អ.ប.ព បង្ហាញមុខមន្ត្រី ៣នាក់ ដែលមិនព្រម ប្រកាសទ្រព្យ សម្បត្តិ និងបំណុល
រាជធានីភ្នំពេញ ៖ អង្គភាពប្រឆាំងអំពើពុករលួយហៅកាត់ថា (អ.ប.ព) បានបង្ហាញមុខអតីតទីប្រឹក្សាលេខាធិការដ្ឋានព្រឹទ្ធសភា ចំនួន០២នាក់ និងអតីតសមាជិកក្រុមប្រឹក្សា សង្កាត់ទឹកថ្លា ម្នាក់ ដែលបានគេចវេះ មិនប្រកាសទ្រព្យសម្បត្តិ និងបំណុលឡើយ។
បើតាមសេចក្តីជូនដំណឹង របស់ អ.ប.ព ចុះថ្ងៃទី២៦ ខែមីនា ឆ្នាំ២០១៤បានសរសេរថា រហូត មកដល់ពេលនេះ បុគ្គលចំនួន០២នាក់ គឺលោក វង្ស សុភាព អតីតទីប្រឹក្សាអគ្គលេខាធិការដ្ឋានព្រឹទ្ធសភា ឋានៈស្មើរដ្ឋលេខាធិការ និងលោកឃាង លាភ អតីតទីប្រឹក្សាអគ្គលេខាធិការដ្ឋានព្រឹទ្ធសភាឋានៈស្មើអគ្គនាយក មិនបានមក បំពេញកាតព្វកិច្ច ក្នុងការប្រកាសទ្រព្យសម្បត្តិ និងបំណុលឡើយ។
អ.ប.ព ក៏ដូចជា ក្រុមជនបង្គោលប្រឆាំងអំពើពុករលួយប្រចាំអគ្គលេខាធិការដ្ឋានព្រឹទ្ធសភា បានខិតខំទំនាក់ទំនងជាច្រើនសា ប៉ុន្តែបុគ្គលទាំង០២នាក់ បានព្យាយាមគេចវេះ និងផ្តាច់ទំនាក់ទំនងទៅវិញ។ ប្រការ នេះ បង្ខំឲ្យអង្គភាពប្រឆាំងអំពើពុករលួយ ត្រូវធ្វើការផ្សព្វផ្សាយជាសាធារណៈម្តងទៀត ដោយអញ្ជើញបុគ្គលទាំងពីរ ចូលមកប្រកាសទ្រព្យសម្បត្តិ និងបំណុល ឲ្យបានមុនថ្ងៃទី៣០ ខែមេសា ឆ្នាំ២០១៤ ជាកំហិត។
សេចក្តីជូនដំណឹង បានឲ្យដឹងទៀតថា ដោយឡែក ការប្រកាសទ្រព្យសម្បត្តិ និងបំណុលរបស់ សមាជិកក្រុមប្រឹក្សា ឃុំ សង្កាត់ អាណត្តិទី៣ ក្នុងឆ្នាំ២០១២ នៅបុគ្គលម្នាក់ ដែលមិនបានប្រកាសទ្រព្យសម្បត្តិ និងបំណុល។ អ.ប.ព ក៏ដូចជា ក្រុមជនបង្គោលប្រឆាំងអំពើពុករលួយ ប្រចាំនៅក្រសួងមហាផ្ទៃ ផ្នែករដ្ឋបាលស៊ីវិល បានខិតខំទំនាក់ទំនងបុគ្គលនេះ ជាច្រើនលើកច្រើនសា ប៉ុន្តែបុគ្គលនេះ បាន គេចវេះ និងផ្តាច់ទំនាក់ទំនងផងដែរ។
អ.ប.ព បានបញ្ជាក់ថា អ្នកដែលមិនប្រកាសទ្រព្យសម្បត្តិ និងបំណុលនឹងត្រូវផ្តន្ទាទោសតាមមាត្រា៣៨ នៃច្បាប់ស្តីពីការប្រឆាំងអំពើពុករលួយ ដែលបានកំណត់ជាប់ពន្ធនាគារ ពីមួយខែទៅមួយឆ្នាំ និងពិន័យជាប្រាក់ពី ១០ ម៉ឺនរៀល ទៅ ២ លាន ហើយត្រូវបង្ខំឲ្យធ្វើការប្រកាសទ្រព្យសម្បត្តិជូនអង្គភាពប្រឆាំង អំពើពុករលួយ ហើយបើរឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេដង៕
ប្រភពពី Free Press Magazine
