ក្រសួងធនធានទឹក បំភ្លឺពាក្យចចាមអារាម រឿងជាតិវិទ្យុសកម្ម ភាយចេញពី DOPPLER រ៉ាដា
អ្នកនាំពាក្យក្រសួងធនធានទឹកនិងឧតុនិយម លោក ចាន់ យុត្ថា បានឲ្យដឹងថារ៉ាដា ដែលក្រសួងធនធានទឹកដំឡើងដើម្បីព្យាករណ៍អាកាសធាតុ ខ្យល់ព្យុះ និងគ្រោះទឹកជំនន់គឺDOPPLER រ៉ាដាមិនបង្កឲ្យមានជាតិវិទ្យុសកម្ម ប៉ះពាល់ដល់សុខភាពប្រជាពលរដ្ឋរស់នៅតំបន់ជិតនោះឡើយ។គួរបញ្ជាក់ថា កន្លងទៅមានពាក្យចាមរាមថា DOPPLER រ៉ាដាឬ«ស្ថានីយរ៉ាដា តេជោសែន» មានបញ្ចេញជាតិវិទ្យុសកម្មប៉ះពាល់ដល់សុខភាពប្រជាពលរដ្ឋ រស់នៅតំបន់ជុំវិញទីនោះ។
ឆ្លើយតបទៅនឹងពាក្យចចាមអារាមនេះ លោក ចាន់ យុត្ថា បានបំភ្លឺថា មុននិងចាប់ផ្តើមសាងសងនិងដំឡើងអ្នកបច្ចេកទេសជំនាញមកពីប្រទេសបារាំងបានធ្វើការសិក្សាពីផលប៉ះពាល់យ៉ាងល្អិតល្អន់រួចហើយៗបានបញ្ជាក់ថា DOPPLER រ៉ាដា សាងសង់ឡើងក្នុងកំពស់៥០ម៉ែត្រ DOPPLER រ៉ាដា បានស្រោបដោយRANDOOM ពីក្រៅមួយជាន់ទៀតដូច្នេះ មិនមានបង្កផលប៉ះពាល់នោះឡើយ។ លោកបន្តថា DOPPLER រ៉ាដាអាចមានផលប៉ះពាល់ លុះត្រាតែ មានមនុស្សទៅឈរទន្ទឹមនៅពីមុខ DOPPLER រ៉ាដា ចម្ងាយ២០ម៉ែត្រ តែ DOPPLER រ៉ាដា នេះស្ថិតនៅលើរយៈកំពស់៥០ម៉ែត្រពីដីហើយក៏គ្មានសំណង់នៅក្បែរឬ មនុស្សណាទៅឈរនៅក្បែរនោះឡើយ ដូច្នេះ គ្មានហេតុផលអ្វីដែលមានផលប៉ះពាល់ ដល់សុខភាពប្រជាពលរដ្ឋឡើយ។ម្យ៉ាងទៀត តាមបច្ចេកទេសDOPPLER រ៉ាដារត់បាញ់ឡើងលើ មិនបាញ់ចុះមកក្រោមឡើយ។
លោក ចាន់ យុត្ថា បញ្ជាក់នៅរសៀលថ្ងៃទី១១ ខែធ្នូ ថាលោកសូមធ្វើការបដិសេធន៍ និងអំពាវនាវ ដល់ប្រជាពលរដ្ឋរស់នៅជុំវិញរ៉ាដាតេជោសែនកុំឲ្យមានការព្រួយបារម្ភ និងជឿលើការឃោសនារបស់ជនមួយចំនួននោះឲ្យសោះ។
សូមបញ្ជាក់ថា DOPPLER រ៉ាដាមានទីតាំងស្ថិត នៅម្តុំច្រមុះជ្រូកក្បាលថ្នល់ ចម្ងាយប្រមាណ៥០០ ម៉ែត្រពីស្ពានអាកាសក្បាលថ្នល់៕
ប្រភពពី Free Press Magazine
