ផ្តន្ទាទោសស្រ្តីវៀតណាម៣នាក់ដាក់គុកម្នាក់ៗពី២ទៅ៤ឆ្នាំ ជួញគ្រឿងញៀន
ភ្នំពេញៈ ស្រ្តីជនជាតិវៀតណាមជាប់ចោទ ៣នាក់ត្រូវបានចៅក្រម នៃសាលាដំបូងរាជធានីភ្នំពេញ សម្រេចផ្តន្ទាសនៅព្រឹកថ្ងៃ ពុធនេះដាក់ពន្ធនាគារម្នាក់ៗរយៈពេលពី ២ទៅ៤ ឆ្នាំ និង ពិន័យដាក់ជាថវិការដ្ឋម្នាក់ចំនួន ៤លានរៀល ក្រោមការចោទប្រកាន់ពីបទ«ជួញដូរគ្រឿងញៀនខុសច្បាប់» ប្រព្រឹត្តនៅក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ កាលពីអំឡុងខែមិថុនា ២០១៣។
លោក សួស សំអាត ប្រធានចៅក្រមប្រឹក្សានៃសាលាដំបូងរាជធានីភ្នំពេញ បានអានសាលក្រមថាៈ«តុលាការសម្រេចផ្តន្ទាទោស ជនជាប់ចោទឈ្មោះ ង្វៀង ធីគុក ភេទស្រី អាយុ ៤៥ឆ្នាំ ជនជាតិវៀតណាម និងឈ្មោះ ង្វៀង ធីខៀវ ភេទស្រី អាយុ ៣៣ឆ្នាំ ជនជាតិវៀតណាម ដាក់ពន្ធនាគារម្នាក់ៗ រយៈពេល ៤ឆ្នាំនិងពិន័យជាប្រាក់ម្នាក់ៗ ចំនួន ៤លានរៀលសម្រាប់ដាក់ចូលក្នុងថវិកាជាតិ ពីបទ«ជួញដូរគ្រឿងញៀនខុសច្បាប់ ។ ផ្តន្ទាទោសឈ្មោះ ទុង ធីមីតាក ភេទស្រី អាយុ ២៦ឆ្នាំ ជនជាតិវៀតណាម ដាក់ពន្ធនាគាររយៈពេល ២ឆ្នាំ តែអនុវត្តទោសរយៈពេលតែ ១៨ខែ ទោសនៅសេសសល់គឺ ត្រូវព្យួរទាំងអស់ និងផាកពិន័យចំនួន ២លានរៀលពីបទ«ផ្សំគំនិត ក្នុងអំពើជួញដូរគ្រឿងញៀនខុសច្បាប់ »។
លោកប្រធានចៅក្រមប្រឹក្សាបានបញ្ជាក់ថាៈ ស្ត្រីជនជាប់ចោទទាំង៣នាក់ខាងលើ ត្រូវបានចោទប្រកាន់ ពីតុលាការពីបទ«ជួញដូរថ្នាំញៀនខុសច្បាប់» និង «ផ្សំគំនិត ក្នុងអំពើជួញដូរគ្រឿងញៀនខុសច្បាប់ » តាមមាត្រា៤០ នៃច្បាប់ស្តីពីការត្រួតពិនិត្យគ្រឿងញៀន និងត្រូវបានចាប់ឃាត់ដោយសមត្ថកិច្ចនគរបាល នៅចំណុចផ្ទះជួលរបស់គេ ស្ថិតនៅក្នុងសង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ កាលពីថ្ងៃទី១១ ខែមិថុនា ២០១៣។
លោកបានបន្ថែមថាៈ បន្ទាប់ពីការបង្ក្រាប និងចាប់ឃាត់ខ្លួន សមត្ថកិច្ចនគរបាល ដកហូតបាន ថ្នាំញៀន ប្រភេទមេតំហ្វីតាមីន ចំនួន៩ កញ្ចប់ ទម្ងន់ប្រមាណ ៤០០ក្រាម ជញ្ជីងថ្លឹងគ្រឿងញៀន១ គ្រឿង ថង់សម្រាប់វេចខ្ចប់ថ្នាំញៀន និងឧបករណ៍សម្រាប់ប្រើប្រាស់ថ្នាំញៀន មួយចំនួនផ្សេងទៀត ពីក្នុងផ្ទះជួលរបស់ពួកគេ។
ប្រភពពី ភ្នំពេញប៉ុស្តិ៍
