ជិះម៉ូតូទាក់ដៃចង្កូតដួលលើផ្លូវ ត្រូវឡានដឹកដែកកិន បែកក្បាលធ្លាយខួរ ស្លាប់ក្នុងថ្លុកឈាម
រាជធានី
ភ្នំពេញ ៖ បុរសម្នាក់បានបែកក្បាល
ធ្លាយខួរស្លាប់ភ្លាមៗគួរឲ្យរន្ធត់
ខណៈដែលជិះម៉ូតូទាក់ដៃចង្កូតគ្នាដួល
ត្រូវរថយន្តបើកមកពីក្រោយ ចាប់ហ្វ្រាំងមិនទាន់
បើកកិនពីលើយ៉ាងពេញទំហឹង កាលពីវេលាម៉ោង ១៩និង២០
នាទីយប់ថ្ងៃទី១៣ ខែកក្កដា ឆ្នាំ២០១៤ ស្ថិតលើកំណាត់ ផ្លូវជាតិលេខ៥ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ។សាក្សីបានឲ្យដឹងថា មុនពេលកើតហេតុ ម៉ូតូហុងដាឌ្រីម ស៊េរី២០១៤ ពណ៌ខ្មៅ ពាក់ស្លាកលេខ ភ្នំពេញ 1J-4982 ជិះគ្នា ៣នាក់ ទើបនឹងត្រឡប់ មកពីដើរលេងនៅភ្នំពេញ ទៅហាងនំបុ័ងវិញមានធុំក្លិនស្រា ទំនងជាទើបតែ ចេញពីកន្លែងផឹកស៊ី ធ្វើដំណើរស្របទិសគ្នា ជាមួយម៉ូតូហុងដាឌ្រីម ស៊េរី២០១០ ពណ៌ខ្មៅ មិនចាំស្លាកលេខ ជិះម្នាក់ឯង បើកបរក្នុងល្បឿនយ៉ាងលឿន។
មកដល់ចំណុចខាងលើ ជិតដល់ហាងនំបុ័ង បានទាក់ដៃចង្កូតគ្នា ធ្វើ ឲ្យម៉ូតូជិះគ្នា ៣នាក់ ដួលធ្លាក់អ្នកជិះក្រោយម្នាក់ ត្រូវរថយន្ត កូរ៉េ ២,៥ តោន ជារថយន្តដឹកដែក ពណ៌ខៀវ ពាក់ស្លាកលេខ បាត់ដំបង 3A-0199 បើកមកពីក្រោយ ចាប់ហ្វ្រាំងមិនទាន់ បានកិនបែកក្បាល ធ្លាយខួរស្លាប់ ចំណែក ២នាក់ ទៀតរងរបួសធ្ងន់ រីឯម៉ូតូជិះម្នាក់ឯង មិនបានដួលរងរបួសទេ បានបើកទៅមុខបាត់។
សពជនរងគ្រោះ មានឈ្មោះ សាំង វណ្ណៈ ភេទប្រុស អាយុ ២៣ឆ្នាំ ជាបុគ្គលិកធ្វើនំបុ័ង នៅហាង លីគឹមហុង ស្នាក់នៅក្នុងហាងនំបុ័ង ជិតកន្លែងកើតហេតុ មានស្រុកកំណើត នៅភូមិរកាជន្លឹង ឃុំរកាជន្លឹង ស្រុកខ្សាច់កណ្តាល ខេត្តកណ្តាល។ រថយន្តបង្កបានព្យាយាម បើករត់គេចទៅដល់ មុខស្ថានីយ៍ប្រេងតេលា ក្នុងភូមិដូង សង្កាត់ព្រែកព្នៅ ខណ្ឌព្រែកព្នៅ ទើបតៃកុងរថយន្តបានឈប់ រត់គេចខ្លួនបាត់ស្រមោល៕
ប្រភពពី វត្តភ្នំ
