តំណាងអ្នកភូមិឡពាងបង្ខំ ចិត្តទទួលសំណងពីក្រុមហ៊ុន KDC
កំពង់ឆ្នាំងៈ តំណាង
ពលរដ្ឋ ភូមិឡពាង
ម្នាក់ដែលតែងតែចេញមុខតវ៉ាយ៉ាងសកម្មប្រឆាំងនឹងការរំលោភបំពាន
ដីធ្លីពីសំណាក់ក្រុមហ៊ុន KDC នៅទីបំផុត
បានបង្ខំចិត្តទទួលយកសំណងពីក្រុមហ៊ុនមានអំណាចមួយនេះ
ដើម្បីឲ្យតុលាការដកការចោទប្រកាន់រាល់បទចោទមកលើខ្លួន
ខណៈដែលកម្លាំងសមត្ថកិច្ចនៅតែបន្តឡោមព័ទ្ធ ភូមិឡពាង
កាលពីម្សិលមិញ។
លោក រាជ សីម៉ា តំណាងប្រជាពលរដ្ឋ
ដែលរងនូវបទចោទប្រកាន់ជាច្រើនករណីនៅតុលាការក្នុងជម្លោះដីធ្លី
ជាមួយក្រុមហ៊ុន KDC ដែលជាក្រុមហ៊ុនរបស់លោកស្រី ជា ខេង ភរិយាលោក
ស៊ុយ សែម រដ្ឋមន្ត្រីក្រសួងរ៉ែ និងថាមពល បានឲ្យដឹងថា
លោកបានទទួលយកសំណងពីក្រុមហ៊ុននូវទឹកប្រាក់ចំនួន ២ ម៉ឺនដុល្លារ
ដើម្បីដោះដូរដីមានជម្លោះរបស់លោកជិតមួយហិកតានិង ១០ លានរៀល
ដើម្បីឲ្យឈប់តវ៉ា ប្រឆាំងក្រុមហ៊ុន។
លោកបញ្ជាក់ថា៖ «ដើម្បីសុត្ថិភាព
ខ្ញុំសុខចិត្តទទួលយកសំណងពីក្រុមហ៊ុនបើមិនដូច្នេះទេគេនឹងចាប់
ខ្លួនខ្ញុំ តាមអំណាចរបស់តុលាការ»។
លោកឲ្យដឹងទៀតថា
នៅក្នុងកិច្ចសន្យាជាមួយក្រុមហ៊ុនលោកស្រី ជា ខេង គឺខាងក្រុមហ៊ុន
គេនឹងព្យាយាមចរចាជាមួយពលរដ្ឋដែលមានបណ្តឹងនៅតុលាការទាំងអស់គឺ
គេប្រើតុលាការ ដើម្បីដាក់សម្ពាធ ដូចជា រូបលោក ដែលទទួលយកសំណងនេះ
ដោយសារតែសម្ពាធពីតុលាការ។ «ករណីខ្ញុំនេះទើបខ្ញុំហ៊ាននិយាយថា
តុលាការគឺធ្វើតាមតែអ្នកមានអំណាចតែប៉ុណ្ណោះ បើគេឲ្យចាប់គឺចាប់
បើគេឲ្យលែងគឺលែង»។
យោងតាមកិច្ចសន្យាព្រមព្រៀងទទួលយកគោល
នយោបាយ ពីក្រុមហ៊ុននៅថ្ងៃ ទី៧ ខែកក្កដា នៅត្រង់ចំណុច ទី២ លោក រាជ
សីម៉ា បានសរសេរថា
ចាប់តាំងពីថ្ងៃដែលលោកផ្តិតមេដៃទទួលយកគោលនយោបាយរួចរាល់គឺលោក
សូមសន្យាថា ឈប់បង្កនូវការរំខានគ្រប់រូបភាពទាំងអស់
ដូចដែលលោកបានធ្វើកន្លងមកចំពោះក្រុមហ៊ុនទៀត
ជាពិសេសឈប់ជឿការញុះញង់ពីគ្រប់មជ្ឈដ្ឋាន។
លិខិតនោះបញ្ជាក់ថា៖
«ខ្ញុំសូមប្រគល់សិទ្ធិទាំងស្រុងជូនក្រុមហ៊ុន KDC
ដើម្បីដកពាក្យបណ្តឹងជំនួសខ្ញុំបាទនៅឯតុលាការគ្រប់ថ្នាក់និងនៅ
