ការធ្វើអត្តសញ្ញាណប័ណ្ណសញ្ជាតិខ្មែរ នឹងត្រូវយកតម្លៃ១ម៉ឺនរៀល ចាប់ពីខែកក្កដា ឆ្នាំ២០១៤
រាជរដ្ឋាភិបាល
កម្ពុជា ប្រកាសថាការធ្វើអត្តសញ្ញាណប័ណ្ណសញ្ជាតិខ្មែរ
នឹងត្រូវយកតម្លៃ១ម៉ឺនរៀល ចាប់ពីថ្ងៃទី០១ខែកក្កដា ឆ្នាំ២០១៤
ដើម្បីជួសម្រាលការចំណាយដែលជាបន្ទុករបស់រដ្ឋាភិបាល។
សេចក្តីជូនដំណឹងរបស់ក្រសួងមហាផ្ទៃ ចុះថ្ងៃទី២៧ខែឧសភា ឲ្យដឹងថា ការយកតម្លៃ១ម៉ឺនរៀលនេះ គឺដើម្បី
ជួយសម្រាលបន្ទុករបស់រដ្ឋក្នុងការចំណាយថវិកាជាតិសម្រាប់ការ
ផ្តល់អត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋ
ដែលកន្លងមករាល់ការចំណាយទាំងអស់ ជាបន្ទុករបស់រដ្ឋជួយគាំទ្រ។
សេចក្តីជូនដំណឹងបន្តថា ការយកតម្លៃ១ម៉ឺនរៀលនេះ
គឺដើម្បីធានានិរន្តរភាពដល់ដំណើរការងារផ្តល់អត្តសញ្ញាណប័ណ្ណសញ្ជាតិ
ខ្មែរតាមរយៈការចូលរួមពីសំណាក់ប្រជាពលរដ្ឋខ្មែរជាមួយ
រាជរដ្ឋាភិបាល ក្នុងការអនុវត្តកាតព្វកិច្ចជាពលរដ្ឋខ្មែរ
ដែលជាគុណប្រយោជន៍ដល់ថវិកាជាតិ។
ក្រសួងមហាផ្ទៃ
ក៏បានអំពាវនាវដល់ប្រជាពលរដ្ឋដែលមានអាយុ១៥ឡើងទៅ
និងប្រជាពលរដ្ឋដែលមានអត្តសញ្ញាណប័ណ្ណសញ្ជាតិខ្មែររួចហើយ
ប៉ុន្តែអស់សុពលភាព
មេត្តាចូលរួមគាំទ្រដល់ដំណើរការផ្តល់អត្តសញ្ញាណប័ណ្ណ
តាមរយៈការធ្វើអត្តសញ្ញាណប័ណ្ណសញ្ជាតិខ្មែរត្រូវបង់ថ្លៃអាករចំនួន
មួយម៉ឺនរៀល។
កន្លងទៅ អ្នកនាំពាក្យក្រសួងមហាផ្ទៃ លោក ខៀវ
សុភ័គ មានប្រសាសន៍ថា គោលការណ៍ក្រសួងចេញ នាពេលថ្មីៗនេះ
សម្រាប់អ្នកធ្វើអត្តសញ្ញាណប័ណ្ណថ្មី គឺមិនត្រូវបានបង់លុយទេ
ហើយសម្រាប់អ្នកខូច ឬបាត់ដែលធ្វើជាលើកទីពីរ
តម្រូវឲ្យបង់លុយម្នាក់១ម៉ឺនរៀល។
យោងតាមប្រកាសរបស់ក្រសួងមហាផ្ទៃ
ចុះខែកក្កដា២០០៧ ប្រជាពលរដ្ឋដែលអាចធ្វើអត្តសញ្ញាណប័ណ្ណបាន
ត្រូវមានអាយុចាប់ពី១៥ឆ្នាំឡើងទៅ
ហើយអត្តសញ្ញាណប័ណ្ណសញ្ជាតិខ្មែរមានសុពលភាពរយៈពេល១០ឆ្នាំ។
នៅពេលផុតសុពលភាព សាម៉ីខ្លួនត្រូវស្នើសុំធ្វើសាជាថ្មីឡើងវិញ៕
ប្រភពពី vodhotnews.com
