ផឹកប៉ះចំស្រាកាច យកពូថៅនិងកាំបិតប៉័ងតោ កាប់ឪពុកមានិងម្តាយមីង របួសធ្ងន់ធ្ងរ
ជនសង្ស័យដែលត្រូវបានឃាត់ខ្លួនមានឈ្មោះ ចាប សុភី ភេទប្រុស អាយុ ២៥ឆ្នាំ មុខរបរជាកសិករ និងម្នាក់ទៀត ត្រូវជាបងប្អូនបង្កើតនិងគ្នា ដែលរត់គេចខ្លួននោះមានឈ្មោះ ចាប សុភឿន ភេទប្រុស អាយុ២៤ឆ្នាំ មុខរបរជាកសិករ មានទីលំនៅក្នុងភូមិស្លែងដីដុះ ឃុំព្រែកតាទែន ស្រុកពញាឮ ។ នៅមុនពេលកើតហេតុ វេលាល្ងាចថ្ងៃទី១៥ ខែធ្នូ ឆ្នាំ២០១៣ ជនសង្ស័យទាំង ២នាក់ បាននៅអង្គុយផឹកស្រា ជាមួយជនរងគ្រោះ ដែលត្រូវជាឪពុកមា និងម្តាយមីងដែលមានឈ្មោះ ចាប ជឿន ភេទប្រុស អាយុ ៣៤ឆ្នាំ មុខរបរកសិករ និងម្នាក់ទៀតឈ្មោះ ចាប ចាន់ភា ភេទស្រី អាយុ ៣៣ឆ្នាំ ដែលមានទីលំនៅក្នុងភូមិ-ឃុំកើតហេតុ ។
លុះដល់វេលាម៉ោង ១រំលងអធ្រាតឈានចូលថ្ងៃទី១៦ ខែធ្នូ ឆ្នាំ២០១៣ ជនសង្ស័យក៏មានទំនាស់ពាក្យសំដី ជាមួយជនរងគ្រោះ ហើយជនសង្ស័យទាំង ២នាក់ក៏បានទាញយកពូថៅ និងកាំបិតប៉័ងតោ ដេញកាប់ទៅលើជនរងគ្រោះទាំង ២នាក់ប្តីប្រពន្ធ បណ្តាលឲ្យរងរបួសត្រូវចំដងខ្លួន និងក្បាលបែកឈាមហូរជោកខ្លួន ។ ក្រោយពេលកើតហេតុ ប្រជាពលរដ្ឋនៅក្បែរខាង បានរត់ចូលទៅឃាត់ជនសង្ស័យ និងប្តឹងសមត្ថកិច្ចនគរបាលមូលដ្ឋាន ឲ្យជួយអន្តរាគមន៏ឃាត់ខ្លួន ជនសង្ស័យបានម្នាក់ រីម្នាក់ទៀតបានរត់គេចខ្លួន បាត់ស្រមោលតែម្តង៕
ប្រភពពី វត្តភ្នំ
