លោក សម រង្ស៊ី៖ វិបត្តិនយោបាយ មិនទាន់ចប់ បើនៅមានអ្នកជាប់គុក និងមានអ្នក ដែលគេតាមដាន រករឿង
ភ្នំពេញ: លោក
សម រង្ស៊ី ប្រធានគណបក្សសង្គ្រោះជាតិ
បានថ្លែងបញ្ជាក់នៅព្រឹកថ្ងៃទី១៤ ខែសីហានេះថា
ចំពោះការចាប់ខ្លួនសកម្មជនគណបក្សសង្គ្រោះជាតិ
និងការបន្តនីតិវិធីរបស់តុលាការ មកលើសកម្មជនគណបក្សសង្គ្រោះជាតិ
គឺលោកបាបញ្ជាក់ ហើយនៅរដ្ឋសភា សម្តេចតេជោ ហ៊ុន សែន បានស្តាប់
និងបានទាមទារស្នើឲ្យគេកត់ត្រាពាក្យសំដីរបស់លោក គឺវិបត្តិនយោ
បាយចប់ហើយ។ ដូច្នេះរឿងដែលពាក់ព័ន្ធនឹងវិបត្តិនយោបាយ
ត្រូវតែបញ្ចប់។លោកបានសង្កត់ធ្ងន់ថា បើនៅមានអ្នកជាប់គុក មានអ្នកដែលគេតាមដានរករឿង មានន័យថា វិបត្តិនយោបាយមិនទាន់ចប់ទេ។ កាកសំណល់នៃវិបត្តិនយោបាយ ត្រូវតែបញ្ចប់ ហើយលោកនឹងខិតខំធ្វើយ៉ាងម៉េចឲ្យស្មារតីនេះ ត្រូវបានគេគោរពទាំងអស់គ្នា។
សូមជម្រាបថា សាលាដំបូងរាជធានីភ្នំពេញ នៅតែបន្តដំណើរការនីតិវិធីស៊ើបអង្កេតលើករណីបាតុកម្ម ដែលដឹកនាំដោយក្រុមអ្នកតំណាងរាស្ត្រគណបក្សសង្គ្រោះ កើតមានអំពើហិង្សា នៅស្ពាននាគ ជិតទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។ ក្នុងដំណើរការនីតិវិធីតុលាការ ដើម្បីប្រឆាំងនឹងថ្នាក់ដឹកនាំ និងសកម្មជនគណបក្សសង្គ្រោះជាតិនោះ លោកចៅក្រម បានចេញដីកាថ្មីមួយទៀត បង្គាប់ឲ្យលោក មៀច សុវណ្ណារ៉ា ប្រធាននាយកដ្ឋានព័ត៌មានគណបក្សសង្គ្រោះជាតិ និងជាបេក្ខជនធ្លាក់ឆ្នោតតំណាងរាស្ត្រមណ្ឌលខេត្តបន្ទាយមានជ័យ ចូលខ្លួនទៅឆ្លើយបំភ្លឺ នៅថ្ងៃទី១ ខែកញ្ញា ឆ្នាំ២០១៤។
ក្នុងសំណុំរឿងក្តីនោះ យុវជនគណបក្សសង្គ្រោះជាតិ ៣ នាក់ ត្រូវបានចាប់ឃុំខ្លួន កាលពីថ្ងៃទី២សីហា ហើយរហូតដល់ពេលនេះ មិនទាន់ត្រូវបានដោះលែងពីពន្ធនាគារព្រៃសវិញទេ។ ក្នុងនោះ តំណាងរាស្ត្រ ៨ រូប រួមទាំងលោកកឹមសុខា និងយុវជនម្នាក់របស់គណបក្សសង្គ្រោះជាតិ ត្រូវបានចៅក្រម ចេញដីកាឲ្យចូលបំភ្លឺជាបន្តបន្ទាប់ ចាប់ពីថ្ងៃទី៨ ដល់ថ្ងៃទី១៣សីហា។ ប៉ុន្តែដោយសារតែតំណាងរាស្ត្រមានអភ័យឯកសិទ្ធិសភា គឺតំណាងរាស្ត្រគណបក្សសង្គ្រោះជាតិទាំងនោះ មិនបានចូលខ្លួនទៅតុលាការទេ៕H/L
