សិស្សវិទ្យាល័យប្រុសស្រីមួយចំនួនកំពុងនិយមសេពគ្រឿង ស្រវឹងនិងល្បែងស៊ីសង ( មានវីដេអូ )
ភ្នំពេញ: បច្ចុប្បន្ន
គេឃើញមានសិស្សសាលាវិទ្យាល័យប្រុសស្រីមួយចំនួនតែងជួបជុំបបួលគ្នា
ផឹកគ្រឿងស្រវឹងនិងប្រព្រឹត្តល្បែងស៊ីសង
ខណៈពួកគេកំពុងស្ថិតនៅក្នុងវ័យសិក្សា។ពេលខ្លះពួកគេថែមទាំង
ចូលទៅក្នុងកន្លែងស៊ីផឹកទាំងឯកសណ្ឋានសិស្សថែមទៀតផង។លោកយង់គឹមអេងប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និង សន្ដិភាពបានប្រាប់CENថាលោកធ្លាប់សង្កេតឃើញមានសិស្សសាលាមួយចំនួន ប្រសិនបើគេត្រូវចូលរៀនម៉ោងមួយរសៀលគឺពួកគេមកតាំងពីម៉ោង១២ ថ្ងៃត្រង់ដើម្បីទៅផឹកមួយម៉ោងសិនទើបចូលរៀន ។នេះជាបញ្ហាប្រឈមមួយដែលតំរូវអោយមានវិធានការដើម្បីទប់ស្កាត់។ លោកបន្ដថា វិធានការដែលសមស្របក្នុងការទប់ស្កាត់នោះ ទី១.គឺត្រូវមានគោលនយោបាយគ្រប់គ្រងគ្រឿងស្រវឹងពីព្រោះនៅក្នុង ប្រទេសយើងអត់ទាន់មានគោលនយោបាយដើម្បីគ្រប់គ្រងគ្រឿងស្រវឹងដែល ធ្វើអោយការប្រើប្រាស់កាន់តែមានភាពគគ្រឹកគគ្រេង។នៅក្នុងប្រទេស ជាច្រើននៅលើពិភពលោកគេបានរៀបចំគោលនយោបាយនេះដោយគេធ្វើការកំណត់អាយុ នៃការប្រើប្រាស់និងមានវិធានការភ្លាមចំពោះកន្លែងចែកចាយណាដែលលក់ អោយក្មេងក្រោមអាយុនៃច្បាប់កំណត់។ទី២ត្រូវកំរិតភាពរកបាននៃ គ្រឿងស្រវឹងគឺធ្វើយ៉ាងណាអោយអាជ្ញាប័ណ្ណសំរាប់លក់គ្រឿងស្រវឹង ប្រសិនបើនរណាម្នាក់អត់មានអាជ្ញាប័ណ្ណទេគឺមិនអាចលក់គ្រឿងស្រវឹង បានទេព្រោះគ្រឿងស្រវឹងមិនមែនជាទំនិញធម្មតាឬទំនិញតំរូវជាមូលដ្ឋាន របស់មនុស្សទេ។ទី៣.ត្រូវតម្លើងពន្ធអោយថ្លៃចំពោះគ្រឿងស្រវឹង ព្រោះកាលណាពន្ធថ្លៃនោះតំលៃលើទីផ្សារក៏ថ្លៃដែរអញ្ចឹងម្នាក់ៗឃើញ វាថ្លៃមិនសូវចង់ទិញទេដូចនេះវាអាចធ្វើមានការអាក់ខានក្នុងការទិញ ផងដែរ។វិធានការចុងក្រោយនោះគឺកាត់បន្ថយការផ្សាយពាណិជ្ជកម្មនៃគ្រឿង ស្រវឺង និងទាមទារអោយមានការចូលរួមពីមាតាបិតា សាលា ផងដែរ។
លោក ជាង សុផា ជានាយកប្រតិបត្តិនៃអង្គការកម្មវិធីអភិវឌ្ឍន៍ធនធានយុវជន ក៏បានប្រាប់CENដែរថា ចំពោះបញ្ហាប្រឈមនេះគឺចាំបាច់ត្រូវតែមានតួអង្គសំខាន់៤ក្នុងការ ចូលរួមកាត់បន្ថយនិងទប់ស្កាត់ ដែលក្នុងនោះមានដូចជា ឪពុកម្ដាយ, សាមីខ្លូនផ្ទាល់, ក្រុមហ៊ុនរឺអ្នកចែកចាយគ្រឿងស្រវឹង និងរាជរដ្ឋាភិបាល។លោកបន្តថា ចំពោះក្រុមហ៊ុនរឺអ្នកចែកចាយគ្រឿងស្រវឹង ត្រូវមានការបញ្ជាក់ពត៌មានពីអាយុនៃការ ប្រើប្រាស់លើសំបកកំប៉ុងអោយបានច្បាស់លាស់ រីឯរដ្ឋាភិបាលត្រូវដាក់ពន្ធអោយកាន់តែខ្លាំង ព្រោះថាប្រសិនបើស្រាបៀរមានការឡើងថ្លៃអញ្ចឹងក្មេងៗសិស្សសាលាគ្មាន លទ្ធភាពទិញនោះបញ្ហានេះវាអាចកាត់បន្ថយបានខ្លះដែរ។
