កម្មករជីករ៉ែម្នាក់ត្រូវដីបាក់សង្កត់ស្លាប់ពេលកំពុងរុករក
បាត់ដំបងៈ អាជ្ញាធរមូលដ្ឋានបានឲ្យដឹងថាបុរសម្នាក់ស្លាប់និងម្នាក់ទៀតរងរបួសដោយសារការបាក់ដីរុករករ៉ែនៅស្រុកភ្នំព្រឹក ខេត្ត បាត់ដំបងកាលពីថ្ងៃច័ន្ទ បន្ទាប់ពួកគេជិករករ៉ែក្នុងជម្រៅ ៥ម៉ែត្រ។
លោក ផាន់ សាន់ មេប៉ុស្តិ៍ ភ្នំព្រឹកបានឲ្យដឹងថា បុរសម្នាក់បានស្លាប់និងម្នាក់ទៀតរងរបួសស្រាលដោយសារបាក់ដីពេលពួកគេកំពុងជីករករ៉ែក្នុងជម្រៅ ៥ ម៉ែត្រនៅភ្នំ ត្រងោល ស្ថិតនៅឃុំ ភ្នំព្រឹក ស្រុកភ្នំព្រឹក ខេត្តបាត់ដំបង កាលល្ងាចថ្ងៃច័ន្ទ។
លោកថា ពួកគេមានគ្នាបីនាក់បាននាំគ្នាទៅជីករករ៉ែក្នុងនោះម្នាក់បានចុះទៅដល់ជម្រៅ៥ម៉ែត្រក៏ត្រូវដីបាក់ចូលសង្កត់ស្លាប់នៅកន្លែងកើតហេតុតែម្តងរីម្នាក់ទៀតរងរបួសស្រាល។ចំណែកម្នាក់ទៀតមិនបានចុះនោះទេបន្ទាប់ពីឃើញហេតុការណ៍បានផ្អើលឆោឡោតែម្តង។
លោកថា«ពួកគេបានចុះក្នុងជម្រៅ ៥ ម៉ែត្រក៏ជួបហេតុការណ៍បាក់ដីសង្កត់លើ។ តាមពិតពួកគេធ្វើអាជីវកម្មខុសច្បាប់ជាលក្ខណៈគ្រួសារមិនមែនជាកម្មករក្រុមហ៊ុនណាមួយនោះទេដែលពួកគេគ្មានបច្ចេកទេសត្រឹមត្រូវ»។
អ្នកស្លាប់មានឈ្មោះ ប៊ន បឿន អាយុ ៣១ ឆ្នាំនិងអ្នករបួសស្រាលមានឈ្មោះ អ៊ាត គ្រី អាយុ ២១ឆ្នាំ។
លោក ម៉ែន សែត ជាមេឃុំភ្នំព្រឹកបានថ្លែងថា គ្រួសារភាគច្រើននាំគ្នាជីករករ៉ែយ៉ាងអាណាធិបតេយ្យនិងអ្នកចំណាកស្រុកផងដែរបាននាំគ្នាធ្វើអាជីវកម្មមួយនេះលួចលាក់ដែលគ្មានច្បាប់ទំលាប់ត្រឹមត្រូវនិងគ្មានបទដ្ឋានបច្ចេកទេសច្បាស់លាស់។
លោកថា «ភាគច្រើនពួកគេជាអ្នកចំណាកស្រុកមកពីខេត្តផ្សេងៗស្គាល់បងប្អូននៅទីនេះនាំគ្នាជីករករ៉ែគ្មានសុំច្បាប់អីនោះទេដែលជាការគ្រោះថ្នាក់ប្រថុយប្រថាននឹងជីវិត»។
លោកបន្ថែមថា ពួកគេចេះជាលក្ខណៈតគ្នាពីគ្រួសារមួយទៅគ្រួសារមួយក្នុងការជីករករ៉ែដើម្បីធ្វើអាជីវកម្មជាលក្ខណៈគ្រួសារមួយនេះ។
លោក ជឺ ឈៀង ប្រធានឧស្សាហកម្មរ៉ែនិងថាមពលខេត្តបាត់ដំបងបានថ្លែងថា លោកមិនបានដឹងពីហេតុការណ៍មួយនេះនោះទេព្រោះលោកជាប់រវល់មកប្រជុំនៅភ្នំពេញ។
ប្រភពពី ភ្នំពេញប៉ុស្តិ៍
