ប្រជាពលរដ្ឋសម្រុកទៅធ្វើ ប្រហុក ផ្អក ខណៈត្រីកំពុងតែសំបូរ នៅកំពង់ឆ្នាំង
កាលពីថ្ងៃទី៨ ខែមករា ឆ្នាំ២០១៤ លោកឈួរ ច័ន្ទឌឿន អភិបាលខេត្តកំពង់ឆ្នាំង, លោកអ៊ុន សំអុល អភិបាលរងខេត្ត រួមនិងមន្ត្រីជំនាញជាច្រើនទៀត បានអញ្ជើញចុះពិ និត្យមើលសកម្មភាព ធ្វើត្រីប្រហុកនៅក្នុងឃុំតាជេស ស្រុកកំពង់ត្រឡាច។
ក្នុងពេលនោះលោកអភិបាលខេត្តកំពង់ឆ្នាំងបានធ្វើការណែនាំដល់មន្ត្រី ជំនាញនិងអាជ្ញាធរមូលដ្ឋានអោយជួយបង្កលក្ខណៈងាយស្រួល សម្រាប់ការស្នាក់នៅ ធ្វើប្រហុក ផ្អក របស់ប្រជាពលរដ្ឋ ក៏ដូចជាការរក្សាសន្តិសុខ ជូនពួកគាត់អោយបានល្អផងដែរ។
លោកសេង ប៊ុនឈឿន នាយខណ្ឌរដ្ឋបាលជលផលកំពង់ឆ្នាំងបានអោយដឹងថាតម្លៃត្រីប្រហុកនៅ ថ្ងៃទី៨មករានេះ ចន្លោះពី១០០០ ទៅ១៥០០រៀល(ត្រីរៀល ត្រីលិញ) ចំពោះត្រីប្រភេទលេខ២ តម្លៃចន្លោះពី២៥០០រៀល ទៅ៣០០០រៀល (ត្រីច្រកែង ត្រីឆ្ពិន) និងត្រីប្រភេទលេខ៣ តម្លៃចន្លោះពីមួយម៉ឺនរៀលទៅមួយម៉ឺនប្រាំពាន់រៀលក្នុងមួយគីឡូ (ត្រីឆ្កោក )។
លោក ប៊ុនឈឿន បានឲ្យដឹងទៀតថា ក្នុងពេលដែលត្រីសំបូរខ្លាំងតម្លៃត្រី នៅលើទីផ្សារ ក៏ធ្លាក់ចុះដែរ ដូចនេះប្រជាពលរដ្ឋ ដែលមានបំណង ចង់ធ្វើប្រហុកផ្អក ត្រៀមទុកសម្រាប់ហូបចុកនាឆ្នាំក្រោយ សូមប្រញាប់រួសរាន់ ចុះមកធ្វើនៅតាមទីតាំង ដែលខណ្ឌរដ្ឋបាលជលផល បានរៀបចំ ពីព្រោះនៅក្នុងខ្នើតនេះត្រីអាចត្រូវក្នុងរយៈពេល ពី៣ទៅ៤ថ្ងៃទៀត។
នៅក្នុងថ្ងៃដដែលនោះ លោកអភិបាលខេត្តកំពង់ឆ្នាំង បានបន្តដំណើរ ចុះពិនិត្យមើលការនេសាទត្រី និង បានទៅពិនិត្យ ដែនឡូត៍អភិរក្ស នៅក្នុងស្រុកកំពង់ត្រឡាច និង ស្រុកជលគិរីផងដែរ។
ក្នុងពេលចុះពិនិត្យនោះលោកអភិបាលខេត្ត បាននឧបត្ថម្ភថវិកា ដល់ក្រុមយាមឡូត៍អភិរក្ស ចំនួន៨ក្រុម ដែលក្នុង១ក្រុមៗ ទទួលបានថវិកា ២០ម៉ឺនរៀល៕M/c