លោកគ្រូបង្រៀននៅវិទ្យាល័យម្នាក់ក្នុងរាជធានីភ្នំពេញបានប្រាប់ CENថា លោកគ្រូសង្កេតឃើញសិស្សសាលាមួយចំនួនបច្ចុប្បន្ន ខ្លះមានការជ្រួលជ្រើមចូលទៅសេពគ្រឿងស្រវឹងនៅកន្លែងមួយចំនួនដូចជា ក្លឹបកម្សាន្ដ,រង្គសាល,ខារ៉ាអូខេ។រីឯខ្លះទៀតប្រព្រឹត្តល្បែងស៊ីសង ទាំងពួកកំពុងស្ថិតនៅក្នុងវ័យសិក្សាដែលទង្វើនេះធ្វើអោយប៉ះពាល់ យ៉ាងធ្ងន់ធ្ងរដល់សីលធម៌សង្គមនិងវប្បធម៌ខ្មែរយើង។
លោកគ្រូបានបន្តថាពីមុនបើគេនិយាយពីការទៅកម្សាន្ដនៅក្លឹបគឺ យើងប្រាកដជាដឹងហើយថាទៅពេលល្ងាចរឺពេលយប់តែបច្ចុប្បន្នវាមិនដូច មុនទេគឺមានក្លឹបកម្សាន្ដបើកសំរាប់ពេលថ្ងៃដែលវាពិតជាបង្កលក្ខណៈ ងាយស្រួលមែនទែនដល់ពួកគេដែលចេញពីផ្ទះនៅពេលយប់មិនបាន ។ លោកគ្រូបន្ដថា បើអោយតែលោកគ្រូអប់រំប្រដៅទប់ស្កាត់តែម្នាក់ឯងវាមិនគ្រប់គ្រាន់ទេ គឺត្រូវមានការចូលរួមសហការគ្នារវាង មាតាបិតាអាជ្ញាធរនិងម្ចាស់ក្លឹបកម្សាន្ដ,រង្គសាល,ខារ៉ាអូខេ, ទាំងនោះផងដែរដើម្បីចូលរួមទប់ស្កាត់និងមិនត្រូវបណ្ដែតបណ្ដោយអោយ ពួកគេបន្តប្រព្រឹត្តទង្វើបែបនេះទៀតទេ។
អ្នកមីងដែលជាអ្នកលក់គ្រឿងម្ជូរនៅក្បែររង្វង់មូលសម្ដេចសង្ឃ ជួនណាតបានបង្ហើបប្រាប់CEN អោយដឹងដែរថា អ្នកមីងធ្លាប់បានឃើញមានសិស្សសាលាប្រុសស្រីមួយចំនួនបាននាំគ្នាមក ដូរសំលៀកបំពាក់នៅបង្គន់អនាម័យសាធារណៈដែលនៅក្បែររង្វង់មូលសម្ដេច សង្ឃជួនណាតដោយពួកគេដើរចូលជាឯកសណ្ឋានសិស្សសាលាហើយបែរដើរចេញមកវិញ ជាសំលៀកបំពាក់ធម្មតាទៅវិញ។
គួរបញ្ជាក់ផងដែរថា ក្នុងពេលថ្មីៗនេះរាជរដ្ឋាភិបាលកម្ពុជាបានចេញអនុក្រឹត្យមួយស្តីពី ការគ្រប់គ្រងមណ្ឌលកម្សាន្តទេសចរណ៍មនុស្សពេញវ័យដែលក្នុងអនុក្រឹត្យ មានគោលបំណងពង្រឹងការគ្រប់គ្រងមណ្ឌលកម្សាន្តទេសចរណ៍មនុស្សពេញវ័យដែល បម្រើឲ្យវិស័យទេសចរណ៍ នៅក្នុងព្រះរាជាណចក្រកម្ពុជា។ហើយអនុក្រឹត្យនោះក៏មានគោលដៅសំខាន់ៗ មួយចំនួនដូចជា៖
.ពង្រឹងការគ្រប់គ្រងមណ្ឌលកម្សាន្តទេសចរណ៍មនុស្សពេញវ័យឲ្យទទួលបាន នូប្រសិទ្ធភាព និងធានាបាននូវគុណភាពសេវាកម្មទេសចរណ៍។ចូលរួមប់ស្កាត់ផលប៉ះពាល់ អវិជ្ជមានក្នុងវិស័យទេសចរណ៍រក្សាបាននូវសណ្តាប់ធ្នាប់សុវត្ថិភាពព្រម ទាំធានាដល់ការថែរក្សាវប្បធម៌ ប្រពៃណីនិងសេចក្តីថ្លៃថ្នូររបស់ជាតិ។
.អនីតិជនមិនត្រូវបានអនុញ្ញាតឲ្យចូលទៅកាន់ទីបរិវេណមណ្ឌលកម្សាន្ត ទេសរណ៍មនុស្សពេញវ័យដូចជាឌីស្កូតែក និងរង្គសាលឡើយ។អនីតិជនអាចចូលទៅកម្សាន្តក្នុងបរិវេណមណ្ឌលកម្សាន្ត ទេសចរណ៍មនុស្សពេញវ័យដូចជា ខារ៉ាអូខេ និងបៀហ្គាឌិនបាន ក្នុងករណីឪពុក.ម្តាយឬក៏អាណាព្យាបាលទៅជាមួយដោយមានការធានាអះអាង ច្បាស់លាស់។
.អ្នកគ្រប់គ្រងនិងម្ចាស់អាជ្ញាបណ្ណទេសចរណ៍មណ្ឌលកម្សាន្តទេសចរណ៍ មនុស្ស ពេញវ័យត្រូវធ្វើបញ្ជរត្រួតពិនិត្យផ្ទៀងផ្ទាត់អត្តសញ្ញាបណ្ណអតិថិជន វ័យក្មេងទាំងអស់ដើម្បីធានាឲ្យបានការប្រតិបត្តិតាមកាតព្វកិច្ច របស់ខ្លួន៕M/s
ប្រភពពី CEN
