ពីអាមេរិក លោក កឹម សុខា បង្ហាញជំហររឹងត្អឹង
ភ្នំពេញ: លោក
កឹម សុខា អនុប្រធានគណបក្សសង្គ្រោះជាតិ
បានបញ្ជាក់មកពីសហរដ្ឋអាមេរិកថា
លោកមិនព្រមទទួលយកការកែសម្រួលថ្ងៃបោះឆ្នោតពីខែកក្កដាមកធ្វើនៅ
ខែកុម្ភៈ ឆ្នាំ២០១៨ ដែលសម្តេចហ៊ុនសែន
បានជជែកជាមួយលោកសមរង្ស៊ីនោះទេ។ លោក កឹម
សុខា បានផ្តល់បទសម្ភាសន៍ដល់អ្នកកាសែត នៅថ្ងៃទី១០ ខែមេសា ឆ្នាំ២០១៤
ថា លោកបានដឹងពីការជជែកតាមទូរស័ព្ទរវាងលោកសមរង្ស៊ី
និងសម្តេចហ៊ុនសែន ព្រមទាំងក្រុមការងារគណបក្សទាំងពីរ
និងបានផ្តល់យោបល់ជាបន្តបន្ទាប់។ លោកបញ្ជាក់ថា
ជំហររបស់គណបក្សសង្គ្រោះជាតិ គឺដដែល នោះគឺការទាមទារបោះឆ្នោតឡើងវិញ
និងការផ្លាស់ប្តូរ កែទម្រង់គ.ជ.ប ជាស្ថាប័នធម្មនុញ្ញ
និងមានសមាសភាព ដែលគណបក្សទាំងពីរ បានព្រមព្រៀងគ្នា។ លោក កឹម សុខា បានគូសបញ្ជាក់ថា លោកមិនយល់ព្រម ទៅនឹងការកំណត់ការបោះឆ្នោត មុនកាលកំណត់ នាខែកុម្ភៈ ឆ្នាំ២០១៨ ដែលសម្តេចហ៊ុនសែន និងលោកសមរង្ស៊ី បានជជែកពិភាក្សាគ្នា កាលពីថ្ងៃទី៩មេសានោះទេ។ លោកកឹមសុខា បានពន្យល់ថា ការកែទម្រង់ស្ថាប័នរៀបចំការបោះឆ្នោត គ.ជ.ប រួមទាំងការចុះឈ្មោះអ្នកបោះឆ្នោតឡើងវិញ ជាដើម គឺត្រូវការពេលវេលាតែ១ឆ្នាំប៉ុណ្ណោះ អាចធ្វើបានហើយ។ ដូច្នេះការបោះឆ្នោតនោះ មិនត្រូវចាំដល់ឆ្នាំ២០១៨ ឡើយ។
យ៉ាងណាក៏ដោយ លោកកឹមសុខា បានបញ្ជាក់ពីបំណងរបស់លោក ថាចង់ដោះស្រាយបញ្ហា ហើយបានអំពាវនាវដល់មេដឹកនាំគណបក្សជាប់ឆ្នោតទាំងពីរ ឲ្យរកចំណុចកណ្តាលមួយ ដើម្បីស្រុះស្រួលគ្នា ឈានទៅបញ្ចប់ជម្លោះបោះឆ្នោត។
លោក កឹម សុខា បានបញ្ជាក់ “ខ្ញុំមិនប្រឆាំងនឹងការជជែកចរចាគ្នានោះទេ។ តែការជជែកនោះ ត្រូវតែធ្វើឡើង ដើម្បីផលប្រយោជន៍ប្រជាពលរដ្ឋ និងផលប្រយោជន៍ជាតិជាធំ”។
លោក កឹម សុខា ក៏បានឲ្យដឹងថា តាមផែនការ លោកនឹងត្រូវវិលត្រលប់មកពីអាមេរិកវិញ នៅថ្ងៃទី២៣មេសា ប៉ុន្តែបើមានការចាំបាច់ ពោលគឺការព្រមព្រៀងគ្នាណាមួយ នោះលោកអះអាងថា នឹងអាចវិលត្រឡប់មកកាន់កម្ពុជាវិញ នៅពេលណាមួយក៏បានដែរ។
អត្ថាធិប្បាយខាងលើរបស់លោកកឹមសុខា បានធ្វើឡើងភ្លាមៗ ខណៈដែលសម្តេចនាយករដ្ឋមន្ត្រី ហ៊ុន សែន បានបញ្ចេញលទ្ធផលនៃកិច្ចពិភាក្សាតាមទូរស័ព្ទរយៈពេល ៤៤ នាទី កាលពីព្រឹកថ្ងៃទី៩ ខែមេសា ឆ្នាំ២០១៤ ព្រមទាំងសេចក្តីព្រាង កិច្ចព្រមព្រៀង ដែលមាន ៣ ចំណុច រវាងគណបក្សប្រជាជនកម្ពុជា និងគណបក្សសង្គ្រោះជាតិ។
កិច្ចពិភាក្សានោះ ត្រូវបានសម្តេចហ៊ុនសែន បញ្ជាក់ថា សម្តេចបានលើកឡើងទៅកាន់លោកសមរង្ស៊ី អំពីការបោះឆ្នោតមុនកំណត់ គឺការបោះឆ្នោតឃុំសង្កាត់ នឹងធ្វើនៅខែកុម្ភៈ ឆ្នាំ២០១៧ និងការបោះឆ្នោតតំណាងរាស្ត្រ នឹងធ្វើនៅខែកុម្ភៈ ឆ្នាំ២០១៨។ ការកែសម្រួលថ្ងៃបោះឆ្នោតនេះ ដោយសារតែខែកក្កដា ជាខែភ្លៀង ហើយប្រជាកសិករ ត្រូវធ្វើស្រែចំការ ជាដើម។
សម្តេច ហ៊ុន សែន បានព្រមានទុកជាមុនថា បើសិនជាមេដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិ មិនអាចចុះហត្ថលេខាលើពង្រាងកិច្ចព្រមព្រៀង ដែលសម្តេចលើកបង្ហាញនៅពេលនេះទេ គឺជាកំហុសរបស់លោកកឹមសុខា អនុប្រធានគណបក្សសង្គ្រោះជាតិ មិនមែនជាកំហុសរបស់សម្តេច លោកសមរង្ស៊ី ឬក៏គណបក្សប្រជាជនកម្ពុជា និងគណបក្សសង្គ្រោះជាតិឡើយ៕T/L
លោក កឹម សុខា អនុប្រធានគណបក្សសង្គ្រោះជាតិ
ប្រភពពី CEN
