តុលាការឃុំខ្លួនយុវជន២នាក់ ដែលពាក់ឯកសណ្ឋានប៉ូលិសខុសច្បាប់ និងមានសៀតកាំភ្លើងជ័រ
យុវជនទាំង២នាក់នេះឈ្មោះ សុខ សុវណ្ណពិសិដ្ឋ ហៅ ទូច រ៉ាវុធ អាយុ២២ឆ្នាំ ជាសន្តិសុខឯកជនក្រុមហ៊ុន HNK ស្នាក់នៅភូមិស្លែងរលើង សង្កាត់ទឹកថ្លា ខណ្ឌសែនសុខ ជាអ្នកសៀតកាំភ្លើងខ្លីជ័រ និងស្លៀកពាក់ឯកសណ្ឋានប៉ូលិសខុសច្បាប់ មានទាំងវិទ្យុទាក់ទង និង ឈ្មោះ ស្រឹង សុភាព អាយុ២៦ឆ្នាំ ស្នាក់នៅភូមិសេប៉េសេ សង្កាត់ទឹកថ្លា ខណ្ឌសែនសុខ ត្រូវបានសមត្ថកិច្ច ប៉ូលិសខណ្ឌសែនសុខ ឃាត់ខ្លួនកាលពីយប់ថ្ងៃទី ៤ មករា ២០១៤ នៅចំណុចផ្លូវបេតុង ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
ប្រភពពីសមត្ថកិច្ចបានឱ្យដឹងថា បុរសទាំង២នាក់នេះ ជិះម៉ូតូមួយគ្រឿងម៉ាក XR ពណ៌ក្រហម ពាក់ស្លាកលេខភ្នំពេញ 1AM-4725 ជិះមកដល់ចំណុចខាងលើ ក៏ប្រទះនឹងសមត្ថកិច្ច ដោយមានការសង្ស័យសមត្ថកិច្ចក៏បានហៅឱ្យឈប់ រួចត្រួតពិនិត្យរកឃើញកាំភ្លើងខ្លីជ័រមួយដើមសៀតនៅចង្កេះ និងមានពាក់ឯកសណ្ឋានប៉ូលិសខុសច្បាប់ ហើយក៏ឃាត់ខ្លួនបញ្ជូនទៅ អធិការដ្ឋាននគរបាលខណ្ឌសែនសុខ ដើម្បីសាកសួរ៕
ប្រភពពី ANN
