មេធាវីលោក វន់ ពៅ បឹ្តងទាស់ទៅសាលាឧទ្ធរណ៍
លោកស្រី សាន សុគន្ធា មេធាវីការពារក្តីឲ្យលោក វន់ ពៅ ថ្លែងឲ្យដឹងថា អ្នកស្រីបានដាក់ពាក្យបណ្តឹងទៅសាលាឧទ្ធរណ៍ប្តឹងទាស់ទៅនឹងការ បដិសេធឲ្យនៅក្រៅឃុំរបស់សាលាដំបូងរាជធានីភ្នំពេញកាលពីថ្ងៃ ទី១៤ ខែ មករា ដោយសារតែសុខភាពកូនក្ដីអ្នកស្រីកំពុងចុះខ្សោយ។ អ្នកស្រីឲ្យដឹងទៀតថា៖ «គាត់មានជំងឺស្រាប់ តែនៅពេលដែលចាប់គាត់ត្រូវបានគេវាយបន្ថែមទៀត ដូច្នេះធ្វើឲ្យស្ថានភាពជំងឺរបស់គាត់កាន់តែធ្ងន់ធ្ងរ»។
អ្នកស្រីបានថ្លែងឲ្យដឹងថា សាលាដំបូងរាជធានីភ្នំពេញបានបដិសេធការស្នើសុំឲ្យនៅក្រៅឃុំរបស់ កូនក្តីអ្នកស្រីដោយសំអាងថារឿងនេះតុលាការកំពុងចាប់ផ្តើមស៊ើប អង្កេតតុលាការមិនអាចឲ្យនៅក្រៅឃុំបានទេ។
អ្នកស្រី ប្រាក់ សុវណ្ណារី ភរិយារបស់លោក វន់ ពៅ ដែលទើបតែចេញពីសួរសុខទុក្ខស្វាមីរបស់អ្នកស្រីថ្លែងឲ្យដឹងថា ស្ថានភាពប្តីរបស់អ្នកស្រីកំពុងតែចុះខ្សោយដោយសារតែគាត់មាន ជំងឺប្រចាំកាយស្រាប់មុនថ្ងៃដែលគេឃាត់ខ្លួន។ អ្នកស្រីថា៖ «ប្តីរបស់ខ្ញុំបានប្រាប់ខ្ញុំថា គាត់ចុកខ្លាំងណាស់ ពេលយប់គាត់សម្រាកមិនបានគាត់ថា ប្រហែលជាគ្រាំក្នុងដោយសារតែគេទាត់»។
អ្នកស្រីថ្លែងឲ្យដឹងទៀតថា ប្តីអ្នកស្រីត្រូវណាត់ជួបពេទ្យនៅក្រៅប្រទេសដើម្បីពិនិត្យសុខភាព ដែលត្រូវវះនៅថ្ងៃ ទី១៨ ខែ កុម្ភៈ ខាងមុខនេះ ហើយអ្វីដែលអ្នកស្រីឈឺចាប់បំផុតគឺប្តីអ្នកស្រីមិនមានទោសសោះ ត្រូវបានគេវាយដាក់គុក ហើយគ្រាន់តែសុំនៅក្រៅឃុំគេបដិសេធទៀត។ អ្នកស្រីឲ្យដឹងទៀតថា៖ «ប្រសិនបើមានរឿងអីកើតឡើងចំពោះប្តីរបស់ខ្ញុំ ខ្ញុំនឹងប្តឹងរដ្ឋាភិបាលឲ្យទទួលខុសត្រូវ ពីព្រោះគាត់មិនអនុញ្ញាតឲ្យប្តីរបស់ខ្ញុំនៅក្រៅឃុំដើម្បីថែរក្សា សុខភាព»។
អ្នកស្រីថ្លែងឲ្យដឹងទៀតថា បច្ចុប្បន្ននេះមន្ត្រីពន្ធនាគារតឹងរ៉ឹងក្នុងការឲ្យពេទ្យអង្គការ ចូលទៅពិនិត្យសុខភាពរបស់គាត់ដោយគេសំអាងថាមានពេទ្យនៅក្នុង ពន្ធនាគារ ប៉ុន្តែពេទ្យនោះពុំមានថ្នាំគ្រប់គ្រាន់ទេ។
