ភ្នំពេញ៖ សាលាដំបូងរាជធានីភ្នំពេញ កាលពីថ្ងៃចន្ទ ទី១៤ ខែកក្កដា ឆ្នាំ២០១៤  បានបើកសវនាការជំនុំជម្រះ និង កាត់ទោសស្ត្រីជាប់ចោទម្នាក់ ដែលជាប់សង្ស័យ ជាមេអណ្តើកនាំមនុស្សទៅលក់ដូរផ្លូវភេទ នៅចិនតាមរូបភាពរៀបអាពាហ៍ពិពាហ៍ នៅក្រៅប្រទេស ។

លោកកោ វណ្ឌី ប្រធានចៅក្រម សាលាដំបូងរាជធានីភ្នំពេញ បានឲ្យដឹងថា  ស្ត្រីជាប់ចោទរួបនេះ មានឈ្មោះ បូ ស៊ីណា ហៅយ៉ាន ភេទស្រី អាយុ ៣៨ឆ្នំាំ ។ ជាប់ចោទ ពីបទ អំពើលក់-ដូរមនុស្ស ដោយ មានគោលដៅ តាមច្បាប់ស្តីពីការបង្គ្រាបអំពើជួញដូរមនុស្ស នឹងអំពើអាជីវកម្មផ្លូវភេទ។

លោកចៅក្រមបានបន្ថែមថា ជនជាប់ចោទត្រូវបានចាប់ខ្លួន កាលពីថ្ងៃ ទី១៦ ខែវិច្ឆិកា ឆ្នាំ ២០១៣ យោងតាមពាក្យបណ្តឹងរបស់នារីខ្មែររងគ្រោះចំនួន២នាក់ ដែលត្រូវបានជួញដូរ តាមរយៈ ជនជាប់ចោទរូបនាំខ្លួនលក់ នៅក្នុងប្រទេសចិនដីគោក កាលពីកំឡុងខែ សីហា ឆ្នាំ ២០១៣។

នៅក្នុងសំណុំរឿងនេះ ជនរងគ្រោះទាំង២នាក់ បានទាមទារ ថ្លៃ ជំងឺចិត្តម្នាក់ៗ ចំនួន ២ ម៉ឺនដុល្លារអាម៉េរិក និង សុំឲ្យតុលាការមេត្តាផ្តន្ទាទោសជនល្មើល ឲ្យបានធ្ងន់ធ្ងរ។  តុលាការនឹងប្រកាសសាលក្រម នៃសំណុំរឿងនេះ នៅថ្ងៃ ទី៣០ ខែកក្កដា ឆ្នំា២០១៤ ខាងមុខនេះ៕