ភ្នំពេញៈ សាលាដំបូងរាជធានីភ្នំពេញ កាលពីថ្ងៃ ទី ១៤ ខែ កក្កដា ឆ្នាំ២០១៤ បានបើកសវនាការជំនុំជម្រះ លើករណីយុវជនជាប់ចោទ២ ពីបទរំលោភបូក ទៅលើនារីវ័យ១៩ឆ្នាំម្នាក់ ដែលជិះម៉ូតូឌុបដើរលេង តែបាននំាជនរងគ្រោះទៅផឹកទឹកត្នោតជួរ និងបង្អក់ទឹកត្នោតជូរ ឲ្យនាងស្រវឹងរហូតលែងដឹងខ្លួន និងលើកនាងដាក់ម៉ូតូឌុបទៅរំលោភនៅក្នុង គុម្ពោធព្រៃ ស្ងាត់ បានសម្រេច កាលពីថ្ងៃ ទី ៣ ខែ មីនា ឆ្នាំ ២០១៤ ស្ថិតនៅក្នុងសង្កាត់ព្រែកភ្នៅ  ខណ្ឌព្រែកភ្នៅ  រាជធានីភ្នំពេញ ។

លោកកោ វណ្ឌី ប្រធានចៅក្រមជំនុំជម្រះ នៃ សាលាដំបូងរាជធានីភ្នំពេញ  មានប្រសាសន៍ថា ជនជាប់ចោទទាំង២នាក់នេះ មានឈ្មោះទី១-ឈ្មោះ ភុន ដារ៉ា ភេទប្រុស អាយុ២១ឆ្នាំ  ជាសិស្សថ្នាក់ទី១០ (ជាប់ឃុំ) និង ទី២-ឈ្មោះ យិន ចាន់សុជាតិ ភេទប្រុស អាយុ២២ឆ្នាំ  ជាសិស្សថ្នាក់ទី១០ (គេចខ្លួន) ។  ជនជាប់ចោទទាំង២ ត្រូវបានតុលាការជំនុំជម្រះ និង កាត់ទោសពីបទរំលោភមានស្ថាន ទម្ងន់ទោស។

ក្នុងចំណោមជាជាប់ចោទទាំង២ នាក់នេះ  ឈ្មោះ ភុន ដារ៉ាត្រូវបានឃាត់ខ្លួន កាលពីថ្ងៃ ទី ៧ ខែ មីនា ឆ្នាំ  ២០១៤ តាមបណ្តឹងរបស់ជនរងគ្រោះ ឈ្មោះ ហវស អាយុ ១៩ឆ្នាំ ដែលធ្វើការនៅ ក្នុងភោជនីដ្ឋានមួយកន្លែង ស្ថិតនៅក្នុងសង្កាត់ស្វាយប៉ាក់ រាជធានីភ្នំពេញ។ ចំណែកឯ ឈ្មោះ  យិន ចាន់សុជាតិ បានរត់គេចខ្លួន។

នៅក្នុងសំណុំរឿងនេះ ម្តាយរបស់នារីរងគ្រោះបានទាមទារជំងឺចិត្តចំនួន៧០០០ ដុល្លារអាម៉េរិក។

សូមបញ្ជាក់ថា តុលាការនឹងប្រកាសសាលក្រម នៃសំណុំរឿងនេះ នៅថ្ងៃ ទី៣០ ខែ កក្កដា ២០១៤ ខាងមុខនេះ៕

_________________________
ផ្តល់សិទ្ធិដោយ៖ DAP-NEWS