រតនគិរី៖ លោកឧត្តម សេនីយ៍ត្រី គឹម រស្មី មេបញ្ជាការ អាវុធហត្ថខេត្តរតនគិរី បានណែនាំ ឲ្យមន្រ្តី អាវុធហត្ថ តាមមូលដ្ឋាន គ្រប់បណ្តា ស្រុក-ក្រុង អនុវត្តន៍គោល យោបាយ ភូមិ-ឃុំ មានសុវត្ថិភាព របស់រាជរដ្ឋា ភិបាលកម្ពុជា ជូនប្រជាពលរដ្ឋ ក្នុងមូលដ្ឋាន របស់ខ្លួន ពោលត្រូវលុប បំបាត់អំពើបទ ល្មើសផ្សេងៗ ដែលកើតមានឡើង ។

ជាក់ស្តែង ជនសង្ស័យ២នាក់ ក្នុង ករណីប្រើ អំពើហិង្សា ដោយចេតនា ត្រូវបានកម្លាំងអាវុធហត្ថ មូលដ្ឋាន ស្រុកអូរយ៉ាដាវ សហការ ជាមួយកម្លាំង អាវុធហត្ថ ក្រុងបានលុង ឃាត់ខ្លួន បានកាលពីវេលាម៉ោង៩យប់ ថ្ងៃទី១៣ ខែមីនា ឆ្នាំ២០១៤ បន្ទាប់ពីជនសង្ស័យ ទាំង២នាក់ នេះធ្វើសកម្មភាព រួចជិះម៉ូតូរត់មកលាក់ខ្លួន នៅផ្ទះពូ ក្នុងក្រុងបានលុង ខេត្តរតនគិរី ។

លោកវរសេនីយ៍ត្រី សុខ មីន មេបញ្ជាការ អាវុធហត្ថ ស្រុកអូរយ៉ាដាវ ប្រាប់ឲ្យដឹងថា ជនដៃដល់ទាំង២នាក់ ខាងលើ បានប្រើអំពើហិង្សា ដោយចេតនា ដោយប្រើកូនពូថៅ កាប់ទៅលើជនរងគ្រោះ ៥-៦ ពូថៅ ត្រូវដងខ្លួន និងក្បាល ហូរឈាម ជោគដី របួសជាទម្ងន់ បញ្ជូនទៅ សង្គ្រោះបន្ទាន់ នៅមន្ទីរពេទ្យបង្អែក ខេត្តរតនគិរី ។

ហេតុការណ៍នេះ កើតឡើងកាលពីវេលា ម៉ោង៥ល្ងាច ថ្ងៃទី១៣ ខែមីនា ឆ្នាំ២០១៤ ស្ថិតនៅ ក្នុងភូមិឡុំឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។ លោកមេបញ្ជាការរូបនេះ ប្រាប់បន្តទៀតថា ជនរងគ្រោះមាន ឈ្មោះ ម៉េង អ៊ី របួសធ្ងន់ ។

ចំណែកឯជនដៃដល់ ទី១ ឈ្មោះ ម៉ាន រ៉វីន អាយុ២៦ឆ្នាំ ជនជាតិខ្មែរឥស្លាម មុនរបរកម្មករ រើសគ្រាប់ស្វាយចន្ទី ស្នាក់ នៅភូមិឡុំ ឃុំប៉ក់ញ៉ៃ ស្រុកអូរយ៉ាដាវ ទី២-ឈ្មោះ អ៊ឹម រ៉ន អាយុ២០ឆ្នាំ ជនជាតិខ្មែរឥស្លាម មុខរបររើស គ្រាប់ស្វាចន្ទី ស្នាក់នៅ ភូមិ-ឃុំ ជាមួយគ្នា។

លោកវរៈសេនីយ៍ត្រី សុខ មីន បន្ថែមឲ្យដឹងទៀតថា ករណីប្រើអំពើហិង្សា ដោយចេតនា ខាងលើនេះ ផ្តើមឡើងដោយ លុយចំនួន៥ម៉ឺនរៀល ពោលគឺ រវាងជនរងគ្រោះ និងជនដៃដល់ ជាអ្នកស្គាល់គ្នា ហើយលុយចំនួន ៥ម៉ឺននេះ ជារបស់ជនរងគ្រោះ ត្រូវបានជនដៃដល់ ខ្ចីស៊ីចាយទាំងអស់គ្នា កន្លងមក។ លុះដល់ពេល ជនដៃដល់ទាំង២នាក់ ខាងលើសងលុយ មិនគ្រប់ចំនួន ក៏កើតហិង្សា តែម្តង។

បច្ចុប្បន្ន ជនសង្ស័យក្នុង ករណីហិង្សា ដោយចេតនា ខាងលើនេះ ត្រូវបានកម្លាំងអាវុធហត្ថ មូលដ្ឋាស្រុកអូរយ៉ាវ ឃុំខ្លួនបណ្តោះអាសន្ន ដើម្បីកសាងសំណុំរឿង បញ្ជូនទៅសាលាដំបូង ខេត្តចាត់ការតាមច្បាប់ ៕