អ្នកស្រីឲ្យដឹងទៀតថា៖ «ខ្ញុំចង់សុំឲ្យមន្ត្រីពន្ធនាគារមេត្តាអនុញ្ញាតឲ្យពេទ្យអង្គការ ចូលពិនិត្យប្តីរបស់ខ្ញុំនិងកម្មករផ្សេងទៀតរៀងរាល់ថ្ងៃ។ សូម្បីតែពួកមេខ្មែរក្រហមសម្លាប់ប្រជាជនរង្គាលពេលចាប់ដាក់គុកក៏ គេមានពេទ្យថែទាំដែរ»។
លោក វន់ ពៅ ជាជនសង្ស័យម្នាក់ក្នុងចំណោម ២៣ នាក់ ដែលកងកម្លាំងកងទ័ពឆត្រយោង ៩១១ ចាប់ខ្លួន កាលពីថ្ងៃ ទី២ ខែ មករា នៅពេលតវ៉ាដំឡើងប្រាក់ឈ្នួលកម្មករ ១៦០ ដុល្លារ។ លោកនិងកម្មករ២២នាក់ ផ្សេងទៀតជាប់ចោទពីបទប្រើហិង្សាដោយចេតនា បំផ្លិចបំផ្លាញទ្រព្យសម្បត្តិដោយចេតនាហើយអ្នកទាំងអស់គ្នាកំពុង ជាប់ឃុំបណ្តោះអាសន្ននៅក្នុងពន្ធនាគារ ត្រពាំងផ្លុង។
លោក ជា វណ្ណា ប្រធានមណ្ឌលកែប្រែ ទី៣ ពុំអាចទាក់ទងធ្វើការអត្ថាធិប្បាយបានទេ។
នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព ពីថ្ងៃម្សិលមិញ អស់រយៈពេល ៣ ម៉ោង និង ៣០ នាទី លោក សូរិយា ស៊ូប៊ែរឌី អ្នករាយការណ៍ពិសេស អង្គការសហប្រជាជាតិទទួលបន្ទុកសិទ្ធិមនុស្ស ក៏បានលើកពីបញ្ហាជនដែលត្រូវបានចាប់ខ្លួនកាលពីកន្លងទៅ នៅពេលផ្ទុះហិង្សាកាលពីថ្ងៃ ទី២ និង ទី៣ ខែ មករា ដូចជា បញ្ហាសុខភាព បញ្ហាសួរសុខទុក្ខ និងការសុំនៅក្រៅឃុំ។
លោក ជុំ កុសល ទីប្រឹក្សាលោកនាយករដ្ឋមន្ត្រី បានបង្ហោះនៅលើ ហ្វេសប៊ុក របស់ខ្លួនបន្ទាប់ពីជំនួបថា ក្នុងរយ: ពេល ៣ ម៉ោងនៃជំនួបនេះ ដោយរិះគន់លោក ស៊ូប៊ែរឌី ថា «បានភ្លឺភ្នែកច្រើនណាស់ស្តីពីស្ថានភាពពិតនៅកម្ពុជាផ្តោតលើ បញ្ហាសិទ្ធិមនុស្ស ពិសេសស្ថានការណ៍ពិតនាបច្ចុប្បន្នផ្ទុយពីស្ថានការណ៍ដែលមានក្នុង របាយការណ៍»។ លោកសង្ឃឹមថា លោក ស៊ូប៊ែរឌី នឹងមានសុភវិនិច្ឆយនិងឈរលើគោលការណ៍អព្យាក្រឹតស្តីពីសិទ្ធិមនុស្ស នៅកម្ពុជា៕
ប្រភពពី ភ្នំពេញ ប៉ុស្តិ៍
