ស្ត្រីអភ័ព្វកំព្រាតែលតោល ត្រូវប្តីកំហូចរត់ចោល គ្មានលុយសម្រាលកូន និងទិញបាយហូប
រាជធានី
ភ្នំពេញ ៖ កម្មការិនីកាត់ដេរម្នាក់
ជាកូនកំព្រាអត់មានសាច់ញាតិ
ពេលរស់នៅជាមួយប្តីមានផ្ទៃពោះ ៤ខែ
ប្តីក៏រត់ចោលបាត់ស្រមោល ដល់ថ្ងៃសម្រាលកូនទៅហើយ
មិនទាន់មានលុយមួយរៀលនៅនឹងខ្លួន
ហើយស្ត្រីដ៏អភ័ព្វម្នាក់នេះមានឈ្មោះ ផុន សាវ៉េត អាយុ ២៥ឆ្នាំ ជាកម្មការិនីកាត់ដេរ មាន
ទីលំនៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ
មានស្រុកកំណើត នៅភូមិព្រៃមូ ស្រុកបូរីជលសា ខេត្តតាកែវ បានឲ្យដឹងថា
ខ្លូនជាកូនកំព្រាឪពុកម្តាយ ស្លាប់ចោលអត់មានបងប្អូនបង្កើតទេ
មានតែបងប្អូនជីដូនមួយ ទៅធ្វើកម្មករនៅប្រទេសថៃ អស់ហើយ ។នាងបានចាកចេញពីស្រុកកំណើត មកនៅភ្នំពេញ ធ្វើការនៅរោងចក្រ ស្នាក់នៅបន្ទប់ជួល ក្រោយមកបានស្គាល់គ្នា ជាមួយឈ្មោះ ឌុប បឿន ភេទប្រុស អាយុ ២៣ឆ្នាំ មុខរបរធ្វើស្រែ ក៏បានយកគ្នាជាប្តីប្រពន្ធ រស់នៅជាមួយគ្នាបានមួយឆ្នាំ នាងមានផ្ទៃពោះ ៤ខែ ស្រាប់តែប្តីសុំទៅលេងម្តាយ នៅស្រុកកំណើត ក៏ទៅបាត់រហូត លែងឃើញត្រឡប់មកវិញ ទុកឲ្យនាងនៅតែម្នាក់ឯង ធ្វើការទាំងមានផ្ទៃពោះ រហូតជិតគ្រប់ខែសម្រាលកូន ទើបនាងឈប់ធ្វើការ អត់មានលុយចាយវាយប្រចាំថ្ងៃ បានខ្ចីលុយគេអស់ ១០០ដុល្លារហើយ ដោយសន្យាថា ពេលសម្រាលកូនរួច នាងចូលធ្វើការរកប្រាក់សងវិញ ។
រហូតដល់វេលាម៉ោង ២រសៀលថ្ងៃទី៧ ខែមីនា ឆ្នាំ២០១៤ ស្រាប់តែនាងឈឺពោះ សម្រាលកូន បានទៅមន្ទីរពេទ្យបង្អែកពោធិ៍ចិនតុង ទាំងអត់មានលុយ នៅជាប់នឹងខ្លួន ពេលទៅដល់មន្ទីរពេទ្យ គ្រូពេទ្យពិនិត្យឃើញថា សុខភាពទារកក្នុងផ្ទៃខ្សោយពេក ទាល់តែធ្វើការវះកាត់ទើបសម្រាលបាន ហើយនៅមន្ទីរពេទ្យ អត់មានឧបករណ៍គ្រប់គ្រាន់ បានដឹកបន្តទៅមន្ទីរពេទ្យព្រះកុសុមៈ ។ គ្រូពេទ្យពិនិត្យឃើញថា កូនជិតដល់ម៉ោងសម្រាល ហើយមិនអាចធ្វើការវះកាត់បានទេ ដូច្នេះជីវិតរបស់នាង ត្រូវប្រឈមនឹងភាពជូរចត់ខ្លាំងណាស់ កំពុងដង្ហោយហៅរកសប្បុរសជនឲ្យជួយ៕
ប្រភពពី វត្តភ្នំ
