បើតាមពាក្យបណ្តឹងរបស់ ឈ្មោះ កែវ មករា អាយុ ២៥ឆ្នាំ ស្នាក់នៅផ្ទះលេខ៧២  ផ្លូវលេខ៣១បេតេ ភូមិសន្សំកុសល១ សង្កាត់បឹងទំពុន ខណ្ឌមានជ័យ ដែលជាជនរងគ្រោះ បានឲ្យដឹងថា មុនពេលកើតហេតុ កាលពីវេលាម៉ោង២១ និង២០នាទី ថ្ងៃទី០១ ខែមីនា ឆ្នាំ២០១៤ ឈ្មោះ គង់ សុភ័ក្រ បានទូរស័ព្ទហៅឲ្យ ចេញពីផ្ទះ ខណ:ជនរងគ្រោះ បានទៅជួបឈ្មោះ គង់ សុភ័ក្រ និងបក្ខពួកម្នាក់ទៀត ឈ្មោះ ឌន ចិន្តា ហៅកុក រួចក៏ឌុបគ្នាទៅម្តុំក្បាលថ្នល់ រួចក៏បង្ហួសទៅផ្ទះជនសង្ស័យឈ្មោះ កុក ស្ថិតនៅផ្ទះលេខ៩៦ ផ្លូវ៥១២ សង្កាត់ផ្សារដើមថ្កូវ ។

ពាក្យបណ្តឹងជនរងគ្រោះ ឈ្មោះ កែវ មករា បន្តថា លុះមកដល់ផ្ទះឈ្មោះ កុក នោះ ក៏ត្រូវឈ្មោះ កុក បានយកដាវសុាំម៉ូរៃ មកភ្ជង់បំពង់កជនរងគ្រោះ  កែវ មករា ហើយឈ្មោះ កុក បានបញ្ជាឲ្យឈ្មោះ គង់ សុភ័ក្រ ដោះយកនាឡិកាដៃ ទូរស័ព្ទដៃ និងលូកយកកាបូបលុយ របស់ឈ្មោះ កែវ មករា ប្រគល់ឲ្យទៅឈ្មោះ កុក រួចឈ្មោះ កុក បានយកទាំងម៉ូតូរបស់ជនរងគ្រោះ កែវ មករា ជិះចេញទៅបាត់ និងដោយបានចាក់សោបង្ខាំ ជនរងគ្រោះឲ្យនៅក្នុងផ្ទះ ជបសង្ស័យឈ្មោះ កុក រហូតដល់ម៉ោង ៣រសៀល ថ្ងៃទី២ ខែមីនា ឆ្នាំ២០១៤ ទើបជនរងគ្រោះរិះរកវិធី រំដោះខ្លួនចេញរួច ហើយក៏បានមកប្តឹងនគរបាលប៉ុស្តិ៍រដ្ឋបាលផ្សារដើមថ្កូវ ជួយអន្តរាគមន៍ ស្រាវជ្រាវតាមចាប់ជនសង្ស័យទាំង២នាក់ ឈ្មោះ គង់ សុភ័ក្រ និងឈ្មោះ ឌន ចិន្តា ហៅ កុក ។

យោងតាមពាក្យបណ្តឹងរបស់ជនរងគ្រោះ សមត្ថកិច្ចនគរបាលផ្សារដើមថ្កូវ ដឹកនាំដោយលោក សេង វណ្ណ: បានស្រាវជ្រាវ ចាប់ បានជនសង្ស័យម្នាក់ ឈ្មោះ គង់ សុភ័ក្រ អាយុ ២២ឆ្នាំ ស្បាក់នៅផ្ទះលេខ១៨០ស្ទួន ផ្លូវលេខ៣១បេតេ ភូមិ សន្សំកុសល១ សង្កាត់បឹងទំពុន ខណ្ឌមានជ័យ ។ ចំណែកបក្ខពួកដែលជាជនដៃដល់ ឈ្មោះ ឌន ចិន្តា ហៅកុក អាយុ ៣២ឆ្នាំ ស្នាក់នៅផ្ទះលេខ៩៦ ផ្លូវ៥១២ សង្កាត់ផ្សារដើមថ្កូវ ខណ្ឌចំការមន បានរត់គេចខ្លួនបាត់ ជាមួយម៉ូតូរបស់ជនរងគ្រោះ ផងដែរ។

បច្ចុប្បន្នជនសង្ស័យ ឈ្មោះ គង់ សុភ័ក្រ ត្រូវបាននគរបាលប៉ុស្តិ៍ផ្សារដើមថ្កូវ កសាងសំណុំរឿង បញ្ជូនទៅ ឃុំខ្លួននៅ អធិការដ្ឋាននគរបាលខណ្ឌចំការមន ដើម្បីចាត់ការបន្តតាមនិតិវិធីច្បាប់៕