ក្មេងឈាមរាវយកផាវគ្រាប់បែក ច្នៃរំសេវដាក់កំប៉ុងលេង ផ្ទុះរបួសធ្ងន់ស្រាល ៤នាក់
លោក ឃុំ សយ អធិការស្រុករតនមណ្ឌល បានឲ្យដឹងថា យុវជនដែល រងគ្រោះទាំង ៤នាក់ រួមមានទី១-ឈ្មោះ ចេក ចាន់ធួន អាយុ ២០ឆ្នាំ រងភ្នែកសងខាង រងរបួសធ្ងន់ ទី២-ឈ្មោះ ចេក ចាន់រិទ្ធិ អាយុ ១៥ឆ្នាំ របួសដៃនិងទ្រួង របួសស្រាល ទី៣-ឈ្មោះ ខុម ចិន អាយុ ១៥ឆ្នាំ របួសដៃនិងមុខ របួសធ្ងន់ ទី៤-ឈ្មោះ នុយ សុភាព អាយុ ១៨ឆ្នាំ របួសសុះជើងសងខាង របួសស្រាល។ ទាំង ៤នាក់នេះ រស់នៅភូមិជាមន្ត្រី ឃុំត្រែង ស្រុករតនមណ្ឌល ខេត្តបាត់ដំបង កំពុងសង្គ្រោះ នៅក្នុងមន្ទីពេទ្យអេមេស៊ិនស៊ី ខេត្តបាត់ដំបង នៅឡើយ។
ក្រុមយុវជនរងគ្រោះ បានប្រាប់សមត្ថកិច្ចថា ពួកគេបាននាំគ្នា ទិញផាវគ្រាប់បែក មកដុតលេង ក្រោយមកដោយចង់ស្តាប់ សំឡេងផ្ទុះអោយកាន់តែខ្លាំង ក៏យករំសេវផាវ ទៅបុកដាក់ក្នុងកំប៉ុង ហើយពេលកំពុងបុករំសេវ ដាក់ចូលក្នុងកំប៉ុងនោះ ស្រាប់តែបែកផ្កាភ្លើង ឆេះផ្ទុះតែម្ដង។ ប្រជាពលរដ្ឋ រស់នៅក្បែរកន្លែងកើតហេតុ បានប្រាប់សមត្ថកិច្ចថា នៅថ្ងៃត្រង់ថ្ងៃទី២៤ ខែមករា មានឮសំឡេងផ្ទុះ ដូចបែកកង់ឡាន ហើយឃើញក្រុមយុវជន ៤នាក់ រត់ស្រែកឲ្យគេជួយ ទើបនាំគ្នាភ្ញាក់ផ្អើល ទៅមើលតែម្ដង។
ក្រុមគ្រួសាររងគ្រោះ បានបញ្ជាក់ប្រាប់ថា ឈ្មោះ ចេក ចាន់ធួន អាយុ ២០ឆ្នាំ រងរបួសភ្នែកនោះ គឺពេទ្យខ្វេះយក គ្រាប់ភ្នែកខាងស្ដាំ ម្ខាងចេញហើយ។ ចំណែក ៣ នាក់ទៀត ដែលរងរបួសធ្ងន់ស្រាល កំពុងព្យាបាលនៅឡើយ។ ដូច្នេះសូមប្អូនៗ ឈប់លេងគ្រឿងផ្ទុះទៀត ហើយសូម អាណាព្យាបាល ជួយណែនាំកូនចៅ កុំអោយទិញផាវ យកមកលេង ផ្តេសផ្តាស ដែលអាចបង្កឲ្យមានគ្រោះថ្នាក់៕
ប្រភពពី វត្តភ្នំ