ស្ថាប័នទាំងអស់ដែលមានការពាក់ព័ន្ធ»។
នៅឯក្នុង ភូមិឡពាង ឯនោះវិញ
កម្លាំងសមត្ថកិច្ចចម្រុះ ខេត្តកំពង់ឆ្នាំង ជាង ២០០
នាក់បានដាក់ពង្រាយនៅក្នុងភូមិនិងនៅតាមវាលស្រែដែលមានគម្ពោត
ព្រៃ ដោយក្រុមអាជ្ញាធរទាំងនោះ បានអះអាងថា
ធ្វើតាមបទបញ្ជាពីថ្នាក់លើដើម្បីអនុវត្តដីកាចាប់ខ្លួនពលរដ្ឋ។
ចំណែកផ្ទះអ្នកភូមិវិញ បានយកបន្លាស្រះ
នៅតាមច្រកចូលហើយបានមកប្រមូលផ្តុំគ្នានៅផ្ទះអ្នកស្រី អ៊ុំ សុភី
ដើម្បីការពារកុំឲ្យអាជ្ញាធរចាប់ខ្លួនចំណែកកម្មករក្រុមហ៊ុន
ប្រដាប់ដោយកាំបិតខ្វែវ ឈរនៅពីក្រោយផ្ទះពលរដ្ឋ
ដោយមានចាក់មេក្រូឮសំឡេងខ្លាំងៗ។
អ្នកស្រី អ៊ុំ សុភី
ដែលកំពុងប្រឈមការចាប់ខ្លួនបានថ្លែងថា ពួកអ្នកស្រី
មិនហ៊ានចេញមុខប្រឆាំងជាមួយនឹងក្រុមហ៊ុនដែលកំពុងតែឈូសឆាយធ្វើ
ព្រំដីនោះទេ ដោយសារតែមានកម្លាំងប៉ូលិស និងប៉េអឹម
នៅពង្រាយតាមភូមិច្រើនពេក។
អ្នកស្រីថ្លែងថា៖
«នៅពេលដែលកម្លាំងដកចេញខ្ញុំនឹងចេញទៅប្រឆាំងជាមួយកម្មករ
ក្រុមហ៊ុនមិនឲ្យឈូសឆាយទេ ហើយខ្ញុំនឹងឡើងទៅដាក់ពាក្យបណ្តឹងនៅ
ភ្នំពេញ ដើម្បីស្វែងរកយុត្តិធម៌ដល់ពួកខ្ញុំ។
ខ្ញុំជាជនរងគ្រោះខ្ញុំមិនមែនជាជនល្មើសទេ»។
ចំណែកឯអ្នកស្រី អ៊ុន ទុំ អាយុ ៦៧ឆ្នាំ
ដែលរងរបួសដោយចម្ពាមបាញ់ត្រូវចំស្មាខាងស្តាំ
ដែលធ្លាប់ជាប់ពន្ធនាគារអស់ ១ ឆ្នាំ ៨
ខែបន្ទាប់ពីបានអនុវត្តទោសរបស់ខ្លួនដែលក្រុមហ៊ុនបានចោទប្រកាន់
ថា
រំលោភបំពានលើកម្មសិទិ្ធស្របច្បាប់បានថ្លែងនៅពេលកំពុងដេកនៅលើ
កន្ទេលថា៖ «នៅក្នុងរឿងដីធ្លីនេះ ខ្ញុំឆ្អែតហើយ គេយកដីយើងហើយ
គេប្តឹងយើងដាក់គុកទៀត
ហើយពេលនេះគេយកពលរដ្ឋយើងដែលមានជម្លោះពីមុនមកវាយពួកយើងវិញ។
ខ្ញុំឈឺចាប់ណាស់»។
កាលពីថ្ងៃចន្ទ
យ៉ាងហោចណាស់ក៏មានពលរដ្ឋម្នាក់ក្នុង ភូមិឡពាង បានសន្លប់និងពលរដ្ឋ
១៤
នាក់ផ្សេងទៀតរងរបួសនៅក្នុងការប៉ះទង្គិចគ្នាជាមួយកម្មករ
ក្រុមហ៊ុន KDC
ខណៈដែលពលរដ្ឋបានចេញរារាំងមិនឲ្យក្រុមហ៊ុនធ្វើការឈូសឆាយដី
ធ្វើព្រំ។
លោក ប្រាក់ វុទ្ធី ស្នងការនគរបាល
ខេត្តកំពង់ឆ្នាំង ពុំអាចទាក់ងដើម្បីសុំការអត្ថាធិប្បាយបានទេ។
