ថ្មីៗ​នេះ Samsung បាន​ប្រកាស​ចេញ​បច្ចេកវិទ្យា​បន្ទះ chip ថ្មី​ដំបូង​របស់​ខ្លួន​គឺ 8Gb (ទំហំ 1GB) LPDDR4 mobile DRAM ដែល​អាច​ច្របាច់​បញ្ចូល​ជា​ពុម្ព​តែ​មួយ​មាន​ទំហំ​រហូត​ដល់ 4GB ​ប្រើ​នៅ​លើ Galaxy S5។ មិន​តែ​ប៉ុណ្ណោះ chip ថ្មី​នេះ​មាន​ល្បឿន​លឿន​ជាង LPDDR3 ដែល​បំពាក់​លើ Smartphone សព្វ​ថ្ងៃ​ដល់​ទៅ ៥០% ឯណោះ។

Samsung មាន​ទិសដៅ​យ៉ាង​មុតមាំ​ក្នុង​ការ​អភិវឌ្ឍន៍​បច្ចេកវិទ្យា​មិន​ត្រឹមតែ Software នោះ​ទេ តែ Hardare ក៏​ដូច្នោះ​ដែរ។ ក្រុមហ៊ុន​នេះ​បាន​អភិវឌ្ឍ​ផ្ដោត​សំខាន់​លើ​បន្ទាប់ chip ជាក់​ស្ដែង​ថ្ងៃ​នេះ​បាន​ប្រកាស​នូវ​សមិទ្ធផល​ឈីប 8Gb LPDDR4 mobile DRAM របស់​ខ្លួន។ chip នេះ​មិន​ត្រឹម​ជា LPDDR4 mobile DRAM ដំបូង​របស់ Samsung ទេ តែ​ថែមទាំង​ជា mobile DRAM ដំបូង​ដែល​គាំទ្រ 8Gb នៅ​លើ​ពុម្ព​តែ​មួយ។ ដោយ​សារ Chip LPDDR4 mobile DRAM នេះ​មួយ​បន្ទះ​ស្មើ​ទំហំ RAM ទូរសព្ទ 1GB ដូច្នេះ​គេ​អាច​ប្រើ​ពុម្ព​ចំនួន៤ គឺ​ស្មើ​នឹង RAM ទំហំ 4GB ដែល​បច្ចេកវិទ្យា​នេះ​ត្រូវ​រំពឹង​ថា នឹង​បំពាក់​លើ Galaxy S5 ជា​មិន​ខាន។

Chip ថ្មី​នេះ​ប្រភេទ​មាន 20nm ហើយ​មិន​ត្រឹមតែ​មាន​ល្បឿន​លឿន​ជាង​មុន ៥០% ទេ​តែ ក៏​មាន​តម្រូវ​ការ​ថាមពល​ប្រើ​អស់​តិច​ជាង LPDDR3 ៤០% ផង​ដែរ​គឺ ១,១វ៉ុល។ លោក Young Hyun Jun អនុប្រធាន​ផ្នែក​លក់ memory និង​ផ្នែក​ទីផ្សារ​របស់ Samsung Electronics បាន​ថ្លែង​ថា៖ LPDDR DRAM ជំនាន់​ថ្មី​នេះ នឹង​ចូលរួម​បង្កើន​សក្ដានុពល​ចំណែក​ទីផ្សារ​របស់​ខ្លួន​ឱ្យ​មាន​សន្ទុះ​កើន​ ឡើង​ខ្លាំង​បន្ថែម​ទៀត។
ទិន្នន័យ​ដែល chip ថ្មី​នេះ​អាច​ផ្ទេរ​បាន​គឺ 3,200Mbps ក្នុង 1pin ដែល​ល្បឿន​នេះ​លឿន​ជាង 20nm LPDDR3 DRAM ដល់​ទៅ ២ដង។ ក្រុមហ៊ុន​អេឡិចត្រូនិក​យក្ស​កូរ៉េ​ខាង​ត្បូង​នេះ​ថែម​ទាំង​បាន​ព្រលយ​ឱ្យ​ ដឹង​ថា ទូរសព្ទ​ជំនាន់​ថ្មី​ឆ្នាំ​ក្រោយ មិន​ត្រឹមតែ​បំពាក់ RAM 4GB តែ​ថែម​ទាំង​ជា​ប្រភេទ UHD Smartphone/Tablet និង ultra-slim notebooks ទៀត​ផង ក្នុង​នោះ​អាច​ជាGalaxy S5 ក៏​ថា​បាន។ សង្កេត​ឃើញ​ Smartphone សព្វ​ថ្ងៃ​មាន​ RAM យ៉ាង​ធំ​ត្រឹម 3GB ប៉ុណ្ណោះ ជាក់​ស្ដែង Galaxy Note 3 ជា​ដើម។

បើ​តាម​របាយការណ៍​មុន​នេះ បាន​ឱ្យ​ដឹង​ថា Samsung នឹង​ប្រើ​បច្ចេកវិទ្យា 64-bit CPU បំពាក់​លើ GS5 ដែល​នឹង​ចេញ​នៅ​អំឡុង​ឆមាស​ទី១ ឆ្នាំ២០១៤៕