ILO ជំរុញឲ្យរដ្ឋាភិបាលយក ចិត្តទុកដាក់ធានាសុវត្ថិភាព កម្មករនៅកន្លែងធ្វើការ
នៅ
ក្នុងថ្ងៃទី១ ឧសភា ទិវាពលកម្មអន្តរជាតិនេះ
អង្គការអន្តរជាតិខាងការងារ អាយឡូ (ILO)
បានចេញផ្សាយសេចក្តីថ្លែងការណ៍មួយ ជំរុញឲ្យរដ្ឋាភិបាល
និងភាគីពាក់ព័ន្ធ យកចិត្តទុកដាក់ធានាសុវត្ថិភាពកន្លែងធ្វើការ
និងសុខុមាលភាពរបស់កម្មករ និងនិយោជិត។
អង្គការអន្តរជាតិខាងការងារ អាយឡូ
បានអំពាវនាវឲ្យរដ្ឋាភិបាល និងភាគីម្ចាស់រោងចក្រ
យកចិត្តទុកដាក់ការពារគ្រោះថ្នាក់ របួស
និងស្លាប់របស់កម្មករនៅកន្លែងធ្វើការ
និងបង្កលក្ខណៈឲ្យកម្មករមានជីវភាពរស់នៅសមរម្យ
និងធ្វើការងារតាមម៉ោងពេលកំណត់ត្រឹមត្រូវ
និងគោរពសិទ្ធិជាមូលដ្ឋានរបស់កម្មករ និងនិយោជិត។
សេចក្តីថ្លែងការណ៍របស់អាយឡូ
ចេញផ្សាយចំថ្ងៃទី១ ឧសភា ទិវាពលកម្មអន្តរជាតិ បានសរសេរថា
មានមនុស្សប្រុសស្រីជាច្រើននាក់នៅលើពិភពលោក
កំពុងធ្វើការដោយគ្មានការការពារគ្រោះថ្នាក់ជាចាំបាច់
ហើយជាលទ្ធផល
ពួកគេបានទទួលគ្រោះថ្នាក់នៅកន្លែងធ្វើការរហូតដល់ស្លាប់ទៀតក៏
មាន។ គ្រោះថ្នាក់របស់កម្មករ និងនិយោជិត
មិនមែនមានតែរឿងគ្រោះថ្នាក់នៅកន្លែងធ្វើការតែមួយនោះទេ
តែមានរឿងប្រាក់ខែទាប ការធ្វើការច្រើនម៉ោងពេក
គ្មានយន្តការដោះស្រាយវិវាទការងារបានត្រឹមត្រូវ
និងការខ្វះសិទ្ធិជាមូលដ្ឋានក្នុងការងារ ជាដើម។
លោក ទន់ សោភ័ណ
អ្នកសម្របសម្រួលរបស់អង្គការអន្តរជាតិខាងការងារ នៅកម្ពុជា
មានប្រសាសន៍ថា ការិយាល័យអង្គការអន្តរជាតិខាងការងារ
តែងតែចូលរួមដោះស្រាយ និងជួយកម្មករកម្ពុជា ដែលមានការលំបាក
និងជួយផ្តល់ដំបូន្មានអំពីសុវត្ថិភាពកន្លែងធ្វើការដល់ភាគីម្ចាស់
រោងចក្រ និងអាជ្ញាធរ។
លោក ទន់ សោភ័ណ៖ «យើងបានធ្វើការច្រើន
ជាមួយដៃគូសង្គមយើងទាំងបី គឺរដ្ឋាភិបាល កម្មករ និងនិយោជក
គឺជំរុញឲ្យមានការយល់ដឹង និងអនុវត្តសុខភាព
និងសុវត្ថិភាពនៅកន្លែងធ្វើការ។ វិស័យសេដ្ឋកិច្ចសំខាន់របស់កម្ពុជា
