បន្ទាយមានជ័យ:  ​មាន​ករណី​ផ្អើលឆោឡោ​មួយ​កើតមាន​តាំងពី​ថ្ងៃត្រង់ ដល់​ល្ងាច​ថ្ងៃទី​២៧ ឧសភា​នេះ ដោយ​អ្នកស្រុក​នាំគ្នា​និយាយថា​មាន​គេ​ចាប់ពង្រត់​ក្មេង​សិស្សសាលា​ បឋមសិក្សា អូរ​អំបិល សង្កាត់​អូរ​អំបិល ក្រុង​សិរីសោភ័ណ ចំនួន​៣​នាក់ តាមពិត​ក្មេង​ទាំងនោះ​នាំគ្នា​ឆ្លងដែន​ទៅ​ថៃ​ហើយ​ត្រូវ​ទាហាន​ថៃ​ចាប់​។​
​    ​
​    ​ដំបូង​ឡើយ​មាន​សាក្សី​និយាយថា ខ្លួន​ឃើញ​មនុស្ស​រុញ​កង់​ក្មេង​សិស្សសាលា​ចេញ ហើយ​អូស​ក្មេង​៣​នាក់​នោះ​ឡើង​រថយន្ត​នីសា​ន់​១​បាំង​កន្លះ នៅលើ​ថ្នល់ជាតិ​លេខ​៥ ក្នុង​ក្រុង កាលពី​ថ្ងៃ​ព្រឹក​។ ដល់​ម៉ោងជាង ១១ ថ្ងៃ​ព្រឹក ស្ត្រី​ជា​ជីដូន​នៃ​ក្មេង​ទាំង​៣ បាន​ទៅ​សាលារៀន មិនឃើញ​ចៅ និង​ត្រូវ​គ្រូ​ប្រាប់ថា ពុំបាន​ឃើញ ក្មេង​សិស្ស​ទាំង​៣ មក​រៀន​ទេ​។ ជីដូន​ក៏​ភ័យ និង ប្ដឹង​សមត្ថកិច្ច អោយជួយរ​កចៅ​ខ្លួន​។ ក្មេង​ទាំង​៣ រស់នៅ​បីបាច់​ដោយ​ជីដូន​នៅ​សង្កាត់​អូរ​អំបិល ព្រោះ​ឪពុកម្ដាយ​វា ទៅ​ស៊ីឈ្នួល​ធ្វើការ​នៅ​ប្រទេស​ថៃ​។​
​    ​
​លោក​វរសេនីយ៍ សិទ្ធិ ឡោះ ស្នងការរង និង​ជា​នាយការិយាល័យ​កណ្ដាល​នគរបាល​ព្រហ្មទណ្ឌ ខេត្តបន្ទាយមានជ័យ ប្រាប់​គេហទំព័រ CEN ល្ងាច​ថ្ងៃទី​២៧ ឧសភា​ថា​: ទទួលបាន​ដំណឹង​នេះ នគរបាល​ខេត្ត ក្រុង ស្រុក និង​វរ​ការពារ​ព្រំដែន​ប្រទាក់ក្រឡា​គ្នា​ស្រាវជ្រាវ​ជាបន្ទាន់​។ ទីបំផុត​នគរបាល​ក្រុង​ប៉ោយប៉ែត វរ​៩១១ និង​នគរបាល​ប៉ុស្តិ៍​ច្រកទ្វារ​ប៉ោយប៉ែត បាន​ឲ្យ​ដឹងថា ក្មេង​៣​នាក់​នោះ ស្ថិតក្នុង​ចំណោម​ជនជាតិ​កម្ពុជា ៨​នាក់ ត្រូវ​ទាហាន​ឈុតខ្មៅ​ថៃ​ឃាត់ខ្លួន នៅ​ស្រុក​អារញ្ញ​ខេត្ត​ស្រះកែវ រួច​បញ្ជូន​ត្រឡប់មក​កម្ពុជា​វិញ​នៅ​ល្ងាច​ថ្ងៃទី​២៧ ឧសភា​នេះ​។​
​    ​
​ក្មេង​សិស្សសាលា​បឋមសិក្សា​អូរ​អំបិល​ទាំង​៣​នាក់​នោះ បើ​យោង​លោក​វរសេនីយ៍ សិទ្ធិ ឡោះ អោយដឹងថា ១:​ឈ្មោះ សុខ វិសាល ភេទ​ប្រុស អាយុ​១២​ឆ្នាំ , ២:​ឈ្មោះ សុខ ណង​មី ភេទ​ស្រី អាយុ​៦​ឆ្នាំ និង​ឈ្មោះ ចាន់ រតនា ហៅ​ថេត អាយុ​៦​ឆ្នាំ ភេទ​ប្រុស​។ ពួកគេ​រស់នៅ​ជាមួយ​ជីដូន​នៅ​ភូមិ​-​ឃុំ អូរ​អំបិល ក្រុង​សិរីសោភ័ណ ដោយ​ឪពុកម្ដាយ​ធ្វើការ​នៅ​ប្រទេស​ថៃ​។​
​សមត្ថកិច្ច​និយាយថា ការពិត​គ្មាន​នរណា​ចាប់ពង្រត់​ក្មេងៗ​ទាំងនេះ​ទេ គឺ​ពួកវា​នឹក​ឱ​ពុក ម្តាយ​ពេក​ក៏​នាំ​គ្ទៅ​រក​ឱ​ពុក​ម្តាយ​នៅ​ថៃ​ហើយ​ត្រូវ​សមត្ថកិច្ច​ថៃ​ ចាប់បញ្ជូន​មកវិញ​។​
​    ​
​លោក ឈី​ម វុទ្ធី នាយប៉ុស្តិ៍​នគរបាល​ស​ង្កា​ត់​អូរ​អំបិល អោយដឹងថា ជីដូន​បាន​ទៅ​ទទួល​ចៅ​វិញ ពី​អង្គការ​កល្យាណមិត្ត នៅ​ប៉ោយប៉ែត បន្ទាប់ពី​ទាហាន​ឈុតខ្មៅ​ថៃ បញ្ជូន​ពួកគេ​និង​ជនជាតិខ្មែរ​ដទៃទៀត​ម​ក សមត្ថកិច្ច​កម្ពុជា​វិញ​។​
​    ​
​ស្ត្រី​ឈ្មោះ សុខ ផាត អាយុ​៥៦​ឆ្នាំ ជា​ជីដូន , ស្រី្ត​ឈ្មោះ ម៉ា វៀន អាយុ​៥១​ឆ្នាំ ជា អ៊ុំ​ស្ត្រី នៃ​ក្មេង​ទាំង​៣ ប្រាប់​គេហទំព័រ CEN ល្ងាច​ថ្ងៃទី​២៧ ឧសភា​ថា ក្មេងៗ​ពិតជា​ត្រូវបាន​បាត់​រួច​រកឃើញ​នៅ​ស្រុកថៃ ហើយ​បាន​ប៉ូលិស ប៉េអឹម​និង​អង្គ​ការជួយ​ទាក់ទង​ប្រគល់អោយ​ខ្លួន​វិញ​។ ពួកខ្លួន​អរគុណ​សមត្ថកិច្ច​ទាំងអស់​៕T/L

ប្រភពពី CEN