ពលរដ្ឋជាងមួយរយនាក់ឡើងមក សាលាខេត្តតវ៉ារឿងទាហានរំលោភយកដី
សៀមរាប៖
ប្រជាពលរដ្ឋ ដែលរស់នៅក្នុងភូមិត្រពាំងក្រសាំង
នៃឃុំស្រែណូយស្រុកវ៉ារិនប្រមាណ ជាង ១០០នាក់ នៅថ្ងៃទី២៣ ខែមេសា
ឆ្នាំ២០១៤ នេះ បានធ្វើដំណើរដោយគោយន្តកន្ត្រៃចំនួន ១១គ្រឿង
សម្រុកចូលមកក្រុងសៀមរាប ក្នុង បំណងសុំឲ្យ អភិបាលខេត្ត
ដោះស្រាយដីទំនាស់ រវាងទាហាន
និងក្រុមអ្នកភូមិ ក៏ប៉ុន្ដែត្រូវបានអភិបាលរងខេត្ដចុះជួបដោះ
ស្រាយ នៅពាក់កណ្ដាលផ្លូវ ត្រង់ចំណុចរង្វង់មូលស្រុកបន្ទាយស្រី
ដើម្បីកុំឲ្យប៉ះពាល់សណ្ដាប់ធ្នាប់នៅតាមដងផ្លូវ ។
ប្រជាពលរដ្ឋនៅឃុំស្រែណូយ
ស្រុកវ៉ារិន បានលើកឡើងថា ដីទំនាស់ខាងលើនេះចែកចេញជាពីរចំណុច
ទី១ត្រង់ចំណុចសង្កែរធំផ្ទៃដី ៣២១ហិកតា មានពលរដ្ឋ៩៥គ្រួសារ
ទី២ត្រង់ចំណុចអូរផ្អាវផ្ទៃដី៣៥០ហិកតា មានពលរដ្ឋ១៣០គ្រួសារ។
ប្រភពបន្តថា ការដែលពួកគាត់ លើកគ្នាមកនេះគឺបំណងឲ្យលោកអភិបាលខេត្ត
សម្រេចដោះស្រាយពីព្រោះដល់រដូវបង្កបង្កើនផលហើយ ពួកគាត់មិន
អាចធ្វើបាន ចំណែកឯខាងទាហាន
គឺដាក់គ្រឿងចក្រឈូសឆាយដាំដំឡូងជាបន្តបន្ទាប់។ អ្នកភូមិ
បានបន្ដថា ដីពួកគាត់បានកាន់កាប់
និងបង្កបង្កើនផលតាំងពីឆ្នាំ២០០៥។
ប៉ុន្ដែត្រូវទាហានកងពលលេខ៥ដកហូតយកជួលឲ្យឈ្មួញដាំដំឡូង
ដោយយកលេសធ្វើកន្លែងអភិវឌ្ឍន៍យោធា។ ទំនាស់ដីធ្លីនេះកើតឡើងនៅ
ឆ្នាំ២០១៣ ជាមួយយោធាកងពលលេខ៥ និងយោធភូមិភាគទី៤
ដែលមានផ្ទៃដីទំហំជិត៧០០ហិកតា ស្មើនឹងជាង១២៥គ្រួសារ
ស្ថិតនៅឃុំស្រែណូយ ស្រុកវ៉ារិន
ខេត្តសៀមរាប។ក្រោយមានហេតុការណ៏នេះ
ពួកគាត់បានប្តឹងទៅអាជ្ញាធរស្រុក-ខេត្ត
ប៉ុន្តែអាជ្ញាធរគ្រប់ជាន់ថ្នាក់ ចេះតែឲ្យរងចាំ
គឺចាំមួយឆ្នាំហើយមួយឆ្នាំទៀត។ លុះព្រឹកថ្ងៃទី២៣នេះ
ដោយពុំអាចចាំតទៅទៀតបាន ទើបពួកគាត់ សម្រេចលើកគ្នា
មកកាន់សាលាខេត្តសៀមរាបយ៉ាងនេះ។
ប្រជាពលរដ្ឋទាំងនោះបានឲ្យដឹងថា
បើអាជ្ញាធរខេត្ដមិនជួយដោះស្រាយទេ
ពួកគាត់នឹងធ្វើដំណើរទៅរាជធានីភ្នំពេញ
ដើម្បីឲ្យលោកនាយករដ្ឋមន្ត្រូី ហ៊ុន សែន ជួយអន្ដរាគមន៍ ។
នៅរសៀលថ្ងៃទី២៣ខែមេសានេះ
ប្រជាជនបានត្រឡប់ទៅគេហដ្ឋានវិញអស់ហើយ បន្ទាប់ពីលោក ប៊ុន
ថាឫទ្ធិ អភិបាលរងខេត្ដ និងជាអ្នកនាំពាក្យ សាលាខេត្តសៀមរាប
បានចុះជួបនៅស្រុកបន្ទាយស្រី ដោយធ្វើកិច្ចសន្យា
នឹងសន្យាទៅដោះស្រាយជូនពួកគេ នៅថ្ងៃស្អែកនេះ។
ប៉ុន្តែនៅកន្លែងកើតហេតុ មុនពេលក្រុមអ្នកភូមិចាកចេញ លោកប៊ុន ថារិទ្ធិ
ពុំធ្វើអត្ថាធិប្បាយជាមួយអ្នកកាសែតទេ៕
ប្រភពពី Free Press Magazine
