ជម្លោះរវាងម្ចាស់ហាង និងភ្ញៀវ ព្រោះតែរឿង គិតលុយថ្លៃផឹកស៊ី ផ្អើលគេឯង
ភ្នំពេញ: ភ្ញៀវ
ចូលទៅផឹកស៊ី បានឈ្លោះប្រកែកគ្នា ជាមួយម្ចាស់ហាង ដោយសារតែមាន ការ
យល់ច្រឡំរឿងលុយ ព្រោះខាងម្ចាស់ហាងថា ភ្ញៀវផឹកស៊ី មិនទាន់ឱ្យលុយ
ប៉ុន្តែភ្ញៀវប្រាប់ថា បានឱ្យលុយទៅកូនចៅម្ចាស់ហាងរួចហើយ។ ហេតុការណ៍នេះ បានបង្កឱ្យការភ្ញាក់ផ្អើល កាលពីម៉ោងជាង ៧ យប់ ថ្ងៃទី៣ ខែមិថុនា ឆ្នាំ២០១៤ នៅក្នុងហាងផឹកស៊ីយីហោ កាហ្វេមេឌា នៅជិតកន្លែងធ្វើ ស្លាកលេខចាស់ ផ្លូវលេខ២១១ ស្ថិតនៅក្នុងសង្កាត់វាលវង់ ខណ្ឌ៧មករា។
ប្រភពព័ត៌មាន នៅកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញបុរស ចំនួន៥នាក់ បានចូលទៅផឹកស៊ីនៅហាងខាងលើ ក្រោយផឹកស៊ីរួចរាល់ បុរសម្នាក់ ក្នុងចំណោមបុរស៥នាក់ មិនចង់ឱ្យពួកម៉ាកចេញលុយ ក៏ដើរសំដៅទៅនារីម្នាក់ ហើយបានដកលុយ ក្រដាស៥០ ដុល្លារមួយសន្លឹក ដាក់ចូលទៅក្នុងសៀវភៅគិតលុយ ហើយបានដើរមកតុវិញ ដើម្បីចាំអាប់លុយ (មិនដឹងថាអស់ប្រាក់ប៉ុន្មានទេ)។ មួយសន្ទុះក្រោយមក មិនឃើញបុគ្គលិក ក្នុងហាងយកលុយ មកអាប់ ក៏ទៅសួរនាំ។ ពេលនោះ ភាគីម្ចាស់ហាង បាននិយាយទៅកាន់ភ្ញៀវថា មិនទាន់គិតលុយឱ្យហាងទេ តែភ្ញៀវបានប្រាប់ថា ឱ្យលុយទៅបុគ្គលិកស្រីរួចហើយ ទើបបង្កឱ្យមានការឈ្លោះ ប្រកែកគ្នាតែម្តង។
ក្រោយពេលកើតហេតុ សមត្ថកិច្ចចុះមកសម្រួល នៅក្នុងហេតុការណ៍នេះដែរ ហើយក្រុមភ្ញៀវដែលរងការចោទប្រកាន់ថា ផឹកស៊ីមិនទាន់ឱ្យលុយ បានសំណូមពរ ដល់សមត្ថកិច្ច សុំឱ្យហាងឆែកកាមេរ៉ាសុវត្ថិភាព ប៉ុន្តែម្ចាស់ហាងថា មិនបាច់ឆែកទេ ព្រោះកន្លែងឱ្យលុយនោះ នៅចំហៀងមិនអាចមើលឃើញទេ។ ចុងក្រោយ ភាគីខាងម្ចាស់ហាង បានប្រាប់ទៅភាគីភ្ញៀវថា ឲ្យទៅស្បថទាំងអស់គ្នា រួចខាងម្ចាស់ហាង ព្រមអាប់លុយឲ្យ៕V/s
ទិដ្ឋភាពនៅកន្លែងកើតហេតុ ដែលភ្ញៀវចូលទៅផឹកស៊ី បានឈ្លោះប្រកែកគ្នា ជាមួយម្ចាស់ហាង ដោយសារតែមានការយល់ច្រឡំរឿងលុយ
ប្រភពពី CEN
