ផ្តល់សិទ្ទិដោយ៖dap-news.com

កោះកុង ៖ គ្រូបង្រៀនម្នាក់ និងបក្ខពួកម្នាក់ទៀត ជំនាញខាងដើរចែកចាយថ្នាំញៀន ធ្វើឱ្យយុវវ័យមួយ ចំនួន វង្វេងដើរមិនចូលសាលា ដោយសារ លោកគ្រូម្នាក់នេះ ដើរលក់ថ្នាំញៀន ឱ្យទៅយុវវ័យទាំងនោះ ប្រើប្រាស់ ។

ប្រតិបត្ដិការណ៍ ចុះបង្ក្រាបគ្រូបង្រៀននេះ ត្រូវបានធ្វើឡើង នៅរសៀលវេលាម៉ោង ៥,០០នាទីថ្ងៃទី២៥ ខែមេសា ឆ្នាំ២០១៤ ស្ថិតនៅចំណុចភូមិ៤ សង្កាត់ស្ទឹងវែង ក្រុងខេមរភូមិន្ទ ខេត្ដកោះកុង ។  ដោយជន សង្ស័យទាំង២នាក់ មាន ១- ឈ្មោះ ឯវ ឥស្សរ៉ា ភេទប្រុស អាយុ ៣១ឆ្នាំ មានទីលំនៅភូមិ៤ សង្កាត់ដង ទង់ ក្រុងខេមរភូមិន្ទ មានមុខរបរ គ្រូបង្រៀននៅអនុវិទ្យាល័យដងទង់ ២-ឈ្មោះ ម៉ុល សំណាង ភេទប្រុស អាយុ ៣១ឆ្នាំ មានទីលំនៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ មានមុខរបរ ជាកូនដៃធ្វើលូឱ្យគេ ហើយសមត្ថកិច្ច រឹបអូសបាននៅវត្ថុតាង បានថ្នាំញៀនចំនួន ៣៣គ្រាប់ ទូរស័ព្ទដៃ២គ្រឿង ។

ការចុះប្រតិបត្តិការនេះ មានដឹកនាំដោយ លោកវរសេនីយ៍ទោ យឹម ផេង ស្នងការរង និងជាប្រធានការិយា ល័យកណ្ដាលប្រឆាំងបទល្មើសខេត្ដ ព្រមទាំង មន្ដ្រីនៅក្រោមឱវាទជាច្រើននាក់ ។

លោកវរសេនីយ៍ទោ យឹម ផេង ស្នងការរង និងជាប្រធានការិយាល័យកណ្ដាល ប្រឆាំងបទល្មើស បាន មានប្រសាសន៍ថា ការឈានទៅធ្វើការឃាត់ខ្លួន គ្រូបង្រៀន និងបក្ខពួកខាងលើនេះ កម្លាំងលោកតាម ស៊ើបសង្កេតជាយូរណាស់មកហើយ ហើយជនសង្ស័យទាំង២នាក់នេះ បានធ្វើសកម្មភាពប្ដូរទីតាំង រហូត ដែលធ្វើឱ្យសម្ថតិកិច្ចឈឺក្បាលជាខ្លាំង ។ តែដោយកម្លាំងសមត្ថកិច្ចមានជំនាញច្បាស់លាស់ ទើបឈាន ទៅធ្វើការឃាត់ខ្លួនបាន ជនសង្ស័ទាំង២នាក់ ហើយរឹបអូសបានថ្នាំញៀនចំនួន ៣៣គ្រាប់ និងទូរស័ព្ទ ចំនួន ២គ្រឿងទៀតផង ហើយមុននឹងចាប់ជនសង្ស័យទាំង ២នាក់បាន គឺពិបាកខ្លាំងណាស់ ពីព្រោះជន សង្ស័យបានដឹងខ្លួន រត់ចូលទៅក្នុងព្រៃ តែសមត្ថកិច្ច នៅតែតាមប្រមាញ់ទាល់តែបាន ។

បើតាមការសួរនាំជនសង្ស័ឈ្មោះ ម៉ុក សំណាង នេះ គឺធ្លាប់ជាប់គុក ៥ដង ហើយ នៅព្រៃស តែនៅមិន រៀងចាល នៅតែប្រព្រឹត្ដដដែល ។ លោកបាន បញ្ជាក់ថា មុនឈានទៅធ្វើឃាត់ខ្លួន ជនសង្ស័យខាងលើ នេះ លោកបានឆ្លងយោបល់ លោកស្រី ម៉ាក នី ព្រះរាជអាជ្ញារង សាលាដំបូងខេត្ដ និងលោក ស្នងការ រួច ហើយ ទើបចុះប្រតិបត្ដិការ ។ ហើយលោកទទួលបទបញ្ជា ពីអគ្គនាយកដ្ឋាន និងលោកស្នងការ ដើម្បីការ ពារភូមិ ឃុំ មានសុវត្ដិភាព ជូន ប្រជាពលរដ្ឋនៅគ្រប់មូលដ្ឋាន ឱ្យមានសុវត្ថិភាពល្អទៅថ្ងៃមុខ ។ ចំពោះ ជន សង្ស័យទាំង២នាក់ខាងលើ លោកកំពុងកសាងសំណុំរឿង បញ្ជូនទៅតុលាការ ដើម្បីចាត់ការទៅតាមផ្លូវ       ច្បាប់ ។

ប្រជាពលរដ្ឋដែលដឹង នូវហេតុការណ៍នេះ បាននិយាយថា លោកមានការសប្បាយចិត្ដខ្លាំងណាស់ ដោយ កម្លាំងសមត្ថកិច្ច ចាប់គ្រូបង្រៀននេះបាន ហើយមិនដឹងសិស្សប៉ុន្មាននាក់ ដែលត្រួវគ្រូបង្រៀនរូបនេះ ពង្វក់ឱ្យប្រើប្រាស់ ពីព្រោះគាត់ជាគ្រូស្រាប់ តែលោកសូមឱ្យខាងប្រព័ន្ធផ្នែកតុលាការ ផ្ដន្ទាទោសឱ្យបាន យូរ កុំដោះលែងឱ្យសោះ ពីព្រោះជនទាំងនេះជាជនមើលឃើញតែប្រយោជន៍ខ្លួនឯង មិនគិតពីអនាគត យុវវ័យជំនាន់ក្រោយឡើយ ៕