បងប្អូនឈ្លោះគ្នារឿងដណ្តើមស្រីស្នេហ៍ បើកឡានដេញបំបុក ផ្អើលមួយចំហៀងភ្នំពេញ
រាជធានីភ្នំពេញ ៖ រថយន្ត ២គ្រឿង បើកដេញតាមបុកគ្នា ផ្អើលមួយចំហៀង
រាជធានីភ្នំពេញ សង្ស័យរឿងដណ្តើមស្រីស្នេហ៍
បង្កឲ្យមានការភ្ញាក់ផ្អើល កាលពីវេលាម៉ោង ៣និង៣០ នាទីទៀបភ្លឺ
ថ្ងៃទី៤ ខែកក្កដា ឆ្នាំ២០១៤ នៅចំណុច
មហាវិថីព្រះមុនីវង្ស កែងផ្លូវលេខ២៤២ សង្កាត់បឹងព្រលិត ខណ្ឌ៧មករា
ហើយបើតាមប្រភពពីសាក្សី បានឲ្យដឹងថា ទាំងជនបង្ក និងជនរងគ្រោះ
សុទ្ធតែជាបងប្អូននឹងគ្នា មិនគួរណាព្រោះតែ រឿងដណ្តើមស្រីស្នេហ៍
បង្កភាពអនាធិបតេយ្យបែបនេះទេ ។មុនពេលកើតហេតុ រថយន្តបង្កម៉ាកឡិចស៊ីស RX 300 ពណ៌ស្ករ អត់ស្លាកលេខ ជិះគ្នា ២នាក់ ស្រីម្នាក់ប្រុសម្នាក់ ធ្វើដំណើរតាមមហាវិថីព្រះមុនីវង្ស ពីជើងទៅត្បូង ស្របគ្នាជាមួយរថយន្តតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2W 4090 ជិះគ្នា ២នាក់ ស្រីម្នាក់អ្នកជិះក្នុងរថយន្តទាំង ២គ្រឿង សុទ្ធតែជាយុវជនវ័យក្មេងដូចគ្នា។ រថយន្តបង្កជាអ្នកបើកដេញ តាមបុករថយន្តតូយ៉ូតាព្រូស ជាប់ពីក្រោយរហូតដល់ មហាវិថីព្រះមុនីវង្ស កែង២៤២ រថយន្តព្រូស បានបត់ស្តាំ ក៏ត្រូវឡិចស៊ីសបត់ស្តាំ ដេញតាមក្នុងល្បឿនលឿនពេក បួងចង្កូតមិនទាន់ ក៏ជ្រុលទៅបុករថយន្តស៊ីអវី ពណ៌ស ពាក់ស្លាកលេខ ភ្នំពេញ 2E-2012 មួយគ្រឿង ចតនៅមុខផ្ទះប្រជាពលរដ្ឋ តាមផ្លូវលេខ២៤២ ដោយបុករុញស៊ីអវី ផ្លោងទៅបុករបងថ្ម បាក់អស់មួយប្រលោះ។
ពេលនោះរថយន្តបង្ក មិនបានឈប់ទេ បានព្យាយាមបើកដេញ តាមរថយន្តព្រូស បន្តទៀតដល់ចំណុចផ្លូវលេខ១០៧ កែង២៣២ សង្កាត់បឹងព្រលិត ខណ្ឌ៧មករា រថយន្តព្រូសដែលព្យាយាមបើករត់គេច ហើយទៅបុកខឿនចិញ្ចើមផ្លូវ ធ្វើឲ្យរថយន្តបែកកង់មុខ និងកង់ក្រោយខាងស្តាំ ហើយអ្នកបើករថយន្តព្រូសខឹងពេក ក៍បានចុះពីលើរថយន្ត ទៅវាយអ្នកបើករថយន្តឡិចស៊ីស ប្រតាយប្រតប់គ្នាទៅវិញទៅមក ។ បន្ទាប់ពីវាយគ្នាអស់ចិត្តហើយ ទើបអ្នកបើករថយន្តឡិចស៊ីស បានបើករថយន្តចេញទៅបាត់ ហើយរថយន្តបែកកង់ បានដោះដូរកង់ហើយបើកចេញទៅបាត់ដែរ ដោយមិនមានសមត្ថកិច្ច ចុះទៅជួយអន្តរាគមន៍ទេ៕
________________________
ប្រភពព័ត៌មានពី៖ វត្តភ្នំ
