តាកែវ ៖ គូស្វាមី ដែលទើបតែរៀបការ បានពីរថ្ងៃ រួមទាំងម្ដាយក្មេកផង បានរងរបួសជាទម្ងន់ បន្ទាប់ពីកូន ប្រសារបានឌុបប្រពន្ធ និងម្ដាយក្មេកផង មកលេង ផ្ទះម្ដាយក្មេកខាងកូនកំលោះ ក៏ត្រូវជួបនឹងគ្រោះអកុសល ដោយជិះម៉ូតូទៅបុក និងបង្គោលស្លាកសញ្ញាតាមដងផ្លូវ បណ្ដាលឲ្យទាំង៣នាក់ប្រពន្ធ និងកូនប្រសារ ព្រមទាំងម្តាយក្មេករងរបួសជាទម្ងន់ ។
ហេតុការណ៍គ្រោះថ្នាក់ចរាចរណ៍នេះ បានកើតឡើង នៅវេលាម៉ោង២ និង៣០នាទី ថ្ងៃអង្គារ៍ ទី២៨ ខែ មករា ឆ្នាំ២០១៤ នៅត្រង់ចំណុចភូមិឬស្សីស្រុក ឃុះញែងញ៉ង ស្រុកត្រាំកក់ ។
យោងតាមសមត្ថកិច្ចស្រុកត្រាំកក់ ដែលបានចុះទៅជួយសង្គ្រោះជនរងគ្រោះ បានឲ្យដឹងថា អ្នកដែលរង គ្រោះថ្នាក់ចរាចរណ៍ធ្ងន់ធ្ងរទាំង៣នាក់ ទី១ មានឈ្មោះ ចាន់ មាន ភេទស្រី អាយុ៥៦ឆ្នាំ និងទី២ឈ្មោះ ចាន់ ស្រីលាន អាយុ ១៩ឆ្នាំ អ្នកទាំង៣នាក់ ជាកូនម្ដាយ និងកូនមានទីលំនៅក្នុងឃុំច្រេស ស្រុកជុំគីរី ខេត្ត កំពត ចំណែកអ្នករងគ្រោះទី៣ ឈ្មោះ ផន បញ្ញា អាយុ ២១ឆ្នាំ ជាកូនប្រសារ ហើយម៉ូតូដែលជិះបុក បង្គោលស្លាកសញ្ញាចរាចរណ៍ម៉ាក សង់១២៥ស៊េរីឆ្នាំ២០១១ពាក់ស្លាកលេខភ្នំពេញ១ AD ៦៥២៥ ។
សមត្ថកិច្ចបានបន្តថា មុនពេលកើតហេតុ គេឃើញអ្នកទាំង៣នាក់ បានធ្វើដំណើរពីលិចទៅកើត ដោយកូន ប្រសារជាអ្នកដឹកម្ដាយក្មេក និងប្រពន្ធដែលទើបតែរៀបការ បានពីរថ្ងៃទៅលេងផ្ទះម្ដាយក្មេកខាងប្រុសនៅ ស្រុកបាទីខេត្តតាកែវ លុះមកដល់ចំណុចកើតហេតុ ស្រាប់តែអ្នកបើកងងុយដេក ក៏ជ្រុលចង្កូតទៅបុកនឹង បង្គោលស្លាកសញ្ញាចរាចរណ៍តាមផ្លូវបណ្ដាលឲ្យប្រពន្ធ និងខ្លួនត្រូវខ្ទាតធ្លាក់ចូលទឹកលូ តាមដងផ្លូវបែក ចញ្ចើមខាងស្ដាំ ដោយឡែកម្ដាយក្មេកត្រូវម៉ូតូដួលសង្កត់បែកមាត់បាក់ធ្មេញអស់២ ។
ក្រោយកើតហេតុ គេសង្កេតឃើញប្រជាពលរដ្ឋ ដែលនៅក្បែរនោះ និងមន្រ្តីនគរបាល កងរាជអាវុធហត្ថ បានចុះទៅជួយ ដោយចុះទៅស្រង់២នាក់ ប្ដី-ប្រពន្ធ ពីក្នុងទឹក និងហៅរថយន្តពេទ្យ ដឹកជនរងគ្រោះទៅ ព្យាបាលនៅមន្ទីរពេទ្យបង្អែកខេត្តតាកែវ ៕