ប៉ុន្តែសមត្ថកិច្ចម្នាក់ដែលស្នើសុំមិនបញ្ចេញឈ្មោះបានថ្លែងថា
លោកមិនដឹងថា ពេលណានឹងត្រូវដកកម្លាំងចេញទៅវិញនោះទេ។
លោកបញ្ជាក់ថា៖
«គ្រាន់តែជារឿងរបស់មនុស្សម្នាក់សោះធ្វើឲ្យពួកកងកម្លាំងយើង
រវល់ពេញមួយខេត្ត»។
កាលពីថ្ងៃម្សិលមិញសមាគមការពារសិទ្ធិ
មនុស្ស អាដហុក
បានចេញសេចក្តីប្រកាសព័ត៌មានដោយថ្កោលទោសទៅលើទង្វើអមនុស្សធម៌
គ្មានការទទួលខុសត្រូវរបស់អាជ្ញាធរមានសមត្ថកិច្ច ខេត្តកំពង់ឆ្នាំង
ដែលមិនបានធ្វើអន្តរាគមន៍បញ្ឈប់អំពើហិង្សាដែលបានកើតឡើងរវាង
ប្រជាពលរដ្ឋ ភូមិឡពាង ជាមួយកម្មករស៊ីឈ្នួលរបស់ក្រុមហ៊ុន KDC។
នៅក្នុងលិខិតនោះបញ្ជាក់ថា៖ «សមាគម អាដហុក
ទទូចស្នើសុំឲ្យមានការអន្តរាគមន៍បញ្ឈប់អំពើហិង្សាជាពិសេសកម្លាំង
សមត្ថកិច្ចត្រូវដកចេញពីភូមិចំណែកភាគីក្រុមហ៊ុនត្រូវតែបញ្ឈប់
ធ្វើសកម្មភាពរបស់ខ្លួន»។
លោក ថៃ ហ៊ី តំណាងក្រុមហ៊ុន KDC
បានបដិសេធធ្វើអត្ថាធិប្បាយដោយថ្លែងថា៖ «ខ្ញុំអត់ឆ្លើយទេ»។
ចំណែកលោក ឈួរ ចាន់ឌឿន អភិបាល ខេត្តកំពង់ឆ្នាំង
បានបដិសេធពុំធ្វើការអត្ថាធិប្បាយឡើយ។
លោក ចាន់ សុវេត
មន្ត្រីស៊ើបអង្កេតជាន់ខ្ពស់សមាគម អាដហុក
ដែលបានចុះអង្កេតដោយផ្ទាល់នៅកន្លែងកើតហេតុបានថ្លែងថា
ប្រជាពលរដ្ឋភ័យខ្លាច
ក្រោយពេលសមត្ថកិច្ចមិនទទួលខុសត្រូវចំពោះសុវត្ថិភាពរបស់ពួកគាត់
ហើយអាជ្ញាធរមិនធ្វើសកម្មភាពណាមួយអនុវត្តដីកាទេ
គឺដូចពង្រាយកម្លាំងគំរាមកំហែងប្រជាពលរដ្ឋដើម្បីការពារឲ្យកម្មករ
ធ្វើព្រំដីបោះរបងទៅវិញ។
លោកថ្លែងថា នេះជាចំណុចខ្សោយរបស់ក្រុមហ៊ុននិងសមត្ថកិច្ចដែលពុំអាចរកដំណោះស្រាយជម្លោះដីធ្លីនេះដោយសន្តិវិធីបាន។
កាលពី ខែមេសា អាជ្ញាធរ ស្រុកកំពង់ត្រឡាច
អាជ្ញាធរខេត្តនិងក្រុមហ៊ុនបានចុះទៅពិភាក្សាជាមួយក្រុមពលរដ្ឋដែល
មានជម្លោះជាមួយក្រុមហ៊ុន KDC
ម្តងម្នាក់ៗដើម្បីបញ្ចុះបញ្ចូលឲ្យទទួលយកគោលការណ៍សំណងពីក្រុម
ហ៊ុនដែលពេលនោះមានពលរដ្ឋ ៣៣ គ្រួសារបានព្រមទទួលយកសំណងនៅសល់ជាង
៥០ គ្រួសារទៀតកំពុងរកដំណោះស្រាយបន្ត៕
ប្រភពពី ភ្នំពេញប៉ុស្តិ៍
