកមានការពិភាក្សាពីការដកស្លាកនេះចេញ។លោក ហ៊ុន សែន មានប្រសាសន៍បន្តថា«
ទេ វាអត់ត្រូវ សុំទោស! គ្រាន់តែប៉ុណ្ណឹង អីក៏វាពិបាកម្លេះ
បើគ្រាន់តែមួយដើរទៅអង្គុយខាងនោះ មួយដើរទៅអង្គុយខាងនេះ
អត់មានអីពិបាកម៉ាតិចសោះ»។
បន្ទាប់ពីការលើកឡើងនេះ
ក៏មានការផ្លាស់ប្តូរកៅអីគ្នារវាងលោក ងួន ញ៉ិល និងលោក កឹម សុខា។
ករណីនេះ មានការលើកឡើងថា លោក ងួន ញ៉ិល
បានស្តាយកៅអីជាប្រធានទី១នៃរដ្ឋសភា។
នៅព្រឹកថ្ងៃអង្គារនេះ ប្រធានរដ្ឋសភាលោក
ហេង សំរិន ប្រកាសតែងតាំងអនុប្រធានគណបក្សសង្គ្រោះជាតិលោក កឹម សុខា
ជាអនុប្រធានទី១រដ្ឋសភាបន្ទាប់ពីបានជាប់ឆ្នោតដោយសំឡេងគាំទ្រ១១៦
លើ១២២សំឡេង សំឡេងអនុបវាទចំនួន២ និងមិនគាំទ្រ៤សំឡេង
។ការបោះឆ្នោតនេះធ្វើឡើងតាមរយៈការគូសសន្លឹកឆ្នោតជាសម្ងាត់
គឺមិនមែនការលើកដៃនោះទេ។
មុនការបោះឆ្នោតជ្រើសតាំងលោក កឹម សុខា
ជាអនុប្រធានទី១ លោក ងួន ញ៉ិល ត្រូវបានអ្នកតំណាងរាស្ត្រ ១២២រូប
បានបោះឆ្នោតយល់ព្រមជាឯកច្ឆ័ន្ទជ្រើសតាំងជាអនុប្រធានទី២នៃរដ្ឋសភា
៕
ប្រភពពី vodhotnews.com
