ប្រតាយប្រតប់ជាមួយប្តីជ្រុះកាបូប ប៉ូលីសឆែកឃើញគ្រឿងញៀន បន្តចាប់បាន ៦នាក់ទៀត
ខេត្តកំពង់ឆ្នាំង ៖ ស្ត្រីម្នាក់ត្រូវបានសមត្ថកិច្ចឃាត់ខ្លួន
ពីបទប្រើប្រាស់គ្រឿងញៀន បន្ទាប់ពីឈ្លោះទាស់ទែង ពាក្យសំដីជាមួយប្តី
ហើយបានបែកធ្លាយ រឿងប្រើប្រាស់គ្រឿញៀន កាលពីវេលម៉ោង
៥ល្ងាចថ្ងៃទី២ ខែកក្កដា ឆ្នាំ២០១៤នៅផ្ទះជួល ភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។ ស្ត្រីដែលសមត្ថកិច្ចឃាត់ខ្លួន មានឈ្មោះ ឃឹម ផល្លា ហៅអ៊ូក អាយុ ៣១ឆ្នាំ មានស្រុកកំណើតនៅភូមិស្រែតាជ័យ ឃុំអភិវឌ្ឍន៌ ស្រុកទឹកផុស ស្នាក់នៅភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង មានប្តីឈ្មោះ ម៉ៃ ឈាន អាយុ ៣៣ឆ្នាំ រស់នៅខេត្តឧត្តមានជ័យ។ នៅមុនពេលកើតហេតុ ទាំង ២នាក់ ប្តីប្រពន្ធនេះ បានឈ្លោះប្រកែកគ្នា ដោយប្តីបានចោទប្រកាន់ថា ប្រពន្ធរបស់ខ្លួន ឈ្មោះ ឃឹម ផល្លា មានប្រុសថ្មី រួចក៏ប្រវាយប្រតប់គ្នា ហើយស្ត្រីជាប្រពន្ធ បានប្តឹងសមត្ថកិច្ច។
ពេលសមត្ថកិច្ចមកដល់ ពីរនាក់ប្តីប្រពន្ធ នៅតែប្រតាយប្រតប់គ្នា ហើយស្ត្រីជាប្រពន្ធ បានជ្រុះកាបូប ហើយដោយមានការសង្ស័យ សមត្ថកិច្ចបានយក កាបូបរបស់ប្រពន្ធ មកពិនិត្យមើលនៅអធិការដ្ឋាន នគរបាល ក្រុងកំពង់ឆ្នាំង ក៏បានរកឃើញ ថ្នាំញៀនប្រភេទម៉ាទឹកកក ចំនួន ២កញ្ចប់។ ស្ត្រីឈ្មោះ ឃឹម ផល្លា បានប្រាប់ ខ្លួនពិតជាបានប្រើប្រាស់ គ្រឿងញៀនមែន គឺប្រើប្រាស់ជាង ៣ខែមកហើយ ដោយទិញពីមនុស្សប្រុសម្នាក់ ។
ផ្តើមចេញពីករណីនេះ សមត្ថកិច្ចឡោមព័ទ្ធ ចាប់បានជនសង្ស័យ ប្រុសស្រីចំនួន ៦នាក់ ជាអ្នកជួញដូរ ចែកចាយ និងប្រើប្រាស់ថ្នាំញៀន កាលពីវេលាម៉ោង ៩និង៣០ នាទីយប់ថ្ងៃទី០២ ខែកក្កដា ឆ្នាំ២០១៤ នៅផ្ទះសំណាក់យីហោសុដាលីន ស្ថិតនៅក្រុងកំពង់ឆ្នាំង។ ជនសង្ស័យ រួមមានទី១-ឈ្មោះ មុត ចន្ថា ហៅគ្រើល អាយុ ៣០ឆ្នាំ ជាមេជួញដូរ និងចែកចាយថ្នាំញៀន រស់នៅក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ទី២-ឈ្មោះ ឃឹម ផល្លា ហៅអ៊ូក ភេទស្រី អាយុ ៣១ឆ្នាំ ទី៣-ឈ្មោះ គល់ សុភា អាយុ ២៨ឆ្នាំ ទី៤-ឈ្មោះ សៅ សុភារ៉ា អាយុ ១៧ឆ្នាំ ទី៥-ឈ្មោះ ស៊ុយ ប៊ុនធឿន អាយុ ១៧ឆ្នាំ និងទី៦-ឈ្មោះ ជឿន ស្រីម៉ុម ភេទស្រី អាយុ ២៥ឆ្នាំ ហើយអ្នកទាំង ៦នាក់ រស់នៅផ្ទះជួល និងផ្ទះពួកគេ ស្ថិតក្នុងភូមិត្រពាំងចឹកសា សង្កាត់កំពង់ឆ្នាំង៕
ប្រភពពី វត្តភ្នំ
