គណបក្សសង្គ្រោះជាតិ ត្រៀមថវិកា ៣៥០០០ដុលា្លរ សម្រាប់ផ្តល់ឲ្យមេធាវីអន្តរជាតិស៊ើបអង្កេតករណីហិង្សានៅផ្លូវវ៉េងស្រេង
អ្នកនាំពាក្យគណបក្សសង្គ្រោះជាតិ លោក
យឹម សុវណ្ណ ប្រាប់VOD នៅរសៀលថ្ងៃទី២៤ខែមករានេះថា
បក្សលោកនឹងប្រមូលថវិកា តាមរយៈអ្នកគាំទ្របក្សសង្គ្រោះជាតិ
និងថវិកាផ្ទាល់របស់បក្សចំនួន ៣៥០០០ដុលា្លរអាមេរិក
ដើម្បីផ្តល់ឲ្យក្រុមមេធាវីអន្តរជាតិ ICC សម្រាប់ដំណើការរយៈពេល
១ឆ្នាំ ករណីការបង្ក្រាបរបស់កម្លាំងប្រដាប់អាវុធ
ទៅលើកម្មករដែលតវ៉ាទាមទារដំឡើងប្រាក់ខែ កាលពីដើមឆ្នាំ២០១៤
កន្លងមក។ លោកបន្តថា បើភស្តុតាងមានលក្ខណៈសមស្រប
ក្រុមមេធាវីនឹងរៀបចំសំណុំរឿង ប្តឹងទៅព្រះរាជអាជ្ញា
នៃតុលាការព្រហ្មទណ្ឌអន្តរជាតិ ICC។
លោកយឹម សុវណ្ណ ឲ្យដឹងទៀតថា មកដល់ពេលនេះ
ក្រុមមេធាវីបានរកឃើញនូវភស្តុតាងមួយចំនួន រួមមាន ជាខ្សែវីដេអូ រូបថត
និងសំឡេងជាដើម ដែលទាក់ទងទៅនឹងការបង្ក្រាប
ឬការប្រើប្រាស់អាវុធរបស់អាជ្ញាធរកម្ពុជាទៅលើប្រជាពលរដ្ឋ។
ទាក់ទងនឹងករណីនេះ
តំណាងរាស្ត្រគណបក្សប្រជាជនកម្ពុជា មណ្ឌលខេត្តបាត់ដំបង លោក ឈាង វុន
ក៏ធ្លាប់បានព្រមានតបវិញដែរថា រាជរដ្ឋាភិបាល ក៏មានភស្តុតាង
ជាឯកសារ រូបភាព និងវីដេអូគ្រប់គ្រាន់ ដើម្បីបញ្ជាក់ថា
ថ្នាក់ដឹកនាំគណបក្សសង្គ្រោះជាតិវិញទេ ដែលជាអ្នកបង្កចលាចល
និងញុះញង់ឲ្យមានហិង្សា និងឧក្រិដ្ឋកម្មកើតឡើង។
គណបក្សសង្គ្រោះជាតិ
បានបង្កើតមេធាវីអន្តរជាតិមួយក្រុម ដឹកនាំដោយលោក Richard J Rogers
ដែលមានជំនាញផ្នែកច្បាប់ឧក្រិដ្ឋកម្មអន្តរជាតិ និងសិទ្ធិមនុស្ស
ធ្វើការស្រាវជ្រាវ និងវាយតម្លៃទៅភស្តុតាង ក៏ដូចជាឯកសារនានា
ដែលពាក់ព័ន្ធទៅនឹងការប៉ះទង្គិចដោយហិង្សាមួយរវាងក្រុមកម្មករដែល
មកពីរោងចក្រនានា ក្នុងរាជធានីភ្នំពេញ និងកងកម្លាំងប្រដាប់អាវុធ
នៅមុខសួនឧស្សាហកម្មកាណាឌីយ៉ា ផ្លូវវ៉េងស្រេង ខណ្ឌពោធិសែនជ័យ
រាជធានីភ្នំពេញ
ខណៈដែលកម្មករតវ៉ាទាមទារដំឡើងប្រាក់ឈ្នួលគោល១៦០ដុល្លារក្នុង
មួយខែ បណ្តាលឲ្យកម្មករ ៥នាក់ស្លាប់ ជិត៤០នាក់រងរបួស
និងកម្មករ១៣នាក់ទៀត ត្រូវបានចាប់ខ្លួន។ គណបក្សសង្គ្រោះជាតិ
បានចាត់ទុកករណីនេះ ជាបទឧក្រិដ្ឋ
ហើយគ្រោងប្តឹងទៅតុលាការព្រហ្មទណ្ឌអន្តរជាតិ ICC
ដែលមានទីតាំងនៅក្រុងឡាអេ ប្រទេសហូឡង់៕
