ធនាគារកាណាឌីយ៉ា ,អេស៊ីលីដានិងវីង ត្រូវបាន ក្រសួងហិរញ្ញវត្ថុជ្រើសយកជាកន្លែងបើកប្រាក់ខែ
ភ្នំពេញ: ក្រសួងសេដ្ឋកិច្ចនិងហិរញ្ញវត្ថុបានសម្រេចជ្រើសយកធនាគារកាណាឌីយ៉ា ,ធនាគារអេស៊ីលីដា និងក្រុមហ៊ុនវីងផ្ទេរប្រាក់ ធ្វើជាប្រតិបត្តិករ សម្រាប់ជួយបើកប្រាក់ខែ ជូនមន្ត្រីរាជការ នៃក្រសួងមន្ទីរចំនួន៣៩មានមន្ត្រីរាជការប្រមាណជាង៨.០០០នាក់ដែលគេរំពឹងថា នឹងចាប់ផ្តើមចាប់ពីឆ្នាំថ្មីនេះទៅហើយ។ លោកជូ គីមឡេង រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ អ្នកឧកញ៉ាពុង ឃាវ សែប្រធានក្រុមប្រឹក្សាធនាគារកាណាឌីយ៉ា និងតំណាងរបស់ធនាគារអេស៊ីលីដានិងក្រុម ហ៊ុនវីង បានចុះហត្ថលេខាលើអនុស្សរណៈយោគយល់ស្តីពីការប្រើប្រាស់សេវាកម្មរបស់ ប្រតិ្តករទាំង៣ខាងលើនេះកាលពីល្ងាចថ្ងៃទី២៧វិច្ឆិកាឆ្នាំ២០១៣កន្លងមកនេះនៅក្រសួងសេដ្ឋកិច្ចនិងហិរញ្ញវត្ថុ។
លោកជូគីមឡេងបានថ្លែងក្នុងពិធីនោះថានេះគឺជាព្រឹត្តិការណ៍ដ៏សំខាន់ដែលបានបង្ហាញពីវឌ្ឍនភាពដ៏ធំធេងមួយទៀតនៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈសម្រាប់នីតិកាលទី៥នេះ។តាមអនុស្សរណៈខាងលើនេះរដ្ឋាភិបាលបានសម្រេចអោយធ្វើការបើកប្រាក់ខែមន្ត្រីរាជការតាមប្រព័ន្ធធនាគារដោយអនុវត្តសាកល្បងនៅក្រសួងស្ថាប័នចំនួន៣៩ដែលមានមន្ត្រីរាជការចំនួនជាង៨.០០០នាក់។លោកបានថ្លែងអោយដឹងបន្ថែមដែរថាការបើកប្រាក់បៀវត្សតាមធនាគារនេះត្រូវអនុវត្តសម្រាប់មន្ត្រីរាជការទូទៅរួមទាំងកម្លាំងប្រដាប់អាវុធទាំងពីរប្រភេទចាប់ពីឆ្នាំ២០១៤តទៅ។
លោកបានបន្ថែមថារដ្ឋាភិបាលនឹងជម្រុញកែទម្រង់បន្ថែមទៀតនូវនីតិវិធីនិងឯកសារពាក់ព័ន្ធនឹងការបើកប្រាក់ខែជូនមន្ត្រីរាជការដើម្បីអោយសមស្របតាមស្តង់ដារនៃការអនុវត្តជា អន្តរជាតិ។
អ្នកឧកញ៉ាពុង ឃាវសែ ប្រធានក្រុមប្រឹក្សាធនាគារកាណាឌីយ៉ាមានប្រសាសន៍ថា ផ្អែកលើបទពិសោធន៍ ក្នុងការអនុវត្ត គម្រោងនានា ជាមួយរដ្ឋាភិបាលនិងភាពជឿទុកចិត្តធនាគារកាណាឌីយ៉ាជាធនាគារ ក្នុងស្រុកទីមួយត្រូវបានជ្រើសរើស ជាដៃគូមួយរស់រដ្ឋាភិបាល ក្នុងការអនុវត្តគម្រោងការប្រើប្រាស់សេវាកម្មធនាគារសម្រាប់ប្រតិបត្តិការគណនីបៀវត្សមន្ត្រីរាជការដែលជាផ្នែកមួយនៃកិច្ចខិតខំប្រឹងប្រែងបន្តធ្វើកំណែទម្រង់ការគ្រប់គ្រងហិរញ្ញវត្ថុសាធារណៈស្របតាមយុទ្ធសាស្ត្ររបស់សម្តេចតេជោហ៊ុនសែន។
លោកបន្តថាជាមួយភាពជោគជ័យនេះធនាគារកាណាឌីយ៉ានឹងខិតខំអោយអស់ពីលទ្ធភាពដើម្បីរក្សានិងបង្កើនទំនុកចិត្តលើការផ្តល់សេវាកម្មប្រកបដោយគុណភាពជូនដល់អតិថិជនទូទៅនិងស្ថាប័នរដ្ឋដែលក្នុងនោះរួមទាំងក្រសួងសេដ្ឋកិច្ចនិងហិរញ្ញវត្ថុផងដែរ៕
ប្រភពពី CEN
