សហជីពមួយ រិះគន់គណបក្សប្រឆាំងថា កំពុងញុះញង់កម្មករក្នុងការទាមទារដំឡើងប្រាក់ឈ្នួល
ក្រុមប្រឹក្សាសហជីពជាតិកម្ពុជា(CCNU)
ដែលដឹកនាំដោយ លោក សោម អូន
ប្រកាសគាំទ្រការដំឡើងប្រាក់ឈ្នួលដល់កម្មករ៩៥ដុល្លារ
សម្រាប់ឆ្នាំ២០១៤ និងចាត់ទុកការតវ៉ារបស់កម្មករនៅពេលនេះ
គឺជាការញុះញង់របស់គណបក្សប្រឆាំង។
ក្រសួងការងារ កាលពីថ្ងៃពុធ
បានប្រកាសឲ្យកម្មករ
គោរពតាមការសម្រេចរបស់គណៈកម្មការប្រឹក្សាការងារកាលពីថ្ងៃទី២៤
ខែធ្នូ ឆ្នាំ២០១៣ ស្ដីពីដំឡើងប្រាក់ឈ្នូលអប្បបរមា
ដែលត្រូវអនុវត្តតាមគោលការណ៍ដូចខាងក្រោម ៖ ពីឆ្នាំ២០១៤ ដល់ ២០១៨
ដំឡើងពី៨០ដុល្លារទៅ១៦០ដុល្លារសម្រាប់កម្មករពេញសិទ្ធិ
និងពី៧៥ដុល្លារទៅ១៥៥ដុល្លារសម្រាប់កម្មករសាកល្បង។ ឆ្នាំ២០១៤
ប្រាក់ឈ្នួលត្រូវបានដំឡើងចំនួន១៥ដុល្លារ ឆ្នាំ២០១៥
ត្រូវដំឡើងចំនួន១៥ដុល្លារ ឆ្នាំ២០១៦ ត្រូវដំឡើងចំនួន១៦ដុល្លារ
ឆ្នាំ២០១៧ ត្រូវដំឡើងចំនួន១៧ដុល្លារ និងឆ្នាំ២០១៨
ត្រូវដំឡើង១៧ដុល្លារ។
សេចក្តីថ្លែងការណ៍របស់ CCNU
ចេញផ្សាយកាលពីថ្ងៃពុធ ឲ្យដឹងថា ការដំឡើងប្រាក់ឈ្នួលនេះ
គឺសមស្របតាមស្ថានភាពសេដ្ឋកិច្ចជាក់ស្តែង ដោយសហជីពនេះ
បដិសេធទទួលស្គាល់ចំពោះសហជីពខិលខូច ដែលគ្មានបញ្ជីការផ្លូវច្បាប់
និងមេគណបក្សនយោបាយដែលឃោសនាះអះអាងថា ខ្លួនជាតំណាងឲ្យសហជីពកម្មករ
នឹងទាមទារដំឡើងប្រាក់ខែកម្មករ១៦០ដុល្លារ
ដែលជាការបោកបញ្ឆោតកម្មករឲ្យចូលរួមបាតុកម្មជាមួយគណបក្ស។
សហជីពមួយនេះ បានអំពាវនាវឲ្យកម្មករ
រក្សាភាពស្ងប់ស្ងៀម កុំចូលរួមនូវរាល់សកម្មភាពទាំងឡាយណា
ដែលធ្វើឲ្យប៉ះពាល់សណ្តាប់ធ្នាប់សាធារណៈ សន្តិសុខជាតិ សន្តិសុខការងារ
និងបរិយាកាសវិនិយោគ។ សហជីព ក៏បានអំពាវនាវឲ្យរាជរដ្ឋាភិបាល
ចាត់វិធានការផ្លូវច្បាប់ ឲ្យបានម៉ឺងម៉ាត់បំផុតចំពោះជនខិលខូចមួយចំនួន
ដែលបង្កអុកឡុក និងញុះញង់គំរាមកំហែងកម្មករនិយោជិត
ឲ្យចូលរួមធ្វើការប្រឆាំងតវ៉ាទៅនឹងលទ្ធផលនៃកិច្ចប្រជុំស្តីពី
ការដំឡើងប្រាក់ឈ្នួល។
ក្រសួងការងារ
និងបណ្តុះបណ្តាលវិជ្ជាជីវៈ កាលពីថ្ងៃពុធ ប្រកាសថា
សហភាពសហជីពកម្ពុជា(CCU) របស់លោក រ៉ុង ឈុន មិនមែនជាសហជីពស្របច្បាប់
ខណៈប្រធានសហជីពនេះ
កំពុងប្រមូលផ្តុំកម្មករធ្វើបាតុកម្មទូទាំងប្រទេស
ទាមទារដំឡើងប្រាក់ឈ្នួល១៦០ដុល្លារ៕ ប្រភព វីអូឌី
