ភ្នំពេញ ៖ បុរសជាកម្មករ រោងចក្រ កាត់ដេរម្នាក់ បានបែកក្បាល ស្លាប់ភ្លាមៗ នៅនឹងកន្លែង កើតហេតុ ខណៈជនរងគ្រោះ កំពុងជិះម៉ូតូ តែម្នាក់ឯង ឆ្លងផ្លូវ រួចហើយត្រូវរថយន្តដឹកទំនិញ មួយគ្រឿង បុកពេញមួយទំហឹង ។

ហេតុការណ៍ គ្រោះថ្នាក់ចរាចរណ៍ ដ៏រន្ធត់ ខាងលើនេះ បានបង្កឲ្យមានការ ភ្ញាក់ផ្អើល កាលពីវេលាម៉ោង ប្រមាណ ៤រសៀលថ្ងៃទី៦ ខែកក្កដា ឆ្នាំ២០១៤ ស្ថិតនៅ មុខក្លឹបកំសាន្តធី តាមផ្លូវជាតិលេខ២ ភូមិទួលរការ សង្កាត់ចក្រអង្រែក្រោម ខណ្ឌមានជ័យ ។

សេចក្តីរាយការណ៍ ពីសមត្ថកិច្ច មូលដ្ឋាន បានឲ្យដឹងថា គ្រោះថ្នាក់ ចរាចរណ៍ខាងលើនេះ បានកើតឡើង ខណៈជនរងគ្រោះ មានឈ្មោះ ជា ផល្លី អាយុ២៤ឆ្នាំ មានស្រុកកំណើត នៅស្រុកស៊ីធរកណ្តាល ខេត្តព្រៃវែង បានបើកម៉ូតូ មួយគ្រឿង ម៉ាកសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BW-1664 ឆ្លងផ្លូវជាតិលេខ២ ក្នុងទិសដៅ ពីលិចទៅកើត ។

សមត្ថកិច្ច បានបន្តទៀតថា ខណៈជនរងគ្រោះ កំពុងបើក ម៉ូតូឆ្លងផ្លូវនោះ ស្រាប់តែមានរថយន្ត មួយគ្រឿងម៉ាក ហ្វ៊ុយហ្ស៊ូ ពណ៌ខៀវ ពាក់ស្លាកលេខ ភ្នំពេញ 3B-2645 ក្នុងទិសដៅ ពីត្បូងទៅជើង បានបុក និងកិនជនរងគ្រោះ បណ្តាលឲ្យបែកក្បាល ខ្ទេចស្លាប់ភ្លាមៗ តែម្តង។ ក្រោយកើតហេតុ អ្នកបើករថយន្ត ដែលគេមិនស្គាល់ អត្តសញ្ញាណ បានរត់គេចខ្លួនបាត់ បន្សល់ទុករថយន្ត នៅនឹង កន្លែងកើតហេតុ ។

ក្រោយទទួលនូវ ព័ត៌មានខាងលើនេះ កម្លាំងនគរបាល មូលដ្ឋាន និងកម្លាំង នគរបាលចរាចរ បានចុះទៅជួយ អន្តរាគមន៍ភ្លាមៗ នៅនឹងកន្លែងកើតហេតុ ហើយទាក់ទងទៅ ក្រុមគ្រួសារជនរងគ្រោះ ដើម្បីមកទទួល យកសព ទៅធ្វើបុណ្យប្រពៃណី។

ដោយឡែក ម៉ូតូ និងរថយន្ត ត្រូវបានកម្លាំង នគរបាលចរាចរ ផ្លូវគោក រាជធានីភ្នំពេញយក ទៅរក្សាទុក នៅការិយាល័យ ចរាចរណ៍ ដើម្បីរង់ចាំការដោះស្រាយបន្តទៀត៕