ក្រុមចោរ២នាក់បាញ់ប្លន់យកម៉ូតូធំនៅមុខផ្ទះជនរងគ្រោះក្នុងភូមិជម្ពូវ័ន្ត
ករណីប្លន់ប្រដាប់អាវុធខាងលើនេះកើតឡើងកាលពវេលាម៉ោង៥និង៤៥ នាទីព្រឹក ថ្ងៃទី៣០ ខែមករា ឆ្នាំ២០១៣ នៅចំណុចខាងក្រោយមន្ទីរពេទ្យឡាំ ប៊ុនថន ក្នុងភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ ។
ជនរងគ្រោះមានឈ្មោះ សេង ប៊ុនថា អាយុ២៣ឆ្នាំ រស់នៅភូមិ-សង្កាត់កើតហេតុខាងលើ ជិះម៉ូតូធំ ម៉ាកDuke ពណ៌ខ្មៅ ពាក់ស្លាកលេខភ្នំពេញ 1CC-7119 ។ ចំណែកក្រុមជនសង្ស័យជិះម៉ូតូម៉ាកហុងដាសេ១២៥ ពណ៌ខ្មៅ មិនចាំស្លាកលេខ ក្រោយពេលបាញ់ប្លន់យកម៉ូតូហើយជនសង្ស័យទាំង២នាក់ជិះគេចខ្លួនបាត់ ។
តាមសម្តីរបស់ឳពុកជនរងគ្រោះបានឲ្យដឹងថា កូនរបស់គាត់បានជិះម៉ូតូមកពីភ្នំពេញតាំងពីព្រលឹមស្រាងៗ ដោយជិះម៉ូតូម្នាក់ឯង ។ ពេលធ្វើដំណើរតាមផ្លូវសង្ស័យមានក្រុមចោរតាមពីក្រោយក៏មិនដឹង បានជាកូនរបស់គាត់ជិះម៉ូតូមកដល់មុខផ្ទះក៏គោះទ្វារហៅគាត់ឲ្យ បើកទ្វារក៏មានជនសង្ស័យជិះមកដល់ដែរ ។
ឳពុកជនរងគ្រោះបន្តថា បន្ទាប់ពីកូនគាត់គោះទ្វារហើយនោះគាត់ក៏ដើរទៅបើកទ្វារ ស្រាប់តែឃើញជនសង្ស័យបានដកកាំភ្លើងកា៤៥មួយដើមបាញ់សំដៅកូនរបស់ គាត់ចំនួន២គ្រាប់ចំគល់ដោះបណ្តាលឲ្យដេកស្លាប់ភ្លាមៗនៅមុខផ្ទះ ហើយជនសង្ស័យបានយកម៉ូតូកូនរបស់គាត់ជិះគេចខ្លួនបាត់ស្រមោល ។
បន្ទាប់ពីមានការរាយការណ៍អ្នកក្រុមគ្រួសារជនរងគ្រោះលោកអធិការ ខណ្ឌពោធិ៍សែនជ័យបានចាត់កម្លាំងចុះទៅកន្លែងកើតហេតុនិងស្រាវជ្រាវ តាមរកមុខសញ្ញាជនសង្ស័យប្លន់ប្រដាប់អាវុធទាំង២នាក់មកផ្តន្ទាទោស តាមច្បាប់ ។
ក្រោយកើតហេតុបន្ទាប់ពីសមត្ថកិច្ចជំនាញធ្វើកោសល្យវិច័យសាកសពជន រងគ្រោះរួចសមត្ថកិច្ចបានប្រគល់សពឲ្យក្រុមគ្រួសារយកទៅធ្វើបុណ្យ តាមប្រពៃណី ។
ករណីខាងលើនេះអ្នករស់នៅម្តុំកន្លែងកើតហេតុខាងលើនិយាយថា ការប្លន់ប្រដាប់អាវុធនេះពិតជាសាហាវមែនដោយជនសង្ស័យហ៊ានបាញ់ប្លន់ នៅមុខផ្ទះជនរងគ្រោះតែម្តង ដែលករណីនេះអាចជាគម្រោងទុកមុនរបស់ក្រុមជនប្រដាប់អាវុធខាងលើ ។ ប៉ុន្តែទោះបីជាយ៉ាងណាសមត្ថកិច្ចនៅមិនទាន់អះអាងពីព័ត៌មានច្បាស់ការ ណាមួយនៅឡើយទេ ៕
ប្រភពពី នគរវត្ត