គឺវិស័យកាត់ដេរនេះ គឺបានទទួលគោលការណ៍ណែនាំ និងបណ្តុះបណ្ដាល
ធ្វើម៉េចកែលំអសុខភាព
និងសុវត្ថិភាពនៅកន្លែងធ្វើការរបស់កម្មករនិយោជិតរបស់យើង
អានេះយើងបានធ្វើច្រើន។
គឺយើងជួយអនុវត្តផែនការមេរបស់ក្រសួងការងារ ស្តីអំពីសុខភាព
និងសុវត្ថិភាពនេះបានដោយជោគជ័យរយៈពេល ៥ឆ្នាំកន្លងមកនេះ»។
លោកបានបន្តឲ្យដឹងថា
កន្លងមកការណែនាំផ្សេងៗរបស់អង្គការអន្តរជាតិខាងការងារ
ដល់ភាគីពាក់ព័ន្ធ តែងតែបានទទួលការសហការ និងឆ្លើយតបជានិច្ច៖ «យើង
បានទទួលការឆ្លើយតបច្រើនពីខាងរោងចក្រសហគ្រាស មានន័យថា
រោងចក្រសហគ្រាសគាត់ចាប់ផ្ដើមផ្តល់អាហារដល់កម្មករ
បញ្ហាមួយទៀតដែលយើងជំរុញខ្លាំង គឺបន្ថយថេរវេលាធ្វើការយូរ។
គឺមានកម្មកររោងចក្រសហគ្រាសខ្លះ គាត់ធ្វើការយូរ។
អាហ្នឹងជួយកែលំអស្ថានភាពការងារផង និងជួយដល់សុខភាពផងដែរ»។
វិទ្យុអាស៊ីសេរី
មិនអាចទាក់ទងមន្ត្រីក្រសួងការងារ និងបណ្តុះបណ្តាលវិជ្ជាជីវៈ
ដើម្បីសុំការអត្ថាធិប្បាយបានទេ ប៉ុន្តែ លោក ផៃ ស៊ីផាន រដ្ឋលេខាធិការ
និងជាអ្នកនាំពាក្យទីស្ដីការគណៈរដ្ឋមន្ត្រីមានប្រសាសន៍ថា
រដ្ឋាភិបាលតែងយកចិត្តទុកដាក់ក្នុងកិច្ចការពារកម្មករជានិច្ច។
លោកបានឲ្យដឹងបន្ថែមថា រាល់គ្រោះថ្នាក់ការងារកើតឡើង
រដ្ឋាភិបាលតែងឲ្យក្រសួងជំនាញ និងភាគីពាក់ព័ន្ធ ចុះស្រាវជ្រាវ
និងកែលំអកុំឲ្យកើតមានគ្រោះថ្នាក់ទៀត។
លោក ផៃ ស៊ីផាន៖ «យើងបានចូលទៅពិនិត្យ
សាជាថ្មី គឺយើងមានការសហការជាមួយក្រសួងសុខាភិបាល មានពេទ្យពលកម្ម
បូកជាមួយក្រសួងការងារ
ដើម្បីទៅវាយតម្លៃបង្កើតលក្ខខណ្ឌការងារនៅទីកន្លែងការងារ
រួមទាំងអង្គការអន្តរជាតិមួយចំនួន ដើម្បីវាយតម្លៃ
និងបង្គាប់ឲ្យឆ្លើយតបលក្ខខណ្ឌការងារ»។
គ្រោះថ្នាក់នៅកន្លែងធ្វើការកើតមានជា
ញឹកញយនៅតាមរោងចក្រមួយចំនួននៅកម្ពុជា ដូចជា
ដួលសន្លប់ទាំងហ្វូងជាបន្តបន្ទាប់
ការបាក់ដំបូលរោងចក្រក្នុងពេលធ្វើការ ជាដើម
ប៉ុន្តែមិនមានតួលេខសរុបជាផ្លូវការ ឲ្យដឹងថា
មានកើតឡើងប៉ុន្មានករណីទេ៕
ប្រភពពី វិទ្យុអាស៊ីសេរី
