អាងតែផ្លូវស្ងាត់បើកឡាន ហ្វរ៉ាន់ន័រហួសល្បឿន ក្រឡាប់ធ្លាក់ផ្លូវស្លាប់ចោលប្រពន្ធកូន
ខេត្ដព្រះវិហារ ៖ រថយន្ដហ្វរ៉ាន់ន័រ មួយគ្រឿង
ខណៈដែលកំពុងបើកបរ ក្នុងល្បឿនយ៉ាងលឿន
ជ្រុលចង្កូតក្រឡាប់ធ្លាក់ផ្លូវ បណ្ដាលឱ្យបុរសម្នាក់
ស្លាប់បាត់បង់ជីវិតភ្លាមៗ កាលពីវេលាម៉ោង ១និង១៥
នាទីរសៀល ថ្ងៃទី២០ ខែមករា ឆ្នាំ២០១៤នៅស្រុកជាំក្សាន្ដ ខេត្ដព្រះវិហារ។សមត្ថកិច្ចបានឱ្យដឹងថា នៅមុនពេលកើតហេតុ គេបានឃើញ រថយន្ដម៉ាក ហ្វរ៉ាន់ន័រ ពាក់ស្លាកលេខ ភ្នំពេញ 2H-1735 បើកចេញពីភូមិ ស្រអែមឆ្ពោះមកខេត្ដព្រះវិហារ ក្នុងល្បឿនយ៉ាងលឿន ទំនងជាអ្នកបើកបរគិតថា ផ្លូវស្ងាត់មកដល់ត្រង់ផ្លូវកោង មិនបន្ថយល្បឿន សង្ស័យបួងចង្កូតមិនទាន់ ធ្វើឱ្យរថយន្ដក្រឡាប់តែម្តង។
អ្នកបើកបរមានឈ្មោះ កើ សំរួត អាយុ ៣១ឆ្នាំ រស់នៅភូមិពពាយ ឃុំទ្រា ស្រុកស្ទោង ខេត្ដកំពង់ធំ បានស្លាប់បាត់បង់ជីវិត នៅនិងកន្លែង កើតហេតុតែម្ដង ។ មន្ដ្រីនគរបាលស្រុកជាំក្សាន្ដ បានទំនាក់ទំនង រកបងប្អូនសាច់ញាតិ ដើម្បីឱ្យមកទទួលយក សាកសពនៅវត្ដភូមិ ស្រអែម យកទៅស្រុកកំណើត ដើម្បីធ្វើ បុណ្យតាមប្រពៃណី ។ ចំណែកឯរថយន្ដ បានអូសយកទៅរក្សាទុកនៅអធិការដ្ឋាននគរបាលស្រុកជាំក្សាន្ដ ៕
